Didie ke Ndifiọk Se Hell Edide Edin̄wam Fi?

MBON oro ẹkpepde ke hell edi ebiet ndutụhọ ẹsu nsu ẹdian Jehovah Abasi ẹnyụn̄ ẹbiat eti enyịn̄ esie. Edi akpanikọ ke Bible ọdọhọ ke Abasi oyosobo mme idiọkowo. (2 Thessalonica 1:6-9) Edi edinen iyatesịt idịghe n̄wọrọnda edu Abasi.

Abasi idịghe Abasi ibak. Enye akam obụp ete: “Nte n̄kpa idiọkowo enem mi esịt?” (Ezekiel 18:23) Edieke n̄kpa idiọkowo mînemke Abasi esịt, enye akpasan̄a didie okop inem ndikụt ẹtụhọrede mmọ ke nsinsi?

Ima edi n̄wọrọnda edu Abasi. (1 John 4:8) Ke akpanikọ, “Jehovah ọfọfọn ye kpukpru: esịt mbọm esie onyụn̄ ofụk kpukpru se enye anamde.” (Psalm 145:9) Abasi oyom nnyịn ima imọ n̄ko ke ofụri esịt.—Matthew 22:35-38.

Ndi Ndịk Hell m̀mê Ima Abasi Esinam Fi Anam N̄kpọ?

Ndikpep nte ke ẹsitụhọde ukpọn̄ ke hell anam mme owo ẹkop ndịk ẹban̄a Abasi. Edi owo emi ekpepde n̄kpọ aban̄a Abasi onyụn̄ amade enye eyenyene eti mbak ọnọ Abasi. Psalm 111:10 ọdọhọ ete: “Uten̄e Jehovah edi editọn̄ọ ifiọk: kpukpru mmọ eke ẹnamde mmọ ẹnyene eti ibuot.” Uten̄e Abasi idịghe ndikop ndịk mban̄a enye, edi edi ndinen̄ede n̄kpono Andibot nnyịn. Uten̄e emi iyakke nnyịn inam se iyatde enye esịt.

Se nte ndifiọk se hell edide okotụkde eyenan̄wan isua 32 emi ekerede Kathleen. Enye ama esinen̄ede ada n̄kpọsọn̄ ibọk, esika usọrọ, anam afai, odu oburobụt uwem, onyụn̄ asua idemesie. Enye ọkọdọhọ ete: “Mma nsise eyenan̄wan mi emi ekedide isua kiet nnyụn̄ n̄kere ke esịt mi nte, ‘Se se nnam eyen mi. Ẹyetụhọde mi ke hell ke ntak emi.’” Kathleen ama odomo ukeme nditre ndida n̄kpọsọn̄ ibọk, edi ikekemeke. Enye ọkọdọhọ ete: “N̄koyom ndidi eti owo, edi uwem ama odorode mi, kpukpru n̄kpọ ke ererimbot ẹnyụn̄ ẹdorode  mi. Eketie nte ke ufọn ndomokiet idụhe ndidi eti owo.”

Ekem enye ama osobo ye Mme Ntiense Jehovah. Enye ọkọdọhọ ete: “Mma ndifiọk ke ikan̄ hell idụhe. Mme itie N̄wed Abasi oro mmọ ẹkekotde ẹnọ mi ẹma ẹnen̄ede ẹn̄wan̄a mi. Esịt ama enen̄ede ana mi sụn̄ ke ini n̄kọfiọkde ke owo iditụhọkede mi ke ikan̄ hell.” Enye n̄ko ama edifiọk un̄wọn̄ọ Abasi nte ke mme owo ẹyedụn̄ ke isọn̄ ke nsinsi ke ererimbot oro ndiọi owo mîdidụhe. (Psalm 37:10, 11, 29; Luke 23:43) Enye ọkọdọhọ ete: “Mmenyene ata idotenyịn idahaemi—oro edi, ndidụn̄ ke Paradise ke nsinsi!”

Ndi eyenan̄wan emi ama etre ndida n̄kpọsọn̄ ibọk ke ini enye ekedide edifiọk ke ikan̄ hell idụhe? Enye ọkọdọhọ ete: “Ke ini ekesinen̄erede ọdọn̄ mi ndida n̄kpọsọn̄ ibọk, mma nsibọn̄ akam ndọhọ Jehovah Abasi an̄wam mi. Mma nsikere nte enye esede utọ edu oro asabarede owo mi, ndien n̄koyomke ndiyat enye esịt. Enye ama ọbọrọ akam mi.” (2 Corinth 7:1) Eyenan̄wan emi ama etre mme utọ ndiọi edu oro ke ntak oro enye mîkoyomke ndinam se iyatde Abasi esịt.

Ke akpanikọ, ndima Abasi nnyụn̄ mbak enye—idịghe ndikop ndịk mban̄a ikan̄ hell—ekeme ndinam nnyịn inam uduak Abasi man ikop idatesịt ke nsinsi. Andiwet psalm ekewet ete: “Ọfọfọn ọnọ kpukpru owo eke ẹbakde Jehovah; eke ẹsan̄ade ke usụn̄ esie.”—Psalm 128:1.

[Ekebe/Mme ndise ke page 9]

MMANIE ẸDIWỌRỌ KE HELL?

Ndusụk Bible ndikabade ikọ Greek iba emi—Geʹen·na ye Haiʹdes—nte “hell,” ẹnam mmọ inen̄ekede in̄wan̄a owo. Ke Bible, ikọ oro Geʹen·na ada aban̄a ndisobo taktak ye unana idotenyịn ediset ke n̄kpa. Edi mbon oro ẹdude ke Haiʹdes, m̀mê Hades ẹnyene idotenyịn ediset ke n̄kpa.

Ntre, ke Jesus ama akakpa onyụn̄ eset, apostle Peter ama ọdọhọ mbon oro enye eketịn̄de ikọ ọnọ ete ke owo “ikọkpọn̄ke Jesus ke hell.” (Utom 2:27, 31, 32; Psalm 16:10, King James Version) Ẹkabarede ikọ Greek emi Haiʹdes, nte “hell” ke itie N̄wed Abasi emi. Jesus ikakaha ikan̄ hell. Hades, m̀mê “hell,” ekedi udi. Edi idịghe Jesus ikpọn̄ ke Abasi anyan̄a osio ke Hades.

Bible etịn̄ aban̄a ediset ke n̄kpa ete: “N̄kpa ye hell ẹyesana mme akpan̄kpa mmọ ẹyak.” (Ediyarade 20:13, 14, King James Version) “Hell” ndina ukpọk ọwọrọ ke Abasi ayanam kpukpru mbon oro ẹdotde ẹset ẹfiak ẹdidu uwem. (John 5:28, 29; Utom 24:15) Nso utịbe utịbe idotenyịn ke nnyịn inyene ntem—ndikụt mbon nnyịn oro ẹma ẹkekpan̄a ẹwọn̄ọde ke udi ẹdi! Jehovah Abasi ima edinam emi.