Jesus Edi Mfọnn̄kan Owo Emi Ikpekpebede

NDI omoyom ndidi eti owo nnyụn̄ nnen̄ede n̄kop inemesịt? Apostle Peter ama etịn̄ se akpanamde man okop inemesịt. Enye ekewet ete: “Christ ama akam okụt ukụt kaban̄a mbufo, [ọkpọn̄] uwụtn̄kpọ enịm ọnọ mbufo man ẹtiene nde ikpat esie ketket.” (1 Peter 2:21) Jesus Christ ama enịm n̄wọrọnda uwụtn̄kpọ ọnọ nnyịn ndikpebe. Ndikpep n̄kpọ mban̄a Jesus nnyụn̄ n̄kpebe mme uwụtn̄kpọ esie ẹyenam nnyịn idi nti owo inyụn̄ inen̄ede ikop inemesịt. Ẹyak idụn̄ọde ndusụk edu akakan owo emi inyụn̄ ise nte uwụtn̄kpọ esie ekemede ndin̄wam nnyịn.

Jesus ama enyene iwụk. Kpa ye oro Jesus ọkọdọhọde ke imọ ikenyeneke “ebiet eke [inịmde] ibuot,” enye ikasuaha nti n̄kpọ. (Matthew 8:20) Enye ama esika usọrọ. (Luke 5:29) Akpa utịben̄kpọ oro enye akanamde—ndinam mmọn̄ akabade edinem wine ke itie usọrọ ndọ—owụt ke enye ama esidian idem ye mme owo onyụn̄ ama nti n̄kpọ. (John 2:1-11) Edi Jesus ama owụt se ikenen̄ede ibehe imọ ikan. Enye ọkọdọhọ ete: “Udia mi edi ndinam uduak enye emi ọkọdọn̄de mi nnyụn̄ nnam utom esie mma.”—John 4:34.

□ Ndi afo omodụn̄ọde uwem fo ese se ekemede ndinam man enịm mme n̄kpọ eke spirit akpa ke uwem fo?

Mme owo ẹma ẹsisan̄a ẹkpere Jesus. Bible ọdọhọ ke Jesus eketie ufan ufan ye mme owo. Enye ikesiyatke esịt ye mbon oro ẹkeyomde enye ọkọk mfịna mmimọ m̀mê mbon oro ẹkesibụpde enye n̄kpọsọn̄ mbụme. Ke uwụtn̄kpọ, eyenan̄wan emi ọkọdọn̄ọde uwọrọiyịp ke isua 12 ama otụk Jesus ọfọn̄ man udọn̄ọ esie okụre. Ndusụk owo ẹkeme ndikere ke se eyenan̄wan emi akanamde ekedi usọn̄enyịn, edi Jesus ikesueneke enye, utu ke oro, enye ọkọdọhọ enye ufan ufan ete: “Eyenan̄wan, mbuọtidem fo amanam idem ọsọn̄ fi.”  (Mark 5:25-34) Ama esinem nditọwọn̄ ndidu ye Jesus, mmọ ikesinyụn̄ ikereke m̀mê enye oyofụmi mmimọ. (Mark 10:13-16) Enye ama esineme nneme ye mme mbet esie onyụn̄ ada mmọ nte mme ufan esie. Emi ama anam mmọ ẹkeme ndisan̄a n̄kpere enye.—Mark 6:30-32.

□ Ndi mme owo ẹsisan̄a ẹkpere fi?

Enye ama esikop owo mbọm. Kiet ke otu n̄wọrọnda edu Jesus ekedi mbọm, enye ama esinyụn̄ anam n̄kpọ ndin̄wam mme owo. Apostle John ọdọhọ ke ini Jesus okokụtde Mary atuade n̄kpa Lazarus eyeneka esie, Jesus ‘ama omụm mmụm ke spirit, esịt etịmede enye,’ enye onyụn̄ “atua eyet.” Mbon oro ẹkekụtde enye ẹma ẹfiọk ke enye ama enen̄ede ama ubon mme Lazarus, ntak edi oro bụt mîkanamke enye nditua eyet ke iso owo. Jesus ama enen̄ede atua Lazarus ufan esie mbọm ke ndikanam enye eset.—John 11:33-44.

Ini efen, eren emi ọkọdọn̄ọde akpamfia—kpa idiọk udọn̄ọ oro akanamde enye okodụn̄ nsannsan—ama ekpe Jesus ubọk ete: “Ọbọn̄, edieke afo akam amade, emekeme ndinam mi nsana.” Se Jesus akanamde ama enen̄ede eye: “Enye anyanade ubọk otụk enye, ete: ‘Mmama. Sana.’” (Matthew 8:2, 3) Jesus ikọkọkke mme owo udọn̄ọ man osu se ẹketịn̄de ẹban̄a enye kpọt. Edi enye okoyom ndikwọhọde mmọn̄eyet ke enyịn mmọ mfep. Kpukpru se enye akanamde ẹma ẹkem ye n̄wọrọnda ikọ esie emi mme owo ẹsiwakde nditịn̄ mi: “Nte mbufo ẹyomde mme owo ẹnam ye mbufo, ẹnam kpasụk ntre ye mmọ.”—Luke 6:31.

