Uyom Ndudue Anam N̄kụt Akpanikọ

Nte R. Stuart Marshall obụkde

‘Nnyịn isitịn̄ke ikọ ye Mme Ntiense Jehovah, mmọ ẹnen̄ede ẹfiọk Bible.’ Ikọ oku Ufọkabasi Catholic emi ama enen̄ede akpa mi idem, sia n̄kọdọhọ enye owụt n̄wan mi ke se Mme Ntiense Jehovah ẹkpepde inenke. Ntre mma mbiere ndikpep Bible ye Mme Ntiense Jehovah man n̄wụt n̄wan mi ke se mmọ ẹkpepde inenke.

N̄KEDI isua 43 ini oro, ndien mma mben̄e idem ndida se n̄kekpepde ke ufọkn̄wed ntaifiọk n̄wụt ke se Mme Ntiense Jehovah ẹkpepde inenke. N̄kaka ufọkn̄wed Catholic tọn̄ọ ke praimari sịm ufọkn̄wed ntaifiọk. Okposụkedi n̄kọbọde akpa n̄weditoro ke ukpepn̄kpọ ndutịm uforo ke 1969 nnyụn̄ ntiene n̄kpep ukpepn̄kpọ akwaifiọk ye ukpepn̄kpọ ido ukpono emi ẹkedide amama ye mûmaha, ufọkn̄wed Catholic emi ikekpepde mi baba n̄kpọ kiet ke Bible.

Ke ini n̄kokụrede ufọkn̄wed ntaifiọk, mma ndọ eyen Catholic kiet emi ekekerede Patricia McGinn. Nnyịn mbiba ima inyene akpatre n̄weditoro Ufọkn̄wed Ntaifiọk Stanford. Akpan nnyịn ama amana ke 1977, inyụn̄ isio enye Stuart, ekem nnyịn ima iwọrọ ikodụn̄ ke Sacramento ke California ke U.S.A. N̄kanam utom ofụri isua 23 ke akamba itieutom ukara emi esitemede ukara nte ẹkpebiatde okụk. Mma nsịn idem nnam utom nnyụn̄ n̄kop inem uwem. Ama enen̄ede enem mi ndinyene eyen. Edima n̄wan mi ama enen̄ede ebere ye ami, ami nnyụn̄ mbere ye enye nde.

N̄wed Oro Ẹnọde ke Ata Esisịt Etịbe

Ke ini eyen nnyịn ekesịmde isua iba, n̄wan mi ama ọbọ Mme Ntiense Jehovah Bible onyụn̄ ọtọn̄ọ ndikpep Bible ye mmọ. Enye ama ana baptism ke isua ita ẹma ẹkebe. Eketie mi nte ke se Mme Ntiense Jehovah ẹkpepde ẹban̄a mme usen nduọkodudu ye edikịm iyịp nsịn ke idem inenke, edi mma n̄kụt ke ndusụk ukpepn̄kpọ mmọ ẹkedi ata akpanikọ. Ke 1987, mme ọbọpmbet oro ẹsede n̄kpọ ẹban̄a ukpepn̄wed ke California ẹma ẹdọhọ mfiak nditịn̄ se n̄kọdọhọde mme ọbọpmbet idụt nnyịn ẹnam. Idem ama akpa mi ndikop ndade inua mi ntoro Mme Ntiense Jehovah ke eferife.

Ufọkn̄wed Ntaifiọk California ẹma ẹnen̄ede ẹyom okụk ndida mbọ utom emi akakpade biliọn dollar itiokiet mbak mbon en̄wen ẹdisọp ẹbọ. Ekedi utom edibọp ata akamba ukwakutom unam ndụn̄ọde. Mma ndọhọ mmọ ẹfre enyịn ẹban̄a nditịp okụk oro, ke ukwakutom oro idinen̄ekede inyene ufọn inọ idụt nnyịn. Ufọkn̄wed ntaifiọk ikenyịmeke, ntre mmọ ẹma ẹda ntaifiọk iba oro ẹma ẹkebọ n̄kponn̄kan enọ ke ntak ifiọkn̄wed mmọ man ẹditịn̄ ufọn ukwakutom emi  ẹnọ mme ọbọpmbet. Mmọ mbiba ẹma ẹdọhọ ke ukwakutom oro eyenyene ufọn ọnọ ntaifiọk. Kiet ke otu mmọ ọkọdọhọ ke ukwakutom oro ayanam ẹdiọn̄ọ nte ekondo akasan̄ade edidu. Enye eken ọdọhọ ke enye ekeme ndinam ẹfiọk nte uwem akasan̄ade edidu ke ekondo.

