Ndi Mme Ntiense Jehovah Ẹsibiat Ndọ?

EDIWAK owo ẹsidọhọ ke “ndọ ayabiara edieke ebe m̀mê n̄wan okpụhọrede ido ukpono esie.” Ndusụk ini, se ẹsidọhọde ebe m̀mê n̄wan oro oyomde ndikabade ndi kiet ke otu Mme Ntiense Jehovah edi emi. Edi ndi ikọ emi edi akpanikọ?

Edi akpanikọ nte ke ibuot ekeme ndiyon̄ ebe m̀mê n̄wan ke ini owo kiet ke otu mmọ ọtọn̄ọde ndika obufa ido ukpono m̀mê etrede ndinịm se enye ekesinịmde ke ata anyan ini. Emi ekeme ndinam ebe m̀mê n̄wan okop editịmede esịt, ọduọk idotenyịn, onyụn̄ ekeme ndida utọk ndi.

N̄wan esima ndibem iso n̄kere ke oyom ikpụhọde ido ukpono imọ. Edieke n̄wan fo ekpepde Bible ye Mme Ntiense Jehovah, didie ke emi ekeme nditụk ndọ mbufo? Edieke afo edide n̄wanndọ emi osụk ekpepde Bible ye Mme Ntiense Jehovah, nso ke akpanam man ebe fo okûnen̄ede etịmede esịt?

Se Ebe Kiet Etịn̄de

Mark emi odụn̄de ke Australia ama ọdọ ndọ isua 12 mbemiso n̄wan esie ọkọtọn̄ọde ndikpep Bible ye Mme Ntiense Jehovah. Enye ọdọhọ ete, “Ndọ nnyịn ama enem, nnyụn̄ nnam eti utom. Uwem ama enen̄ede enem. Ekem n̄wan mi ama ọtọn̄ọ ndikpep Bible ye Mme Ntiense Jehovah. Eketie mi nte ke n̄kpọ iditiehe aba nte ekesitiede. N̄kamaha nte n̄wan mi ekekpepde Bible ye Mme Ntiense Jehovah, edi ke ini enye ọkọdọhọde mi ke imọ imọn̄ ina baptism nte kiet ke otu Mme Ntiense Jehovah, n̄kpọ emi ama enen̄ede afịna mi.”

Mark ama ekere m̀mê ndọ mmimọ ọmọn̄ abiara ke ntak obufa ido ukpono oro n̄wan imọ akade. Enye ama oyom ndidọhọ n̄wan esie etre ndikpep Bible, okûnyụn̄ enyene n̄kpọ ndomokiet ndinam ye Mme Ntiense. Edi utu ke Mark ndikanam n̄kpọ ke ibụmede, enye ama ayak ndusụk ini ebe. Nso iketịbe inọ ndọ esie?

Mark ọdọhọ ete: “Esịt enem mi nditịn̄ nte ke ndọ nnyịn ọfọn idahaemi akan nte ekedide. Ndọ nnyịn enen̄ede ọfọn tọn̄ọ n̄wan mi akana baptism nte kiet ke otu Mme Ntiense Jehovah ke isua 15 emi ẹbede.” Nso ikanam  ndọ oro ọfọn? Mark ọdọhọ ete: “Akpan ntak edi ke n̄wan mi anam nti item oro ẹdude ke Bible. Enye esidomo ukeme ndinọ mi ukpono.”

Item Oro Iban Emi Ẹn̄wamde Mme Ebe Mmọ Ẹnọde

Edieke afo edide n̄wanndọ emi osụk ekpepde Bible ye Mme Ntiense Jehovah, nso ke afo ekpetịn̄ onyụn̄ anam man ebe fo okûnen̄ede etịmede esịt? Kop se iban emi ẹtode nsio nsio ikpehe ererimbot ẹtịn̄de mi.

Sakiko emi otode Japan ọdọhọ ete: “Isua 31 edi emi n̄kọdọ ndọ ndien mmenyene nditọ ita. Isua 22 onyụn̄ edi emi n̄kedi kiet ke otu Mme Ntiense Jehovah. Esisọn̄ mi ndusụk ini ndinam n̄kpọ ye ebe mi sia enye mîdịghe Ntiense. Edi mmesinen̄ede ndomo ndinam item Bible oro ọdọhọde ‘ẹsọp ndikop ikọ, ẹkûsọp nditịn̄ ikọ, ẹkûsọp ndiyat esịt.’ (James 1:19) Mmesidomo ndifọn ido ye ebe mi nnyụn̄ nnyịme ndinam se enye oyomde ke ini mme n̄kpọ oro mîtuahake ye mme edumbet Bible. Emi amanam ndọ nnyịn ọfọn.”

