Se Owo Akpanamde man Edi Eti Ete

“Mme ete, ẹkûfiomo nditọ mbufo, mbak esịt ediduọ mmọ.”—Colossae 3:21.

NSO ke ete ekeme ndinam mbak esịt ẹdiduọ nditọ esie? Ana enye enen̄ede ọdiọn̄ọ mbiomo esie nte ete. N̄wed kiet oro etịn̄de n̄kpọ aban̄a nte mme owo ẹsikerede n̄kpọ ọdọhọ ete: “Nte mme ete ẹnamde n̄kpọ ẹnen̄ede ẹnyene ubọk ke udomo ifiọk oro nditọ mmọ ẹnyenede ye nte nditọ emi ẹnamde n̄kpọ n̄ko.”

Nso idi utom ete? Ediwak ubon ẹkere ke akpan utom ete edi ndinọ ntụnọ. Imesiwak ndikop eka ọdọhọde eyen emi anamde ndisịme ido ete, ‘Yak usọ ọnyọn̄ edi!’ Ke akpanikọ, oyom ẹtụnọ nditọwọn̄ ke nnennen usụn̄ edieke ẹyomde mmọ ẹdi nti owo ke ẹma ẹkekpon. Edi mme n̄kpọ en̄wen ẹdu oro anade owo anam edieke enye oyomde ndidi eti ete.

Edi n̄kpọ mfụhọ nditịn̄ nte ke idịghe kpukpru ete ẹkenyene owo emi enịmde eti uwụtn̄kpọ ọnọ mmọ. Ediwak mmọ ikokponke idikụt ete mmọ. Ke n̄kan̄ eken, mbon oro ete mmọ ẹkenen̄erede ẹsọn̄ ido ẹkeme ndikama nditọ mmọ ke ukem ubọk oro. Didie ke utọ ete oro ekeme ndikpọn̄ utọ uwụtn̄kpọ oro nnyụn̄ n̄kabade ndi eti ete?

Odu ebiet oro ẹkemede ndikụt ata nti item ke nte owo ekpedide eti ete. Bible ọnọ mfọnn̄kan item aban̄a uwem ubon. Item oro odude ke Bible idịghe ikpîkpu ekikere. Akananam ndausụn̄ oro enye ọnọde ikamake afanikọn̄. Item oro odude ke Bible owụt ọniọn̄ Andinyene Bible, kpa Jehovah Abasi, emi edide Andikọtọn̄ọ ubon. (Ephesus 3:14, 15) Edieke afo edide ete, ọkpọfọn ekere aban̄a se Bible etịn̄de aban̄a edibọk nditọ. *

Ndidi eti ete ayan̄wam nditọwọn̄ ẹkop nsọn̄idem ye inemesịt, oyonyụn̄ an̄wam mmọ ẹnen̄ede ẹsan̄a ẹkpere Abasi n̄ko. Ekeme ndinen̄ede mmem utom eyen oro enen̄erede ama onyụn̄ ekpere ete esie idem ndinen̄ede nsan̄a n̄kpere Abasi nnyụn̄ nda Enye nte ata ufan. Kamse, Bible ọdọhọ ke Jehovah, kpa Andibot nnyịn, edi Ete nnyịn. (Isaiah 64:8) Idahaemi, ẹyak ineme n̄kpọ itiokiet oro oyomde mme ete ẹnọ nditọ mmọ. Iyeneme nte editiene mme edumbet Bible ekemede ndin̄wam ete anam mme n̄kpọ emi.

 Oyom Ete Owụt ke Imama Nditọ Esie

Jehovah enịm mfọnmma uwụtn̄kpọ nte Ete. Bible etịn̄ nte Abasi amade Jesus, kpa akpa edibon Eyen esie ete: “Ete amama Eyen.” (John 3:35; Colossae 1:15) Jehovah ama etịn̄ ediwak ini ete ke imama Eyen imọ, ke imonyụn̄ inyịme enye. Ke ini Jesus akanade baptism, Jehovah ama etie ke enyọn̄ ọdọhọ ete: “Afo edi edima Eyen mi; mmenyịme fi.” (Luke 3:22) Akananam Jesus iyịkke m̀mê Ete imọ ama imọ. Nso ke ete ekeme ndikpep nto uwụtn̄kpọ oro Abasi ekenịmde mi?

