Mbụme Oro Mme Andikot Ẹbụpde

Ndi Mme Ntiense Jehovah Ẹda Akani Testament Nte Ikọ Abasi?

Mme Ntiense Jehovah ẹda Bible nte Ikọ Abasi ẹnyụn̄ ẹnyịme ke Akani ye Obufa Testament ẹdiana kiet ẹnam ofụri Bible. Nte ededi, mmọ ẹsikot enye “N̄wed Abasi Usem Hebrew” ye “N̄wed Abasi Christian Usem Greek” sia ẹkeda usem Hebrew ye Greek akpan akpan ẹwet Akani ye Obufa Testament.

Edi ndusụk mbon oro ẹdọhọde ke idi mme Christian isimaha ndikot Akani Testament. Mmọ ẹdọhọ ke enye etịn̄ aban̄a Abasi iyatesịt emi amade ekọn̄, uwotowo, ye mme edinam oro mîbietke Abasi ima oro ẹtịn̄de ẹban̄a ke Obufa Testament. Mîdịghe mmọ ẹkere ke Akani Testament inyeneke ufọn inọ mme Christian sia enye enen̄ede etịn̄ n̄kpọ aban̄a Ido Ukpono Mme Jew. Nte ededi, ke ikerede iban̄a ewụhọ oro odude ke Deuteronomy 12:32, emi ọdọhọde owo okûdian, okûnyụn̄ osio n̄kpọ ke Ikọ Abasi, ndi emi iwụtke ke ikpanaha owo ekededi etre ndikot N̄wed Abasi Usem Hebrew emi ndusụk owo ẹkotde Akani Testament?

Ke ini apostle Paul akakade ekese mbon Thessalonica ke n̄kpọ nte isua 50 E.N., “enye [ama] ada N̄wed Abasi ọkọk ibuot ye mmọ, anam an̄wan̄a onyụn̄ okot n̄kpọ ndida nsọn̄ọ nte ke ama oyom Christ okụt ukụt onyụn̄ eset ke n̄kpa.” (Utom 17:1-3) Ndusụk mbon oro ẹkekopde ikọ esie ẹma ẹkabade ẹdi mme Christian, ekem Paul ama otoro mmọ ete: “Ke ini mbufo ẹbọde ikọ Abasi, emi mbufo ẹkekopde ẹto nnyịn, mbufo ibọhọ enye nte ikọ owo, edi, kpa nte enye ke akpanikọ edide, nte ikọ Abasi.” (1 Thessalonica 2:13) Ke ini Paul akakade ekese mbon Thessalonica, etie nte Gospel Matthew kpọt ke ẹkewet ke otu n̄wed 27 emi ẹnamde N̄wed Abasi Christian Usem Greek. Ntre ana in̄wan̄-in̄wan̄ nte ke N̄wed Abasi Usem Hebrew ke Paul okokot ada “ọsọn̄ọ” se enye eketịn̄de.

Ke nditịm ntịn̄, mbon oro ẹkewetde N̄wed Abasi Christian Usem Greek ẹma ẹkot ẹto N̄wed Abasi Usem Hebrew n̄kpọ nte utịm ike-320 ẹnyụn̄ ẹtịn̄ n̄kpọ ẹban̄a enye ke ediwak itie. Ntak-a? “Koro ẹkewet kpukpru n̄kpọ oro ẹkewetde ke ini edem ndida nnọ nnyịn item, man otode ke ime oro nnyịn inyenede ye ndọn̄esịt eke otode N̄wed Abasi nnyịn ikpenyene idotenyịn.” (Rome 15:4) Emi enen̄ede owụt ke mbon oro ẹdade ofụri Bible nte Ikọ Abasi ẹnen̄ede ẹbọ ufọn.

N̄wed Abasi Christian Usem Greek, emi ọdọn̄ọde se Abasi akayararede sụn̄sụn̄ ọnọ ikọt esie, ada N̄wed Abasi Usem Hebrew ekeberi ata ediye ediye. Ntre, N̄wed Abasi Usem Hebrew osụk enyenyene ufọn. Herbert H. Farmer, prọfesọ emi ekpepde n̄kpọ aban̄a ido ukpono ke Ufọkn̄wed Ntaifiọk Cambridge ọdọhọ ke “edieke iyomde Gospel an̄wan̄a nnyịn, ke ana ibem iso ifiọk se iketịbede inọ mbon oro ẹkedude ke idak Ibet ediomi, nte ẹwetde ke Akani Testament.”

Bible itiehe nte mme n̄wed eken oro ẹsikpụhọde ẹfiak ẹkpụhọ mîdịghe ẹsion̄o mbufa ẹdi. Kpa ye oro, enye anam “usụn̄ nti owo ebiet un̄wana eke asiahade, aka iso ayama, tutu esịm ufọt uwemeyo.” (Mme N̄ke 4:18) Abasi ada N̄wed Abasi Christian Usem Greek ayarade nte uduak imọ ẹdisude, ndien emi iwọrọke ke N̄wed Abasi Usem Hebrew inyeneke ufọn. Kpukpru mmọ ẹdi “ikọ Jehovah [emi odude] ke nsinsi.”—1 Peter 1:24, 25.