Nadezhda emi otode Russia ọdọhọ ete: “Isua 28 edi emi n̄kọdọ ndọ, ndien mma nna baptism nte kiet ke otu Mme Ntiense Jehovah ke isua 16 emi ẹbede. Mbemiso n̄kekpepde Bible, n̄kekereke ke akpana ebe mi edi ibuot ufọk. Mma nsima ndibiere ekese n̄kpọ ke idemmi. Edi mma ndikụt ke ndinam item Bible anam nnyịn idu ke emem inyụn̄ ikop inemesịt. (1 Corinth 11:3) Nte ini akakade, ikọsọn̄ke mi aba ndisụk ibuot, ndien ebe mi omokụt mme ukpụhọde oro nnamde.”

Marli emi otode Brazil ọdọhọ ete: “Isua 21 edi emi n̄kọdọ ndọ, ndien mmenyene nditọ iba. Mma nna baptism nte kiet ke otu Mme Ntiense Jehovah ke isua 16 emi ẹbede. Mma n̄kpep ke Jehovah Abasi iyomke mme ọdọ ndọ ẹdianade, edi ke oyom mmọ ẹdu ọtọkiet. Ntre mmodomo ndidi eti n̄wanndọ, mmesitịn̄ ikọ nnyụn̄ nnam n̄kpọ ke usụn̄ oro edinemde Jehovah ye ebe mi esịt.”

Larisa emi otode Russia ọdọhọ ete: “Ke ini n̄kakabarede ndi kiet ke otu Mme Ntiense Jehovah ke n̄kpọ nte isua 19 oro ẹkebede, mma mfiọk ke se ikedide akpan n̄kpọ ikan ekedi ndikpụhọde uwem mi. Ebe mi okụt ke Bible amanam mi ndi eti n̄wan onyụn̄ anam nnen̄ede mma enye. Akpa, nnyịn ima isitọhọ iban̄a nte ikpọbọkde nditọ nnyịn, edi nnyịn imebiere mme mfịna oro idahaemi. Ebe mi esiyak nditọ nnyịn ẹtiene mi ẹka mme mbono esop koro enye ọfiọk ke se ẹkpepde ọfọn ye mmọ.”

Valquíria emi otode Brazil ọdọhọ ete: “Isua 19 edi emi n̄kọdọ ndọ, mmonyụn̄ nnyene eyen kiet. Mma n̄kabade ndi kiet ke otu Mme Ntiense Jehovah ke isua 13 emi ẹkebede. Akpa, ebe mi ikoyomke nsitiene n̄ka ukwọrọikọ. Edi mma nsidomo ndibọrọ enye ikọ sụn̄sụn̄ nnyụn̄ nnam enye ọfiọk ke Bible enen̄erede okpụhọde uwem mi. Nte ini akakade, ebe mi ama edikụt ke enen̄ede edi akpan n̄kpọ ami nditiene n̄kwọrọ ikọ. Idahaemi enye esinen̄ede esịn un̄wam ọnọ mi ke n̄kan̄ eke spirit. Enye esimen mi ke ubomisọn̄ aka obio-in̄wan̄ man n̄kekpep mme owo Bible, esinyụn̄ ada ke an̄wa ebet mi tutu n̄kụre.”

Bible Esinam Ndọ Ọfọn

Edieke ebe m̀mê n̄wan fo ekpepde Bible ye Mme Ntiense Jehovah, kûkere ke oro ọmọn̄ abiat ndọ mbufo. Ediwak ebe ye n̄wan ke ofụri ererimbot ẹnyịme ke Bible esinen̄ede anam ndọ ọfọn.

Ebe kiet emi mîdịghe kiet ke otu Mme Ntiense Jehovah etịn̄ in̄wan̄-in̄wan̄ ete: “Esịt ikenemke mi ke ini n̄wan mi akakabarede edi kiet ke otu Mme Ntiense Jehovah, edi ke ndia ufọn idahaemi.” Ebe efen etịn̄ ntem aban̄a n̄wan esie ete: “Nte n̄wan mi anamde akpanikọ, ọsọn̄ọde ada, onyụn̄ enyenede nti edu anam nnen̄ede mma Mme Ntiense Jehovah. Ido ukpono esie enen̄ede anam ndọ nnyịn ọfọn. Idahaemi, nnyịn imenen̄ede ikere iban̄a kiet eken inyụn̄ ida ndọ nnyịn nte n̄kpọ oro edibịghide ke nsinsi.”