Kûmen̄e ndidọhọ nditọ fo ke imama mmọ. Kelvin emi enyenede nditọ ition ọdọhọ ete: “Mmesidomo ndiwụt nditọ mi ke mmama mmọ, idịghe ke ndidọdọhọ mmọ kpọt, edi n̄ko ke ndima se owo mmọ kiet kiet anamde. Mmesiyet mmọ idem nnyụn̄ n̄kpụhọ mmọ iba.” Ke adianade do, oyom owụt nditọ fo ke afo amama se mmọ ẹnamde. Ntre kûkọbọ ke ndikụt ndudue nnyụn̄ nnen̄ede mmọ kpukpru ini. Utu ke oro, toro mmọ ke ubọk ke ubọk. Donizete emi enyenede nditọiban iba ọdọhọ ete, “Ana ete enen̄ede oyom ifet nditoro nditọ esie.” Ke ini nditọ fo ẹfiọkde ke se mmimọ inamde ẹnem fi esịt, oro ọyọnọ mmọ uku. Ndien oro ekeme ndinam mmọ ẹnen̄ede ẹsan̄a ẹkpere Abasi.

Oyom Ẹnịm Eti Uwụtn̄kpọ Ẹnọ Nditọwọn̄

John 5:19 ọdọhọ ke Jesus akanam n̄kukụre “se enye [okokụtde] nte Ete esie anamde.” Tịm fiọk ete ke itie N̄wed Abasi emi ọdọhọ ke Jesus ama okụt onyụn̄ anam se Ete esie “anamde.” Nditọwọn̄ ẹsiwak ndinam ukem emi. Ke uwụtn̄kpọ, edieke ete esikponode onyụn̄ ọnọde n̄wan esie uku, eyen esie ọyọnọ iban ukpono ye uku ke ama okokpon. Idịghe nditọ irenowo kpọt ẹsitiene uwụtn̄kpọ ete, edi uwụtn̄kpọ oro ete enịmde ekeme n̄ko nditụk nte nditọiban ẹsede irenowo.

Ndi esisọn̄ nditọ fo ndikpe owo ubọk? Afan̄ efen oro eti uwụtn̄kpọ ọfọnde edi emi. Kelvin eti ini emi nditọiren esie iba ẹkebiatde ọsọn̄urua ukwak usio ndise. Enye ama ayat esịt ọkọn̄ okpokoro asiak iba. Kelvin ama atua n̄kpọfiọk ke oro ebede onyụn̄ ekpe n̄wan ye nditọ esie ubọk ke ndikayat esịt ntre. Enye ekere ke n̄kpeubọk imọ ama otụk nditọ imọ sia isisọn̄ke mmọ ndikpe owo ubọk n̄ko.

Oyom Ẹnam Nditọwọn̄ Ẹkop Inemesịt ke Ufọk

Jehovah edi “Abasi inemesịt.” (1 Timothy 1:11) Idịghe n̄kpọ n̄kpaidem nte ke Jesus Eyen esie ama enen̄ede okop inemesịt ndidu ye Ete esie. Mme N̄ke 8:30 esịn un̄wana ke utọ itie ebuana oro Jesus ekenyenede ye Ete esie, ete: “Ndu enye [Ete mi] ke n̄kan̄, eyen emi enye ọkọde: . . . ndara ke iso esie kpukpru ini.” Nso inem inem itie ebuana ke Eyen Abasi ekenyene ntem ye Ete esie!

 Oyom anam nditọ fo ẹkop inemesịt. Ndibre mbre ye nditọ fo ekeme ndinam mmọ ẹkop inemesịt. Ndibre mbre ye eyen anam ete ye eyen ẹnen̄ede ẹdiana kiet. Felix enyịme ye ikọ emi. Enye enyene eyeneren emi edide akparawa, onyụn̄ ọdọhọ ete: “Ndisio ini nnịm nda mbre mbre ye eyen mi enen̄ede anam nnyịn idiana kiet. Nnyịn imesibre mbre ọtọkiet, ika ikese mme ufan, inyụn̄ ikese ndiye itie. Emi amanam nnyịn inen̄ede idiana kiet nte ubon.”

