Ndi Odudu Ukọkudọn̄ọ Mfịn Oto Abasi?

KE NDUSỤK idụt, edi ọsọ n̄kpọ ndikụt mme owo ẹkade ufọkakam emi ẹdọhọde ke ẹsikọk udọn̄ọ oro ẹkerede ke inyeneke usọbọ. Ke mme idụt en̄wen, utọ mme ọkọkudọn̄ọ emi ẹsidọhọ ke mmimọ ida odudu Abasi ikọk udọn̄ọ. Mbon en̄wen ẹsinịm mme mbono ido ukpono oro etiede uyom uyom ẹnyụn̄ ẹnam mme owo ẹfrọ ke n̄kpọitie mbon n̄kpọnnam, ndusụk ẹtomo eto isan̄ mmọ ẹduọn̄ọ ẹte ke ẹkọk mmimọ udọn̄ọ.

Nsio nsio ido ukpono ẹsinam emi ndien mmọ ẹsiwak nditọhọ ke otu idemmọ, ẹdọhọ ke ido ukpono enye eken okpono ndem m̀mê ke edi nsunsu ido ukpono. Ndi ekere ke Abasi ekeme ndinọ mme utọ ido ukpono oro odudu ndikọk udọn̄ọ? Kamse, Bible ọdọhọ ke “Abasi idịghe Abasi ndutịme, edi edi Abasi emem.” (1 Corinth 14:33) Ntre, ndi Abasi ọnọ mmọ odudu ẹda ẹkọk udọn̄ọ? Ndusụk mbon oro ẹdọhọde ke imesikọk udọn̄ọ ẹdọhọ ke isida odudu Jesus ikọk. Ẹyak ineme nte Jesus ekesikọkde mme owo udọn̄ọ.

Nte Jesus Ekesikọkde Mme Owo Udọn̄ọ

Se mme ọkọkudọn̄ọ eyomfịn ẹnamde edi ata isio ye nte Jesus ekesikọkde mme owo udọn̄ọ. Ke uwụtn̄kpọ, Jesus ama esikọk kpukpru mbon udọn̄ọ oro ẹkekade ẹbịne enye. Enye ikesisioho owo ifan̄ kpọt ke otuowo ikọk udọn̄ọ inyụn̄ ibịn mmọ eken ẹnyọn̄ọ ye udọn̄ọ mmọ. Jesus ama esinyụn̄ ọkọk mme owo udọn̄ọ ofụri ofụri, ndien ekesinyụn̄ awak ndidi ke ebe oro. Bible ọdọhọ ete: “Ofụri otuowo ẹyom nditụk enye, koro odudu otode enye ke idem ọwọrọ onyụn̄ anamde udọn̄ọ okụre mmọ kpukpru.”—Luke 6:19.

Mme ọkọkudọn̄ọ eyomfịn ẹsidọhọ ke mbon oro mmimọ mîkemeke ndikọk inyeneke mbuọtidem, edi Jesus ama esikọk idem mbon oro mîkọbuọtke idem kan̄a ye enye. Ke uwụtn̄kpọ, ke Jesus ama akanam nnan kiet okụt usụn̄, enye ama obụp enye ete: “Nte afo ọmọbuọt idem ye Eyen owo?” Owo oro ama ọbọrọ ete: “Ete, enye edi anie, man mbuọt idem ye enye?” Jesus ọdọhọ enye ete: “Enye edi owo emi etịn̄de ikọ ye afo.”—John 9:1-7, 35-38.