□ Ndi se afo esinamde ẹsiwụt ke emenyene esịtmbọm?

Jesus akanam n̄kpọ ye eti ibuot. Okposụkedi Jesus ekedide mfọnmma owo, enye ikodorike enyịn ndikụt mme owo ẹnamde n̄kpọ nte mme mfọnmma owo, enye ikonyụn̄ inamke nte ke imọfọn ikan mbon en̄wen, m̀mê nditie nsọn̄ido nsọn̄ido. Ini kiet, eyenan̄wan ‘emi ẹkediọn̄ọde ke obio nte anamidiọk’ ama ada mmọn̄eyet eyet Jesus ukot ndiwụt ke imọbuọt idem ke Jesus, inyụn̄ ima se enye anamde. Idem ama akpa ọbọn̄ emi okokotde Jesus ufọk ndikụt enye ayakde eyenan̄wan oro eyet enye ukot. Ọbọn̄ oro ama obiom eyenan̄wan oro ikpe. Edi Jesus ama ọfiọk ke eyenan̄wan oro enen̄ede akabade esịt, ntre ikobiomke enye ikpe. Utu ke oro, enye ọkọdọhọ ete: “Mbuọtidem fo anyan̄a fi; nyọn̄ ke emem.” Anaedi nte Jesus akanamde n̄kpọ ye eyenan̄wan oro ama anam enye etre ndinam idiọkn̄kpọ.—Luke 7:37-50.

□ Ndi mme owo ẹfiọk fi nte owo emi esisọpde otoro owo utu ke ndisisọp n̄kụt ndudue nnọ owo?

Enye ama okpono mme owo ikonyụn̄ inamke asari. Etie nte ntak emi John ekenyenede edu Jesus, okonyụn̄ edide iman esie akanam  Jesus enen̄ede ama enye. * Edi Jesus ikanamke n̄kpọ ndomokiet ndiwụt ke imama John ikan mme mbet eken. (John 13:23) Ke nditịm ntịn̄, ke ini John ye James eyeneka esie ẹkeben̄ede mfọnn̄kan itie ke Obio Ubọn̄ Abasi, Jesus ọkọdọhọ mmọ ete: “Editie ke nnasia mi m̀mê ke ufien mi inyeneke mi ndinọ.”—Mark 10:35-40.

Jesus ama esikpono mme owo kpukpru ini. Enye ikasarike mme owo nte mbon eyo esie. Ke uwụtn̄kpọ, irenowo ikesidaha iban ke n̄kpọ ndomokiet. Edi Jesus ama okpono iban. Akpa owo emi enye akayarade idem ọnọ ete idi Messiah ekedi n̄wan Samaria, ikam idịghe-di n̄wan Jew. Mme Jew ẹkesise mbon Samaria ke ndek ikesinyụn̄ ikọmke mmọ. (John 4:7-26) Enye ama onyụn̄ okpono iban ke ndiyak mmọ ẹbem iso ẹkụt imọ ke enye ama ekeset.—Matthew 28:9, 10.

□ Ndi emesisari mbon idụt en̄wen, mbon oro mîtoho ekpụk m̀mê orụk mbufo, m̀mê owo oro mîdịghe erenowo m̀mê n̄wan nte afo?

Enye ekedi eti eyen onyụn̄ ama nditọeka esie. Etie nte Joseph emi ekemende Jesus akama akakpa ke ini emi Jesus okosụk edide akparawa. Enen̄ede etie nte Jesus ama esinam utom usọ man ese aban̄a eka esie ye n̄kpri nditọeka esie. (Mark 6:3) Ke ini enye okoyomde ndikpa, enye ama ọdọhọ John mbet esie ese aban̄a eka imọ.—John 19:26, 27.

□ Ndi emesise aban̄a ubon mbufo nte Jesus akanamde?

Jesus ekedi eti ufan. Jesus ekedi ata eti ufan. Ntak idọhọde ntre? Kpa ye oro mme ufan esie ẹkesinamde ukem ndudue ediwak ini, enye ikọdọhọke mmọ ẹkûdi ufan imọ aba. Idịghe kpukpru ini ke mbet esie ẹkesinam se enye okoyomde. Edi man owụt ke imọ idi eti ufan, enye ekesinen̄ede ese nti edu mmọ utu ke ndikere ke mmọ ẹnyene idiọk uduak. (Mark 9:33-35; Luke 22:24-27) Enye ikesinyịkke mmọ ẹnam se enye amade, edi ama esiyak mmọ ẹtịn̄ ekikere mmọ.—Matthew 16:13-15.