Oyom Ẹkpep Nditọwọn̄ Mme N̄kpọ Eke Spirit

Jehovah ekekpep Jesus n̄kpọ. Ntak edi oro Jesus ọkọdọhọde ete: “Kpa mme n̄kpọ emi n̄kokopde nto enye [Ete mi] ke ntịn̄ ke ererimbot.” (John 8:26) Abasi ọnọ ete mbiomo edikpep nditọ esie Ikọ Abasi ye nti ido uwem. Kiet ke otu mbiomo fo nte ete edi ndidọdiọn̄ n̄kpep nditọ fo ndinen edumbet. Utọ ukpep oro ekpenyene nditọn̄ọ toto ke ini mmọ ẹdide nsek. (2 Timothy 3:14, 15) Felix ọkọtọn̄ọ ndikot mme mbụk Bible nnọ eyen esie ke ini enye okosụk edide nsek. Felix ama esikot inem inem mbụk, esịnede mbon oro ẹdọn̄ọde ke N̄wed Mi eke Mme Mbụk Bible ọnọ eyen esie. * Nte eyen esie ọkọride, Felix ama esimek mme n̄wed Bible efen emi ẹkemde ye isua emana eyen esie.

Donizete ọdọhọ ete: “Imemke utom ndinam ukpepn̄kpọ Bible ubon enem. Enen̄ede ọfọn mme ete ye eka ẹwụt ke mmimọ ida n̄kpọ eke spirit ke akpan n̄kpọ, sia nditọwọn̄ ẹsifiọk ini emi mme ete ye eka mînamke se mmọ ẹkpepde nditọ mmọ.” Carlos, emi enyenede nditọ irenowo ita, ọdọhọ ete: “Kpukpru urua nnyịn imesisop idem man imek se idikpepde ke ubon nnyịn. Owo kiet kiet ke ubon esinyene ifet ndimek se enye akpamade ineme iban̄a.” Kelvin ama esiyom ifet eneme nneme ye nditọ esie kpukpru ini aban̄a Abasi, inamke n̄kpọ m̀mê m̀mọ̀n̄ ke mmọ ẹdu m̀mê nso ke mmọ ẹnyụn̄ ẹnam. Oro eti nnyịn mme ikọ Moses emi: “Yak mme ikọ emi ami ntemede fi mfịn emi, ẹdu fi ke esịt: nyụn̄ dọdiọn̄ siak mmọ nọ nditọ fo, nyụn̄ kama mmọ ke inua fo ke ini afo etiede ke ufọk fo, ye ini afo asan̄ade ke usụn̄, ye ke ini afo anade ke isọn̄, ye ke ini afo adahade ke enyọn̄.”—Deuteronomy 6:6, 7.

Oyom Ẹtụnọ Nditọwọn̄

Oyom ẹtụnọ nditọwọn̄ man ẹkpekeme ndiberi edem ke mmọ ke ẹma ẹkponi. Etie nte ndusụk mme ete ye eka ẹkere ke nditụnọ nditọ mmimọ ọwọrọ ndinọ mmọ ọkpọsọn̄ ufen, esịnede mfiomo m̀mê isụn̄i. Nte ededi, Bible idọhọke mme ete ye eka ẹfofiomo nditọ mmọ ke ini ẹtụnọde mmọ. Utu ke oro, mme ete ye eka ẹkpenyene nditụnọ nditọ mmọ ke ima, ukem nte Jehovah esinamde. (Mme Hebrew 12:4-11) Bible ọdọhọ ete: “Mme ete, ẹkûfiomo nditọ mbufo, edi ẹka iso ẹkama mmọ ke ntụnọ ye ke usụn̄ ukere n̄kpọ Jehovah.”—Ephesus 6:4.

Ndusụk ini, ẹsiyom ẹnọ nditọ ufen. Nte ededi, akpana eyen ọdiọn̄ọ ntak emi ẹnọde  imọ ufen. Ikpanaha ntụnọ emi ete m̀mê eka ọnọde anam eyen ekere ke owo imaha imọ. Bible inyịmeke ẹmia eyen ẹbe ubọk, sia emi ekeme ndinọ eyen unan. (Mme N̄ke 16:32) Kelvin ọdọhọ ete, “Mma nyom ndinen̄ede nditọ mi, mmesiwak ndisian mmọ nte ke ima oro mmade mmọ anam mi nnen̄ede mmọ.”

