Nso Isitịbe ke Ini Owo Akpade?

“Kpukpru ukpọn̄, esịnede ukpọn̄ mme idiọkowo, isikpaha . . . Ẹsitụhọde mmọ ke ikan̄ oro owo mîkemeke ndinịme, ndien sia mmọ mîkpaha, mmọ ikemeke ndibọhọ ndutụhọ.”—Clement emi otode Alexandria, kpa ewetn̄wed eke ọyọhọ isua ikie iba ye ikie ita E.N.

UKEM nte Clement, mbon oro ẹkpepde ke hell edi ebiet ndutụhọ ẹsidọhọ ke ukpọn̄ ikpaha ke nsinsi. Ndi se Bible ekpepde edi oro? Se nte Ikọ Abasi ọbọrọde mme mbụme oro ẹtienede mi.

Ndi Adam ama enyene ukpọn̄ oro mîkemeke ndikpa? Bible etịn̄ nte ẹkebotde Adam ete: “Jehovah Abasi obot owo ke ntanisọn̄, onyụn̄ ọduọk ibifịk uwem esịn ke odudu ibuo esie; ndien owo akabade edi ukpọn̄ eke odude uwem.” (Genesis 2:7) Itie N̄wed Abasi emi idọhọke ke ẹkenọnọ Adam ukpọn̄.

Nso iketịbe inọ Adam ke enye ama akanam idiọkn̄kpọ? Abasi ikotụhọkede enye ke nsinsi ke hell. Utu ke oro, Bible etịn̄ ufen oro Abasi ọkọnọde enye ete: “Ke ibibiak iso fo ke afo edidia udia, tutu edifiak ke isọn̄ emi ẹsiode fi ke esịt: koro afo edide ntan, oyonyụn̄ afiak ke ntan.” (Sịghisịghi ubọkn̄wed edi eke nnyịn; Genesis 3:19) Se Abasi eketịn̄de ikowụtke ke enyene se ikọwọrọde Adam ke idem ika iso idu uwem. Sia Adam ke idemesie ekedide ukpọn̄; ke ini enye akakpade, ukpọn̄ akakpa oro.

Ndi owo ndomokiet enyene ukpọn̄ oro mîkemeke ndikpa? Abasi ọkọdọhọ prọfet Ezekiel ete: “Ukpọn̄ eke anamde idiọk ayakpa n̄kpa.” (Ezekiel 18:4) Apostle Paul ekewet ete: “Nte idiọk-n̄kpọ okotode owo kiet [Adam] odụk ke ererimbot, n̄kpa onyụn̄ otode ke idiọk-n̄kpọ oro odụk; n̄kpa onyụn̄ ebe esịm kpukpru owo, koro kpukpru owo ẹma ẹnam idiọk-n̄kpọ.” (Rome 5:12, Edisana Ŋwed Abasi Ibom) Edieke kpukpru owo ẹnamde idiọkn̄kpọ,  do owụt ifiọk ndidọhọ ke kpukpru ukpọn̄ ẹkeme ndikpa.

Ndi ukpọn̄ emi akpade esifiọk m̀mê okop n̄kpọ? Ikọ Abasi ọdọhọ ete: “Mme odu-uwem [ẹfiọk] ẹte ke mmimọ inyene ndikpa: edi ama edi mme akpa-n̄kpa, mmọ ifiọkke baba n̄kpọ kiet.” (Ecclesiastes 9:5) Bible etịn̄ se isitịbede inọ owo ke ini enye akpade ete: “Enye afiak ke ntan esie; ke kpasụk usen oro mme uduak esie ẹtak.” (Psalm 146:4) Didie ke mme akpan̄kpa ẹkeme ndifiọk ke ẹtụhọde mmimọ ke hell edieke Bible ọdọhọde ke mmọ “ifiọkke baba n̄kpọ kiet,” ke ‘uduak mmọ ẹnyụn̄ ẹtak?’

Jesus Christ ama emen n̄kpa odomo ye idap. * (John 11:11-14) Edi ndusụk owo ẹkeme ndidọhọ ke Jesus ama ekpep ke hell ofofiop ye nte ke ẹyetop mme anamidiọk ẹdọn̄ ke ikan̄ hell. Ẹyak ineme se Jesus eketịn̄de aban̄a hell.

[Ikọ Idakisọn̄]