Afo emekeme ndikere ete, ‘Edieke mîkedịghe mbuọtidem akanam mbon oro Jesus ọkọkọde udọn̄ọ ẹkop nsọn̄idem, ntak emi Jesus ekesiwakde ndidọhọ mmọ ete: “Mbuọtidem fo amanam idem ọsọn̄ fi”?’ (Luke 8:48; 17:19; 18:42) Ikọ Jesus ọkọwọrọ ke mbon oro mbuọtidem akanamde mmọ ẹbịne imọ ke imọ ikọkọk udọn̄ọ, edi mbon oro mîkamaha ndidi mbịne imọ iketieneke ibọ ufọn emi. Idịghe mbuọtidem mmọ akanam mmọ ẹkop nsọn̄idem, edi odudu Abasi akanam. Bible ọdọhọ ke “Abasi [ekeyet Jesus] aran ke edisana spirit ye odudu, enye onyụn̄ asan̄a ke idụt oro anam se ifọnde onyụn̄ ọkọk kpukpru mmọ emi Devil efịkde, koro Abasi ama odu ye enye.”—Utom 10:38.

Etie nte mme owo “esikọk” udọn̄ọ mfịn ke ntak okụk. Mme ọkọkudọn̄ọ mbuọtidem ẹnen̄ede ẹdiọn̄ọ nte ẹsisan̄ade ẹbọ mme owo okụk. Ẹdọhọ ke kiet ke otu mme ọkọkudọn̄ọ emi ama ọbọ mbon oro ẹsisede edinam esie ke TV ke ofụri ererimbot n̄kpọ nte biliọn naira 10 ye ubak ke isua kiet. Mbon emi ẹsikade ufọkakam man ẹkekọk mmọ udọn̄ọ ẹsikpe ufọkabasi ekese okụk. Edi akananam Jesus ibọhọ mbon oro enye ọkọkọkde udọn̄ọ ndomo anini. Ama odu ini emi enye akakam ọnọde-nọ mmọ udia. (Matthew 15:30-38) Ke ini Jesus ọkọdọn̄de mbet esie ẹkekwọrọ ikọ, enye ọkọdọhọ mmọ ete: “Ẹkọk mbon udọn̄ọ, ẹnam mme akpan̄kpa ẹset, ẹnam mbon akpamfia ẹsana, ẹbịn mme demon ẹduọn̄ọ. Mbufo ẹkebọ ke mfọn, ẹnọ ke mfọn.” (Matthew 10:8) Ntak emi se mme ọkọkudọn̄ọ eyomfịn ẹnamde ẹdide ata isio ye se Jesus akanamde?

 Ẹda Odudu ke M̀mọ̀n̄ Ẹkọk Udọn̄ọ Mfịn?

Ke ediwak isua oro ẹbede, ndusụk mbiausọbọ ẹma ẹnam ndụn̄ọde man ẹfiọk m̀mê se mbon ido ukpono emi ẹsinamde esidi akpanikọ. Nso ke ndụn̄ọde mmọ okowụt? N̄wedmbụk n̄kpọntịbe London oro ẹkotde Daily Telegraph ọdọhọ ke abiausọbọ kiet ke London emi akadade isua 20 odụn̄ọde n̄kpọ emi ọkọdọhọ ete: “Idụhe n̄kpọ ndomokiet oro owụtde ke ẹsida odudu ẹkọk mme owo udọn̄ọ nte ẹsidọhọde.” Kpa ye oro, ediwak owo ẹnen̄ede ẹnịm ke akwa owo ufọkabasi ama ọkọk mmimọ udọn̄ọ. Ndi ukereke ke ẹkebabian̄a mmọ?

Ke ini Jesus ọkọkwọrọde ọwọrọetop Ukwọrọikọ esie oro ke Obot, enye ọkọdọhọ ke mme abian̄a abian̄a emi ẹyedọhọ imọ ete: “Ọbọn̄, Ọbọn̄, nte nnyịn ikadaha enyịn̄ fo . . . inam ediwak utom odudu?” Edi Jesus ọyọbọrọ mmọ ete: “Akananam ndiọn̄ọke mbufo! Ẹdianade mi ke idem, mbufo mme abiatibet.” (Matthew 7:22, 23) Apostle Paul ama asian nnyịn ebiet emi mbon abian̄a emi ẹdade odudu mmọ. Enye ọkọdọhọ ete: “Edidu eke abiatibet emi edi nte asan̄ade ekekem ye utom Satan ye kpukpru utom odudu ye mme nsunsu idiọn̄ọ ye mme utịben̄kpọ ọkọrọ ye kpukpru idiọk abian̄a.”—2 Thessalonica 2:9, 10.