Etieibuot okpokoro mbono oro ama ọwọn̄ọde ese mi onyụn̄ obụp ete: “Ndi ekere ke ndibiat biliọn dollar itiokiet man ifiọk kpukpru emi okpon akaha?”

Mma mbọrọ nte, “Mmọfiọk ke enen̄ede ọfọn ndifiọk nte ekondo ye uwem ẹkesan̄ade ẹdidu. Edi Mme Ntiense Jehovah ẹma ẹdi ufọk mi ke Saturday ẹdinọ mi magazine oro anamde owo ọfiọk se isụk inemede emi, ndien mmọ ẹkedọhọ nnọ ata esisịt etịbe mbọ magazine oro. N̄kereke ke ndibiat akpakịp biliọn dollar itiokiet mbọp ukwakutom emi ayanam nnyịn ifiọk nte ekondo ye uwem ẹkesan̄ade ẹdidu nte magazine Mme Ntiense Jehovah oro mîkpaha n̄kpọ ndomokiet.”

Kpukpru owo ke ufọk oro, esịnede ntaifiọk iba oro, ẹma ẹduọk imam. Kpa ye oro mme ọbọpmbet ẹkenọde okụk man ẹda ẹbọ utom oro, owo mmọ ndomokiet ikafan̄ake se n̄ketịn̄de.

Nte ini akakade, mma n̄kụt ke enen̄ede oyom nnam n̄kpọ mban̄a se ikakade iso ke ufọk mi. Esịt ikenemke mi ke ini n̄wan mi ọkọdọhọde ke iyom ndinen̄ede nsịn idem ke utom ukwọrọikọ ke mma n̄ketịn̄ ikọ ye enye ke ofụri isua itiokiet nte enye etre ndikpep Bible ye Mme Ntiense Jehovah. Oro ọkọwọrọ ke enye idisikaha aba utom kpukpru usen. Esịt ama ayat mi ndikụt nte owo oro ama akaka n̄wed akpanamde utọ ubiere oro, ndien eketie nte idụhe se n̄kpetịn̄de m̀mê se n̄kpanamde man n̄kpụhọde enye ekikere.

Mma nyom owo emi enen̄erede ọfiọk Bible akan mi sia n̄kekere ke enye ọyọsọsọp owụt n̄wan mi ke se Mme Ntiense Jehovah ẹkpepde inenke. Edieke owo emi ekemede ndifọi ọkpọkọm ndudue kiet kpọt n̄wụt n̄wan mi, oro ayanam enye ọtọn̄ọ ndiyịk mme ukpepn̄kpọ mmọ eken. N̄kukụre se n̄koyomde edi oro man n̄wan mi okpụhọde ekikere. Mma n̄kenyene nneme ye oku kiet ke ufọkabasi oro ami ye n̄wan mi ikesikade akpa. Enye ọkọbọrọ mi se n̄ketịn̄de ke ntọn̄ọ ntọn̄ọ ibuotikọ emi. Ke ini oku oro mîkamaha ndiketịn̄ ikọ ye n̄wan mi, mma mbiere ndinam oro ke idemmi okposụkedi n̄kọfiọkde ke emi ayada mi ini esisịt. Akana ndomo ukeme n̄wụt n̄wan mi ke se Mme Ntiense Jehovah ẹkpepde inenke.

