Se Mme Owo Ẹtịn̄de Ẹban̄a Jesus

“Eyịghe ndomokiet idụhe nte ke Jesus eyen Nazareth . . . ọwọrọ etop akan ke ofụri ererimbot.”—H. G. Wells, eyen England emi edide ewetmbụk eset etịn̄ ikọ emi.

“Idụhe eren uko ndomokiet oro ebietde Christ . . . ke ererimbot emi.”—Philip Schaff, eyen Switzerland emi esikpepde n̄kpọ aban̄a ido ukpono, onyụn̄ edide ewetmbụk eset etịn̄ ikọ emi.

ANIE odot ndidi akakan owo oro akanam odude? Nso inam owo edi akakan owo? Ndi ifiọk oro enye enyenede ndin̄wana ekọn̄? Ndi odudu m̀mê ọniọn̄ esie? Mîdịghe, ndi nte ikọ ye edinam esie ẹtụkde mme owo ye uwụtn̄kpọ oro enye enịmde ẹkpenam enye edi akakan owo?

Kop se mme ewetmbụk eset, ntaifiọk, nditọ ukpepn̄kpọ Bible, mme ewet n̄wed, mme andikara, ye mbon en̄wen—ke eset ye idahaemi—ẹtịn̄de ẹban̄a Jesus Christ eyen Nazareth:

“Imemke utom owo ekededi ndinọ uyarade oro owụtde ke Jesus eyen Nazareth idịghe akakan owo oro akanam odude uwem.”—Reynolds Price, Eyen America emi edide ewet n̄wed ye eyen ukpepn̄kpọ Bible etịn̄ ikọ emi.

“Owo emi akanam mînamke idiọkn̄kpọ ndomokiet awa uwem esie man afak kpukpru owo ke ererimbot, esịnede mme asua esie. Oro ekedi mfọnn̄kan n̄kpọ oro owo akpanamde ọnọ owo.”—Mohandas K. Gandhi, adaiso ukara ye adaiso ido ukpono India etịn̄ ikọ emi.

“Ẹma ẹkpep mi Bible ye Talmud ini n̄kedide eyenọwọn̄. Ami ndi eyen Jew, edi n̄wọrọnda edu eyen Nazareth emi enen̄ede akpa mi idem.”—Albert Einstein, ataifiọk emi akamanade ke Germany etịn̄ ikọ emi.

“N̄kere ke idụhe Eyen Owo m̀mê Eyen Abasi ekededi oro ebietde Jesus Christ. Kpukpru se Enye eketịn̄de onyụn̄ anamde enyene ufọn ọnọ nnyịn mfịn, ndien idụhe owo en̄wen oro ebietde enye.”—Emi edi se Sholem Asch, kpa ewet n̄wed emi akamanade ke Poland eketịn̄de, nte ẹwetde ke Christian Herald; mmọ ẹsịn sịghisịghi ubọkn̄wed.

“N̄kenịmke baba n̄kpọ kiet ke akpanikọ toto ke ini n̄kedide eyenọwọn̄ tutu nsịm isua 35. Edi ke isua ition emi ẹbede, mma ntọn̄ọ ndinịm ke Jesus odu. Mmenịm se enye ekekpepde n̄ko, ndien emi enen̄ede okpụhọde uwem mi.”—Count Leo Tolstoy, eyen Russia emi edide ewet n̄wed ye owo akwaifiọk etịn̄ ikọ emi.

“Idụhe owo ndomokiet ke ererimbot oro uwem esie otụkde mme owo nte eke Jesus, ndien uwem [Jesus] ke osụk ototụk mme owo.”—Kenneth Scott Latourette, eyen America emi esiwetde n̄wed ye mbụkeset etịn̄ ikọ emi.

“Ndi nnyịn ikpada se ẹtịn̄de ẹban̄a Jesus nte n̄ke? Mbọk mme ufan mi, ke akpanikọ, mbụk emi ibietke n̄ke. Mbụk Socrates, emi mîdụhe eke afan̄ade ikam inyeneke isọn̄ nte mbụk Jesus Christ.”—Jean-Jacques Rousseau, eyen France emi edide owo akwaifiọk etịn̄ ikọ emi.

Ana in̄wan̄-in̄wan̄ nte ke Jesus Christ edi mfọnn̄kan owo emi ikpekpebede. Paul emi ekenen̄erede ọfiọk n̄wed ke eyo esie, emi Jesus ekemekde ete etiene imọ onyụn̄ anam mme idụt ẹfiọk imọ ama esịn udọn̄ ọnọ nnyịn ete ‘iwụk enyịn’ ise Jesus. (Mme Hebrew 12:2; Utom 9:3) Nso ke Jesus ekpep nnyịn aban̄a nte ikpodude uwem? Nso ufọn ke enye ekeme ndinam nnọ fi?