N̄ko-n̄ko, Abasi ikemeke ndinọ mbon oro ẹsikamade mbakidem inua-okot ndisana owo oro ẹma ẹkekpan̄a, ndisọi n̄kpọ, ye mme mbiet eken, odudu ndikọk udọn̄ọ. Ntak-a? Koro Ikọ Abasi etịn̄ in̄wan̄-in̄wan̄ ete: “Ẹfehe ẹkpọn̄ ukpono ndem” n̄ko “ẹkpeme idem ke ndem.” (1 Corinth 10:14; 1 John 5:21) Mme utọ inua-okot ukọkudọn̄ọ oro ẹdi n̄kari n̄kari usụn̄ emi Devil adade atap mme owo ọkpọn̄ Abasi. Bible ọdọhọ ete: “Satan ke idemesie ke akaka iso ndiforo angel un̄wana.”—2 Corinth 11:14.

Ntak Jesus ye Mme Apostle Ẹkesikọkde Udọn̄ọ

Ata ukọkudọn̄ọ oro ẹwetde ke N̄wed Abasi Christian Usem Greek akanam mme owo ẹnen̄ede ẹfiọk ke Jesus ye mme apostle esie ẹkedi nditọ Abasi. (John 3:2; Mme Hebrew 2:3, 4) Utịbe utịbe usụn̄ oro Jesus ọkọkọkde udọn̄ọ ama anam mme owo ẹfiọk ke etop esie oto Abasi. Matthew 4:23 ọdọhọ ete: “Enye asan̄a akanade ofụri Galilee, ekpep n̄kpọ ke mme synagogue mmọ onyụn̄ ọkwọrọ eti mbụk obio ubọn̄ onyụn̄ ọkọk kpukpru orụk udọn̄ọ.” Mme utịben̄kpọ oro Jesus akanamde—emi esịnede edikọk udọn̄ọ, edinọ akwa udịm owo udia, edinam mbufụt inyan̄ odobo, ọkọrọ ye edinam mme akpan̄kpa ẹset—ẹma ẹwụt se enye edinamde ọnọ nti owo ke Obio Ubọn̄ esie. Nso eti mbụk ke emi edi ntem!

Odudu ukọkudọn̄ọ ama ebe efep ke ndondo oro Jesus, mme apostle, ye owo ekededi oro ẹkeyakde odudu oro ẹnọ ẹma ẹkekpan̄a. Apostle Paul ekewet ete: “Edide enọ editịn̄ ntịn̄nnịm ikọ, mmọ ẹyebe ẹfep; edide editịn̄ ikọ ke usem [ke utịbe utịbe usụn̄], mmọ ẹyedobo; edide ifiọk [emi Abasi ayararede ọnọ owo], enye eyebe efep.” (1 Corinth 13:8) Ntak-a? Ke mme utịben̄kpọ emi, esịnede ukọkudọn̄ọ, ẹma ẹkekụre utom mmọ—oro edi, ndinam ẹdiọn̄ọ Jesus nte Messiah emi ẹken̄wọn̄ọde nnyụn̄ nnam ẹdiọn̄ọ ke Abasi odu ye esop mme Christian—mmọ ẹma ‘ẹbe ẹfep,’ inyụn̄ inyeneke aba ufọn.

Kpa ye oro, udọn̄ọ oro Jesus ọkọkọkde ekpep nnyịn ata akpan n̄kpọ mfịn. Edieke ikopde se Jesus ekekpepde aban̄a Obio Ubọn̄ Abasi inyụn̄ inen̄erede inyene mbuọtidem, nnyịn imekeme ndidori enyịn ndikụt ini emi ntịn̄nnịm ikọ Bible edisude ke ata ata usụn̄ ye ke n̄kan̄ eke spirit. Ini, oro, “andidụn̄ ididọhọke ite, Ndọdọn̄ọ.”—Isaiah 33:24; 35:5, 6; Ediyarade 21:4.