Ama Edinen Ikpe
San̄a Kpere Abasi
Ama Edinen Ikpe
NDI akanam owo abak fi ibak ndien etie nte owo inọhọ enye ufen, enye inyụn̄ ituaha n̄kpọfiọk? Iwakke n̄kpọ emi esiyatde owo esịt ntre, akpan akpan edieke edide owo emi akpamade onyụn̄ esede aban̄a fi abak fi ibak. Afo emekeme ndibụp ete, ‘Ntak emi Abasi esiyakde utọ n̄kpọ oro etịbe?’ * Se idude edi nte ke Jehovah Abasi asasua kpukpru idiọkn̄kpọ. Ikọ esie, kpa Bible, asian nnyịn ke enye ọyọnọ kpukpru mbon oro ẹkade iso ẹnam idiọkn̄kpọ ufen. Ẹyak idụn̄ọde se apostle Paul ekewetde ke Mme Hebrew 10:26-31.
Paul ewet ete: “Edieke nnyịn ikoide-koi ika iso ndinam idiọkn̄kpọ ke ima ikọbọ nnennen ifiọk akpanikọ, uwa ndomokiet idụhe aba inọ mme idiọkn̄kpọ.” (Ufan̄ikọ 26) Mbon oro ẹsikoide-koi ẹnam idiọkn̄kpọ ẹnen̄ede ẹnyene nduduọhọ. Ntak-a? Akpa ntak edi nte ke mmọ inamke idiọkn̄kpọ ke ntak mmemidem—nte emi esitịbede ọnọ kpukpru nnyịn ndusụk ini sia idide mme anana-mfọnmma owo. Edi mmọ ẹsesịn idem ẹnam idiọkn̄kpọ. Ọyọhọ ntak iba edi nte ke mmọ ẹkokoi ẹnam idiọkn̄kpọ. Idiọkn̄kpọ enen̄ede ọdọn̄ n̄kam ke esịt mmọ. Ọyọhọ ntak ita edi nte ke mmọ inamke idiọkn̄kpọ ke ntak unana ifiọk. Mmọ ẹnyene “nnennen ifiọk akpanikọ” ẹban̄a uduak Abasi ẹnyụn̄ ẹfiọk mme ibet Abasi.
Didie ke Abasi ese mme anamidiọk oro mîmaha ndikabade esịt? Paul ọdọhọ ete, “Uwa ndomokiet idụhe aba inọ mme idiọkn̄kpọ.” Uwa Christ—kpa enọ Abasi—ọsọhi idiọkn̄kpọ oro inamde ke ntak unana mfọnmma. (1 John 2:1, 2) Edi mbon oro ẹsịnde idem ẹnam idiọkn̄kpọ ye unana edikabade esịt idaha ọsọn̄urua enọ Abasi emi ke n̄kpọ. Ke enyịn Abasi, mmọ ‘ẹdịghi Eyen Abasi ẹnyụn̄ ẹsịn iyịp ediomi’ esie. (Ufan̄ikọ 29) Edinam mmọ owụt ke mmọ idaha Jesus ke n̄kpọ ẹnyụn̄ ẹda iyịp esie ke “mbio,” nte iyịp ikpîkpu anana-mfọnmma owo ekededi. Utọ mbon oro ẹnanade esịtekọm mi idibọhọ ufọn ito uwa Christ.
Nso iditịbe inọ ndiọi owo? Abasi edinen ikpe ọdọhọ ete: “Usiene enyene mi; ami nyosio usiene.” (Ufan̄ikọ 30) Yak kpukpru mbon oro ẹsịnde idem ẹnam idiọkn̄kpọ ẹfiọk ke owo ndomokiet ikemeke ndikokoi mbiat ibet Abasi nnyọn̄ ubọk ubọk. Mmọ ẹsibọ ufen idiọkn̄kpọ mmọ. (Galatia 6:7) Idem ọkpọkọm mmọ ibọhọ ufen idiọkn̄kpọ mmọ idahaemi, mmọ ẹyeda ke iso ikpe Abasi ke ini enye edidide ndisio kpukpru idiọkn̄kpọ ke isọn̄ emi ifep. (Mme N̄ke 22:21, 22) Paul odụri owo utọn̄ ete: “Edi n̄kpọ ndịk ndiduọ ndụk ubọk odu-uwem Abasi.”—Ufan̄ikọ 31.
Ndifiọk ke Jehovah Abasi imaha n̄koinnam idiọkn̄kpọ ọnọ nnyịn ndọn̄esịt onyụn̄ anam esịt nnyịn ana sụn̄, akpan akpan mbon oro ndiọi owo ẹnọmọde. Nnyịn ikpenyene ndiyak usiene nnọ Abasi inyụn̄ inyene mbuọtidem ke enye oyosio usiene, sia enye asasua kpukpru idiọkn̄kpọ.
[Ikọ Idakisọn̄]
^ ikp. 4 Edieke oyomde ndifiọk ntak emi Abasi ayakde ndutụhọ odu, se page 106-114 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.