Ndi Ọbọp Odori ke Utatan m̀mê ke Itiat?

NDI afo emesima ndikot Bible? Ndi afo amakam osio ini enịm ndikpep Bible kpukpru ini ye kiet ke otu Mme Ntiense Jehovah? Edieke edide ntre, anaedi omokụt ke ifiọk oro afo enyenede anam fi ọdiọn̄ọ ntak emi ekese mfịna ẹdude ntem ke ererimbot. (Ediyarade 12:9, 12) Ke adianade do, ekeme ndidi ata ediwak itie N̄wed Abasi ẹmedọn̄ fi esịt ke ini osobode mfịna ẹnyụn̄ ẹnọ fi idotenyịn ẹban̄a ini iso.—Psalm 145:14; 147:3; 2 Peter 3:13.

Ana mbon oro ẹyomde nditiene Christ ẹnyene nnennen ifiọk Bible. Edi ndi okụre ke oro? Baba. Man owo aka iso edi ata Christian—akpan akpan ke ini enye osobode idomo—ana enye anam ata akpan n̄kpọ efen. Nso idi oro? Man ifiọk se emi edide, ẹyak ineme ibio ibio iban̄a Ukwọrọikọ Oro ke Obot, emi Jesus ọkọkwọrọde ke obot Galilee.—Matthew 5:1, 2.

Ẹdomo Ufọk Iba Ẹse

Ndi emesikop n̄kpọ aban̄a Ukwọrọikọ Oro ke Obot? Gospel Matthew ye Luke ẹbụk ọwọrọetop ukwọrọikọ emi. (Matthew 5:1-7:29; Luke 6:20-49) Esida minit 20 kpọt ndikot itie N̄wed Abasi oro ukwọrọikọ emi esịnede. Kpa ye oro, enye ọdọn̄ọ se ikande itien̄wed 20 oro ẹkotde ẹto N̄wed Abasi Usem Hebrew ye se ikande uwụtn̄kpọ 50. Uwụtn̄kpọ oro Jesus ọkọnọde aban̄a ufọk iba oro ẹkebọpde edi n̄wọrọnda, koro enye ke Jesus akada eberi utịn̄ikọ esie. Edieke afo ọfiọkde se uwụtn̄kpọ oro Jesus ọkọnọde ọwọrọde, emi ayan̄wam fi ọfiọk se akpanamde man aka iso ọsọn̄ọ ada nte anditiene Christ inamke n̄kpọ m̀mê nso idomo ke afo osobo.

Jesus ọkọdọhọ ete: “Ẹyemen kpukpru owo eke ẹkopde ẹnyụn̄ ẹnamde mme ikọ mi emi ẹdomo ye owo ọniọn̄, emi ọkọbọpde ufọk esie odori ke enyọn̄ akamba itiat. Edịm onyụn̄ edep, ukwọ edi, ofụm abara onyụn̄ eberi ufọk oro edi enye iduọhọ, koro ẹkebọpde enye ẹdori ke enyọn̄ akamba itiat. N̄ko-n̄ko, ẹyemen kpukpru owo eke ẹkopde mme ikọ mi emi edi mînamke mmọ ẹdomo ye ndisịme owo, emi ọkọbọpde ufọk esie odori ke utan. Ndien edịm edep, ukwọ onyụn̄ edi, ofụm abara onyụn̄ eberi ufọk oro ndien enye ọduọ, n̄wụre esie onyụn̄ okpon.”—Matthew 7:24-27.

Owo Emi “Etịbide Isọn̄ Otụn̄ọ”

Nso akpan n̄kpọ ke Jesus akada uwụtn̄kpọ mme ọbọpufọk iba emi ekpep mbet esie? Man ọfiọk, nen̄ede tie kere ikọ Jesus oro. Nso ke afo ọfiọk aban̄a ufọk mbiba oro? Afanikọn̄ ama esịm ufọk mbiba oro. Anaedi ufọk emi ẹma ebiet kiet eken. Onyụn̄ etie nte ẹkebọp mmọ ke ukem itie. Edi ẹkebọp kiet ẹdori ke enyọn̄ utan ẹnyụn̄ ẹbọp enye eken ẹdori ke enyọn̄ itiat. Emi akasan̄a didie etịbe? Nte Gospel Luke obụkde, owo ọniọn̄ oro ama “[etịbi] isọn̄ otụn̄ọ” ekesịm itiat. (Luke 6:48) Emi akanam ufọk esie okûduọ.