Mmọtọn̄ọ Ndiyom Ndudue

Ke ini n̄kọtọn̄ọde ndikpep Bible ye Mme Ntiense Jehovah, se ikenemde mi ikan ekedi mme ntịn̄nnịm ikọ Bible. Mma n̄kot n̄wed Isaiah nnyụn̄ n̄kụt nte prọfet emi eketịn̄de aban̄a iduọ  Babylon ke isua 200 mbemiso enye ọduọ. Prọfet emi ama etịn̄ nnennen nnennen ke Cyrus edikan Babylon, onyụn̄ etịn̄ nte enye ẹdiwọn̄ọrede mmọn̄ Akpa Euphrates. (Isaiah 44:27–45:4) Mma n̄kpep n̄kpọ mban̄a iduọ Babylon ke ini n̄kakade n̄wed. Mma nnyụn̄ ndifiọk ke prọfet Daniel ama etetịn̄ isua 200 ke edem aban̄a akwa edidem oro edikarade Greece, ye nte ke ẹyebahade obio ukara esie ẹnọ mbọn̄ esie mbinan̄ oro mîdisọn̄ke odudu nte enye. (Daniel 8:21, 22) Mma nditi ke ẹma ẹsikpep nnyịn ẹban̄a Akwa Alexander emi akakarade Greece ke ufọkn̄wed. Ndụn̄ọde oro n̄kanamde ke idem mi ama anam nnen̄ede nnịm ke ẹma ẹwewet mme ntịn̄nnịm ikọ emi mbemiso mmọ ẹsude.

Adan̄a nte n̄kekpepde Bible ye Mme Ntiense Jehovah, ntre ke n̄kenen̄ede nnịm ke Bible edi Ikọ Abasi, kpa n̄kpọ emi mmen̄kọfiọkke ke ofụri isua oro n̄kọbọde ukpep Catholic. Nso ke ndida ifiọk emi nnam? Mma mbiere ndiyak idem mi nnọ Jehovah nnyụn̄ n̄kabade ndi kiet ke otu Mme Ntiense esie. (Isaiah 43:10) Ke isua iba kpọt ẹma ẹkebe tọn̄ọ n̄kenyene nneme ye oku oro, mma nna baptism, ke 1991. Eyen nnyịn akana esie edem isua oro.

Emi ama anam nnyịn ikpụhọ se ikaduakde ndinam ke ubon nnyịn. Kiet ke otu n̄kpọ oro n̄kanamde ke mma n̄kana baptism ekedi ndinam ndutịm man n̄wan mi ekpetre ndikpep n̄wed ke ufọkn̄wed ntaifiọk ke isua ition ke iso emi enye edidide isua 50. Enye okoyom ndidi ọkwọrọikọ ofụri ini emi Mme Ntiense Jehovah ẹsikotde asiakusụn̄ man an̄wam mme owo ẹfiọk akpanikọ emi odude ke Bible. Ini oro, mme asiakusụn̄ ẹkesikwọrọ ikọ hour 1,000 ke isua m̀mê n̄kpọ nte hour 83 kpukpru ọfiọn̄. Etisịm 1994, enye ikesikaha aba utom kpukpru usen man ekeme nditọn̄ọ utom ukwọrọikọ ofụri ini. Se n̄kebierede ndibem iso nnam ekedi ndida ekese ini n̄kwọrọ ikọ, n̄n̄wam esop nte n̄kekeme, nnyụn̄ nda ifiọkn̄wed mi nnam ibat nnọ mbon oro ẹbọpde mme Ufọkmbono Obio Ubọn̄ ke n̄kann̄kụk oro.

Ndusụk ini, mma nsinyene ifet ndikwọrọ ikọ ke itieutom. Obufa owo oro ekesede aban̄a nte ẹbiatde okụk ke itieutom nnyịn ekedi Ntiense, edi enye ikenen̄ekede isịn aba idem ke n̄kpọ Abasi. Eyịghe oro enye ekenyenede aban̄a se Bible etịn̄de ama anam enye etek ke ifịk. Ama enen̄ede enem mi ndin̄wam enye afiak esịn idem ke n̄kpọ Abasi. Enye ama ọnyọn̄ aka obio mmọ ọkọtọn̄ọ utom usiakusụn̄ do.

