Ndi Ama Ọfiọk?

Nso orụk usọ eto ke Jesus ekesinam?

Joseph emi ekemende Jesus akama ekedi anamusọ eto. Jesus ama ekpep ubọkutom emi. Ke ini enye ọkọtọn̄ọde utom ukwọrọikọ esie ke ini enye ekedide “n̄kpọ nte isua edịp-ye-duop,” ẹkediọn̄ọ enye nte “eyen anamusọ eto,” ẹnyụn̄ ẹdiọn̄ọ enye n̄ko nte anamusọ eto.—Luke 3:23; Matthew 13:55; Mark 6:3.

Anaedi mbio obio Jesus ẹma ẹsiyom n̄kpọ ufụn̄isọn̄ ye ọkpọnọ man ẹda ẹnam utom in̄wan̄. Etie nte anamusọ eto ama esinyụn̄ ọkọn̄ okpokoro, akpakaha, ifịm, ekebe udọn̄n̄kpọ, usụn̄, window, ukpọhọde eto, ye ndori. Ke nditịm ntịn̄, anamusọ eto ama esinyụn̄ ọbọp ufọk.

John Andinịm Owo Baptism ama ọnọ uwụtn̄kpọ aban̄a ekụri ini kiet, ndien anaedi Jesus ye mme anamusọ eto eken ẹma ẹsikama ekụri ẹkek eto. Ekem mmọ ẹma ẹsisiak eto ke ebiet oro mîdịghe ẹmen ẹnyọn̄ itieutom mmọ. Utọ utom emi ama enen̄ede oyom odudu. (Matthew 3:10) Isaiah asiak mme n̄kpọutom eken oro mme anamusọ eto ẹkesidade ẹnam utom ke eyo esie ete: “Carpenter anyan urụk, okpok enye ke utịbi n̄kpọ, anam enye ke aban̄a, onyụn̄ okpok enye ke compass.” (Isaiah 44:13) Mme n̄kpọ oro ẹdọkde ẹsion̄o ke isọn̄ ẹwụt ke mme owo oro ẹtịn̄de ẹban̄a ke Bible ẹma ẹsida uyọkn̄kpọ, ukọn̄n̄kpọ, ye okpukwak m̀mê utịbi-n̄kpọ ẹnam utom. (Exodus 21:6; Isaiah 10:15; Jeremiah 10:4) Anaedi Jesus ama esida mme n̄kpọ emi anam utom.

Mmanie ẹkedi mme “akama okụk” oro Jesus akadade ọnọ uwụtn̄kpọ, ndien didie ke mmọ ẹkesinam utom?

Jesus ama etịn̄ aban̄a eteufọk oro akasuade ọnọ ofụn ifu ete: “Afo, ndien, ekpekemen okụk silver mi ọnọ mme akama okụk, ndien ke emi ndide ndisịm mi n̄kpọbọ se idide okịm ye udori.”—Matthew 25:27.

Ikpọ itie unịm okụk ikodụhe ke eyo Jesus nte ẹdude mfịn. Nte ededi, ebịghi mme owo ẹketọn̄ọ mbubehe edibọ owo okụk n̄kama nnyụn̄ n̄kpe udori, ekem ẹmen okụk oro ẹnọ owo ke ẹbuọt ẹnyụn̄ ẹbọ ekese udori. The Anchor Bible Dictionary ọdọhọ ke mbon Greece ẹma ẹsibuọt owo okụk ẹbọ udori ke ọyọhọ isua ikie inan̄ M.E.N. Ndien ke eyo oro mbon Rome ẹkenamde emem odu ke ererimbot, udori okụk oro ẹkebuọtde ke isua kiet ke ofụri Obio Ukara Rome ẹkedi ọdọdọk ososụhọde.

Ibet Moses ama akpan ndinọ eyen ubuene ebuọt mbọ udori. (Exodus 22:25) Etie nte ibet emi akaban̄a ebuọt oro ẹnọde eyen ubuene kpọt. Nte ededi, uwụtn̄kpọ oro Jesus ọkọnọde owụt ke ikọdiọkke ndiyak okụk nnọ “mme akama okụk” mbọ udori. Ke ntre, Jesus eketịn̄ se mme owo ẹtịmde ẹfiọk nte ido esie ekedide.