Nso akpan n̄kpọ ke Jesus okoyom ndisọn̄ọ n̄wụt mi? Jesus ikọnọhọ uwụtn̄kpọ oro man owụt nte ufọk iba oro ẹketiede m̀mê ndinam ẹfiọk ebiet oro ẹkebọpde mmọ m̀mê ndiwụt  nte mme n̄kpọ oro ẹkedade ẹbọp mmọ ẹkesọn̄de idem ẹketre, edi enye okowụt se mme andibọp ufọk oro ẹkenamde. Owo kiet ama etịbi isọn̄ otụn̄ọ edi owo enye eken iketịbike. Didie ke afo ekeme nditie nte owo ọniọn̄ oro eketịbide isọn̄ otụn̄ọ? Jesus ke idemesie ama etịn̄ se uwụtn̄kpọ oro akadade aban̄a. Enye ọkọdọhọ ete: “Ntak, ndien, mbufo ẹkotde mi ‘Ọbọn̄! Ọbọn̄!’ edi mînamke mme n̄kpọ eke ndọhọde? Owo ekededi eke etienede mi onyụn̄ okopde ikọ mi onyụn̄ anamde mmọ, nyowụt mbufo owo eke enye ebietde: Enye ebiet owo . . . emi etịbide isọn̄ otụn̄ọ onyụn̄ odoride itiat idakisọn̄ ke enyọn̄ akamba itiat.”—Luke 6:46-48.

Ke akpanikọ, ndikam n̄kpan̄ utọn̄ n̄kop Ikọ Abasi m̀mê ndikot Bible ke ufọk etie nte edibọp ufọk ndori ke enyọn̄ utatan. Edi oyom inen̄ede isịn ukeme man inam se Christ ekekpepde. Oyom itịbi isọn̄ otụn̄ọ man isịm ebiet emi itiat odude.

Ntre, man ọsọn̄ọ ada nte anditiene Christ, ana afo anam se ekpepde. Edieke afo adade se ekpepde ke Bible esịn ke edinam ke usen ke usen, afo etie nte owo ọniọn̄ oro eketịbide isọn̄ otụn̄ọ. Ke ntre, eyen ukpepn̄kpọ Bible kiet kiet ekpenyene ndibụp idemesie ete: ‘Ndi ami ndi andikokop ikọ, m̀mê ndi andinanam? Ndi n̄kukụre se nsinamde esidi ndikot nnyụn̄ n̄kpep Bible kpọt, mîdịghe ndi mmesida item Bible nsịn ke edinam ke ini nyomde ndinam mme ubiere?’

Utịp Editịbi Isọn̄ Otụn̄ọ

Kere ban̄a se iketịbede inọ José. Ete ye eka esie ẹma ẹda Bible ẹkpep enye nti ido, edi akananam enye ikpepke Bible ke idemesie. Enye ọdọhọ ete: “Mma nsịn ukeme ndidu eti uwem ke ini n̄kọkpọn̄de ufọk, edi n̄kenyeneke nti ufan. Mma ntọn̄ọ ndida n̄kpọsọn̄ ibọk, nnam use, nnyụn̄ nsin̄wana en̄wan.”