Jesus ama enen̄ede ama mme ufan esie. (John 13:1) Didie? Enye ọkọdọhọ ete: “Idụhe owo emi enyenede ima eke okponde akan emi, owo ndikpayak ukpọn̄ esie nnọ ke ibuot mme ufan esie.” (John 15:13) Ndi owo ekeme ndinọ mme ufan esie se isọn̄de urua ikan uwem esie?

□ Ndi emesika iso ama mme ufan fo idem ke ini mmọ ẹnamde se iyatde fi esịt?

Enye ama enyene uko onyụn̄ anam n̄kpọ nte erenowo. Jesus iketiehe nte mbe oro mme owo ẹsiwetde ke ndise. Se ẹtịn̄de ẹban̄a enye ke mme Gospel ẹwụt ke enye ekedi eren uko. Jesus ama ebịn mme anyamurua ye n̄kpọurua mmọ ikaba osion̄o ke temple. (Mark 11:15-17; John 2:14-17) Ke ini mbon ntịme ẹkedide ndimụm “Jesus eyen Nazareth,” enye ama ọwọrọ uko uko ebịne mmọ man ekpeme mme mbet esie, onyụn̄ ọdọhọ mmọ ete: “Ami ndi enye. Mmọdo, edieke edide mbufo ẹyom mi, ẹyak mmọ emi ẹnyọn̄ọ.”—John 18:4-9.

□ Ndi emesisọn̄ọ ada anam n̄kpọ uko uko?

Nti edu oro isiakde mi ye mbon oro owo mîsiakke ẹnam Jesus edi mfọnn̄kan owo oro nnyịn ikpekpebede. Ndikpebe Jesus ayanam nnyịn idi nti owo onyụn̄ anam inen̄ede ikop inemesịt. Ntak edi oro apostle Peter ọkọdọhọde mme Christian ẹtiene nde ikpat Jesus ketket. Ndi afo omodomo ndinen̄ede ntiene nde ikpat Jesus?

Akpan N̄kpọ En̄wen Oro Jesus Anamde Ọnọ Nnyịn

Ke adianade ye ndinịm uwụtn̄kpọ nnọ nnyịn, Jesus ọkọdọhọ n̄ko ke ‘imọ idi usụn̄ ye akpanikọ ye uwem. Ke baba owo kiet itieneke Ete ibọhọke ebe ke imọ.’ (John 14:6) Enye ama anam mme owo ẹfiọk Abasi onyụn̄ eberede usụn̄ ọnọ mmọ ndisan̄a n̄kpere Enye. Enye  ama ọnọ uwem esie man mbon emi ẹbuọtde idem ke enye ẹkpenyene nsinsi uwem.—John 3:16.

Jesus ama owụt ke imọ ikedi isọn̄ ke ntak oro n̄ko. Enye ọkọdọhọ ete: “Eyen owo [ikedịghe] man ẹnam n̄kpọ ẹnọ enye, edi man enye anam n̄kpọ ọnọ owo onyụn̄ ọnọ ukpọn̄ esie nte ufak ke ibuot ediwak owo.” (Matthew 20:28) Jesus ndikawa uwem esie anam ubonowo ekeme ndinyene nsinsi uwem. Nso ke ana nnyịn owo kiet kiet inam man inyene nsinsi uwem? Jesus ọbọrọ ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.”—John 17:3.

Ke akpanikọ, man inyene nsinsi uwem, ana ikpep n̄kpọ iban̄a Jesus, ikpebe usụn̄ uwem esie, inyụn̄ ibuọt idem ke uwa ufak esie. Nnyịn imesịn udọn̄ inọ fi ite ada ini ekpep Bible, kpa n̄wed oro ọdọn̄ọde ifiọk nsinsi uwem, onyụn̄ esịn ukeme anam se afo ekpepde kpa nte Jesus akanamde. *

Uwụtn̄kpọ oro Jesus ekenịmde anam ifiọk utọ owo oro ikpedide. N̄kpa uwa esie ekeme ndinam nnyịn ibọhọ idiọkn̄kpọ ye utịp idiọkn̄kpọ emi edide n̄kpa. (Rome 6:23) Ke mîkpedịghe Jesus Christ, nnyịn ikpenen̄ede inyene mbọm! Kûdedei uyak se afo anamde ye mfịghe uwem emi ẹnam fi anana ini akaha ndikpep n̄kpọ mban̄a akakan owo oro akanam odude uwem, kpa Jesus Christ, onyụn̄ etiene uwụtn̄kpọ esie ketket.

[Mme Ikọ Idakisọn̄]

[Ekebe/Mme ndise ke page 7]

◼ Jesus ama okpono mme owo ikonyụn̄ inamke asari

◼ Enye ekedi eti ufan tutu esịm akpatre

◼ Ama enyene uko

Ndi afo omodomo ndinen̄ede ntiene nde ikpat Jesus nte ekekeme?

[Mme ndise ke page 5]

Jesus ama enyene iwụk . . .

edi se ẹsan̄ade ẹkpere . . .

okop owo mbọm