 [Ekebe/Ndise ke page 13]

Didie ke Mme Ntiense Jehovah Ẹse Ndọ?

Mme Ntiense Jehovah ẹda Bible nte N̄wed oro ẹkedade odudu spirit Abasi ẹwet. Ntre mmọ ẹda se enye etịn̄de aban̄a ndọ ke akpan n̄kpọ. Se nte Bible ọbọrọde mme mbụme oro ẹtienede mi:

▪ Ndi Mme Ntiense Jehovah ẹsidọhọ ikọt mmọ ẹdianade ẹkpọn̄ ebe m̀mê n̄wan mmọ oro mîdịghe Ntiense? Baba. Apostle Paul ekewet ete: “Edieke eyenete ekededi enyenede n̄wan eke mînịmke ke akpanikọ, ndien enye enyịme ndidụn̄ ye enye, yak enye okûdianade ọkpọn̄ enye; ndien n̄wan emi enyenede ebe eke mînịmke ke akpanikọ, edi ebe oro enyịme ndidụn̄ ye enye, yak enye okûdianade ọkpọn̄ ebe esie.” (1 Corinth 7:12, 13) Mme Ntiense Jehovah ẹnịm ewụhọ emi.

▪ Ndi ẹsidọhọ n̄wan emi edide kiet ke otu Mme Ntiense Jehovah okûnam se ebe esie oyomde edieke enye mîdịghe kiet ke otu Mme Ntiense Jehovah? Baba. Apostle Peter ekewet ete: “Mbufo iban, ẹsụk idem ẹnọ mme ebe mbufo, man, edieke owo mmọ ekededi mîsụkke ibuot inọ ikọ Abasi, ẹkpedụri mmọ ẹda itoho ke ikọ edi oto ke edu uwem iban mmọ, koro ẹkụtde edisana edu uwem mbufo ọkọrọ ye ntotụn̄ọ ukpono.”—1 Peter 3:1, 2.

▪ Ndi Mme Ntiense Jehovah ẹkpep ke odudu ebe inyeneke adan̄a? Baba. Apostle Paul ọkọdọhọ ete: “Nyom mbufo ẹfiọk ẹte Christ edi ibuot ọnọ kpukpru irenowo; erenowo onyụn̄ edi ibuot ọnọ n̄wan; Abasi onyụn̄ edi ibuot ọnọ Christ.” (1 Corinth 11:3) N̄wan emi edide Christian oyokpono ebe esie sia enye edide ibuot ufọk. Nte ededi, odudu ebe enyene adan̄a. Enye ayanam ibat ọnọ Abasi ye Christ. Mmọdo, edieke ebe ọdọhọde n̄wan esie anam n̄kpọ oro edibiatde ibet Abasi, n̄wan oro edide Christian ‘oyokop uyo Abasi nte andikara utu ke uyo owo.’—Utom 5:29.

▪ Ndi Mme Ntiense Jehovah ẹkpep ke owo isisioho owo ndọ? Baba. Jesus Christ ọkọdọhọ ete: “Ndọhọ mbufo nte owo ekededi eke osiode n̄wan esie ndọ, ke mîtoho ke ntak use, onyụn̄ ọdọde efen esịn efịbe.” (Matthew 19:9) Ntre, Mme Ntiense Jehovah ẹnịm se Jesus etịn̄de nte ke n̄wan m̀mê ebe ekeme ndisio nsan̄a esie ndọ edieke enye esịnde efịbe. Edi mmọ n̄ko ẹnen̄ede ẹnịm ke ikpanaha ebe m̀mê n̄wan osio nsan̄a esie ndọ ke ntak n̄kpri mfịna. Mmọ ẹsisịn udọn̄ ẹnọ ikọt mmọ ẹte ẹnam item Jesus emi: “Owo ọyọkpọn̄ ete ye eka esie onyụn̄ akadiana ye n̄wan esie, ndien mmọ mbiba ẹyekabade ẹdi obụk kiet. . . . Ke ntre, se Abasi ama akadian yak baba owo kiet okûdianade.”—Matthew 19:5, 6.