Nte ini akakade, José ama ebiere ndikpụhọde usụn̄ uwem esie onyụn̄ ọtọn̄ọ ndisịn idem n̄kpep Bible. Enye ọdọhọ ete, “N̄kpọ kiet oro ekenen̄erede anam mi n̄kpụhọde ekedi ndikot Ukwọrọikọ Jesus Oro ke Obot nnyụn̄ mfiọk se enye ọwọrọde. Edi ama ada mi ini ndikpụhọde ido ye usụn̄ uwem mi. Akpa, mma n̄kere se mme inua-okot ufan mi ẹditịn̄de, edi mma nsọn̄ esịt nnam se n̄kebierede ndinam. Mma ntre ndisu nsu nnyụn̄ ntre nditịn̄ ndedehe ikọ, nnyụn̄ ntọn̄ọ ndidụk mbono esop ye Mme Ntiense Jehovah. Mma ndifiọk ke se Jesus eketịn̄de edi ata akpanikọ, ndidu mmemmem uwem nnyụn̄ nnam item Bible ẹsinen̄ede ẹnam owo okop inemesịt.”—Matthew 5:3-12.

Nso ididi utịp ke ini etịbede isọn̄ otụn̄ọ man ọbọp ufọk odori ke enyọn̄ itiat—oro edi, ke ini enen̄erede esịn idem anam se afo okotde ke Ikọ Abasi? Jesus ọkọdọhọ ete: “Ke ini ukwọ edide, akpa ọtọ edibere ufọk oro, edi isọn̄ke ikem ndinyen̄e enye, koro ẹketịmde  ẹbọp enye.” (Luke 6:48) Ke akpanikọ, edieke afo anamde se ekpepde, emi etiede nte ẹdibọp ufọk ndori ke enyọn̄ itiat, mme idomo oro ẹtiede nte oyobio idinamke mbuọtidem fo emem. Nso ikọ ndọn̄esịt ke emi edi ntem!

James eyeneka Jesus ama asiak utịp en̄wen oro ẹdinọde nditọ ukpepn̄kpọ Bible emi mîdịghe mme andikokop Ikọ Abasi kpọt edi ẹnen̄erede ẹnam Ikọ Abasi. Enye ekewet ete: “Ẹkabade ẹdi mme anam ikọ, ẹkûdi mme andikokop kpọt . . . Owo eke owụkde enyịn ese mfọnmma ibet oro anamde owo ọwọrọ ufụn onyụn̄ ọsọn̄ọde eyịre ke enye, owo emi, sia enye mîdịghe andikokop eke efrede, edi edide andinanam, oyokop inemesịt ke ndinam enye.”—James 1:22-25.

Ke akpanikọ, mbon oro ẹnamde item Bible ẹsinen̄ede ẹkop inemesịt. Ndien utọ inemesịt oro esinọ mme anditiene Christ odudu ndisọn̄ọ nda n̄kan n̄kpọsọn̄ idomo oro ẹsidomode mbuọtidem ye ima oro mmọ ẹmade Abasi.

Nso ke Afo Edinam?

Ke ini Jesus ọkọkwọrọde ikọ ke Obot, enye ama ọsọn̄ọ etịn̄ ke oyoyom inam mme ubiere ke ini ikponode Jehovah Abasi. Ke uwụtn̄kpọ, Jesus ama etịn̄ ke ana owo emek ndinyene enyịn oro enen̄erede ese m̀mê idiọk enyịn, emek ndinam n̄kpọ Abasi m̀mê ndidụk ufụn nnọ inyene, emek ndisan̄a ke nsesịre usụn̄ m̀mê ntatara usụn̄. (Matthew 6:22-24; 7:13, 14) Ekem ke Jesus ama ọkọnọ uwụtn̄kpọ oro aban̄ade mme ọbọpufọk iba oro ama, enye ama ọdọhọ mme mbet esie ke mmọ ẹkeme ndimek ndinam n̄kpọ nte owo ọniọn̄ oro mîdịghe ẹmek ndinam nte ndisịme owo oro.

Edieke afo akade iso anam kpukpru se ekpepde ke Bible, afo anam n̄kpọ nte owo ọniọn̄. Ke akpanikọ, afo ọyọbọ nti utịp idahaemi ye ke ini iso edieke etịbide isọn̄ otụn̄ọ ọbọp ufọk fo odori ke enyọn̄ itiat.—Mme N̄ke 10:25.

[Mme ndise ke page 30]

Nnyịn iyọsọn̄ọ ida ikan idomo edieke inamde se ikpepde