Oyom Ẹkpeme Nditọwọn̄

Oyom ẹkpeme nditọwọn̄ mbak ndiọi ido uwem ererimbot emi ye ndiọi nsan̄a ẹdibiat mmọ. Edi n̄kpọ mfụhọ nditịn̄ nte ke “ndiọi owo” oro ẹyomde ndibiat n̄kpri nditọwọn̄ ẹyọyọhọ ererimbot emi. (2 Timothy 3:1-5, 13) Didie ke afo ekeme ndikpeme nditọ fo? Bible ọnọ eti item emi ete: “Ọniọn̄ owo okụt idiọk-n̄kpọ, ndien edịbe: edi mme ọkọi ẹbe ẹka iso, ndien ẹda ufen.” (Mme N̄ke 22:3) Man ekpeme nditọ fo osio ke afanikọn̄, ana afo ọfiọk mme n̄kpọ emi ẹkemede ndida afanikọn̄ ndi. Diọn̄ọ mme idaha oro ẹkemede ndida mfịna ndi nyụn̄ nam n̄kpọ man ọbiọn̄ọ mfịna. Ke uwụtn̄kpọ, edieke afo ayakde nditọ fo ẹse Intanet, kụt ete ke mmọ ẹdiọn̄ọ nte ẹkemede ndida enye nnam n̄kpọ nte ọfọnde. Ọkpọfọn enịm kọmputa ke ebiet oro afo ekemede ndisọp n̄kụt se ikade iso.

Oyom ete etịm nditọ esie idem onyụn̄ anam mmọ ẹnyene ifiọk ẹban̄a mme afanikọn̄ emi mmọ ẹkemede ndisobo ke ererimbot emi ediwak owo ẹyomde usụn̄ nte ẹkpebiatde nditọwọn̄ mi. Nte nditọ fo ẹdiọn̄ọ se ẹkemede ndinam edieke owo oyomde ndisabade mmọ ke ini afo mûdụhe? * Oyom nditọ fo ẹdiọn̄ọ nnennen usụn̄ oro ẹkpedade ndido idan̄ ẹnam n̄kpọ ye se owo mîkpadaha mmọ inam. Kelvin ọdọhọ ete: “Akananam nyakke mbon en̄wen, idem mme andikpep mmọ, ẹkpep nditọ mi n̄kpọ enye emi. Mma mfiọk ke edi mbiomo mi ndikpep nditọ mi n̄kpọ mban̄a idan̄ nnyụn̄ nnam mmọ ẹdiọn̄ọ ke ndusụk owo ẹsima ndisabade nditọwọn̄.” Kpukpru nditọ esie ẹma ẹkọri ẹkabade nti ikpọ owo ẹnyụn̄ ẹdọ ndọ.

Yom Un̄wam Abasi

N̄kponn̄kan enọ oro ete ekemede ndinọ nditọ esie edi ndin̄wam mmọ ẹnyene eti itie ebuana ye Abasi. Uwụtn̄kpọ oro ete enịmde enen̄ede edi akpan n̄kpọ. Donizete ọdọhọ ete: “Oyom mme ete ẹwụt ke mmimọ imenen̄ede ida itie ebuana mmimọ ye Abasi ke akpan n̄kpọ. Ẹkpenyene ndinen̄ede nnam emi akpan akpan ke ini mmọ ẹsobode mfịna m̀mê afanikọn̄. Ke mme utọ idaha oro, ete ekpenyene ndiwụt ke imọ imenen̄ede iberi edem ke Jehovah. Ke ini ete ọbọn̄de akam ye ubon esie, enye ekpenyene ndisọn̄ọ ntịn̄ esịtekọm oro mmọ ẹnyenede ẹban̄a nti n̄kpọ oro Abasi anamde, ndien emi eyekpep nditọ nte ke ndidi ufan Abasi edi ata akpan n̄kpọ.”

Nso ndien ke owo akpanam man owo edi eti ete? Bọ item to owo emi enen̄ede ọfiọk nte ẹkpebọkde nditọ—kpa Jehovah Abasi. Edieke ọbọkde nditọ fo etiene se Ikọ Abasi etịn̄de, se idude ke Mme N̄ke 22:6 ekeme ndisu nditọ fo ke idem: “Ke ini enye akabarede idem akani owo, enye idikpọn̄ke enye.”

[Mme Ikọ Idakisọn̄]

[Ndise ke page 19]

Oyom ete enịm eti uwụtn̄kpọ ọnọ nditọ esie

[Ndise ke page 20]

Ana ete ekpep nditọ esie mme n̄kpọ eke spirit

[Ndise ke page 21]

Oyom ẹtụnọ nditọ ke ima