Ke 1995, mma ntiene ndụk akpan mbono oro ikpọ owo ukara ẹkedụkde man ẹneme ẹban̄a ndụn̄ọde oro idụt nnyịn ẹkenamde. Etieibuot okpokoro mbono oro ama obụp owo emi akadade iso ke utom oro m̀mê nso itịbe inọ akamba ukwakutom oro ẹkeduakde ndibot. Enye ama ọdọhọ ke obio Texas ẹkebọ utom oro, edi ke ntak ita ẹnam mmọ ẹkûkụre utom oro. Akpa, mbemiso ẹketọn̄ọde utom oro, ekọmurua utom oro ama ọdọk ekesịm biliọn dollar usụkkiet. Ọyọhọ iba, ukara ẹkeyom ndida okụk nnam n̄kpọ efen, akpan akpan ekọn̄ Iraq eke 1991. Ọyọhọ ita, mmọ ẹma ẹdikụt ke imekeme ndifiọk se ikoyomde ndifiọk edieke inọde Mme Ntiense Jehovah ata esisịt etịbe kpọt ibọ magazine mmọ. Etie nte ediwak owo ẹma ẹsitịn̄ ẹban̄a se n̄ketịn̄de, ẹnyụn̄ ẹfiak ẹtịn̄ ke mbono oro.

Ediwak owo ẹma ẹduọk imam, ndusụk ẹmenede enyịn ẹdise mi. Mma nnam kpukpru mmọ ẹfiọk nte isinọde n̄wed nnyịn idahaemi nnyụn̄ nsian mmọ ke mmọ ẹkeme ndifiọk nte ekondo ye uwem ẹkesan̄ade ẹdidu ke mfọn idahaemi edieke mmọ ẹkotde mme n̄wed nnyịn.

Ata Inem Uwem

Ke ndondo oro n̄wan mi ama ọkọkpọn̄ utom, nnyịn ima idiomi se ndinamde ke isua ition ke iso. Mma nda mbufiọk mbụp mme itieutom en̄wen m̀mê ẹkeme ndinyịme owo anam utom ọnọ mmọ ke ibio ini, sia n̄koyom ndida ekese ini n̄kpep mme owo Bible. Ke unana idotenyịn, itieutom nnyịn ẹma ẹnyịme nsinam utom ke ibio ini. Ntre, mma ntiene ndụk utom usiakusụn̄ m̀mê utom ukwọrọikọ ofụri ini, ke 1998.

Nte ami ye n̄wan mi ikosụk itịmde idem usenubọk kiet ndika ukwọrọikọ, n̄kọk itieutom Mme Ntiense Jehovah ke Brooklyn New York ke United State ẹma ẹkot nnyịn ke urụk ukopikọ. Ẹma ẹbụp m̀mê n̄kpama ndinam utom ibio ini do. Mma nsọsọp mbọrọ “ih.”  Ima ika ikanam utom do ke ofụri isua kiet ye ubak. Mma mbabak n̄kpọn̄ utom mbakara oro n̄kanamde man ntie nnam utom Abasi emi mma. Ke ima ikokụre se ẹkedọhọde idinam, ima ika ikan̄wam ndibọp Ufọkmbono Mme Ntiense Jehovah ke Fairfield ke California. Ima inyam ufọk nnyịn ke Sacramento, iwọrọ ikodụn̄ ke ekpri ufọk ke Palo Alto. Ndikọkpọn̄ utom ini oro ama ọnọ mi ifet ndinam mme utom en̄wen oro ẹkedade edidiọn̄ ẹdi. Ima idinam utom n̄ko ke n̄kọk itieutom Mme Ntiense Jehovah ke Nigeria, ikanam ke South Africa, Canada, Britain, ye Germany.

Ami ye n̄wan mi imekpebe Mme Ntiense Jehovah oro ẹkekpepde nnyịn Bible ke nditiene n̄kpep mbon en̄wen akpanikọ Bible n̄ko. Ke akpanikọ, mmenịm ke ukpep oro Jehovah ọnọde nnyịn ọfọn akan kpukpru ukpep oro n̄kọbọde. Enye ọfọn akan ukpep ekededi oro ererimbot emi ọnọde sia enye ekpep nnyịn ata ekese n̄kpọ. Jehovah ekpep Mme Ntiense esie nte ẹkemede ndikpep mme owo Bible ke usụn̄ oro otụkde mmọ esịt ye ekikere. Se inamde mi n̄ka iso n̄kpep Bible edi oro. Ami ye n̄wan mi imenen̄ede ikọm Jehovah Abasi, kpa Andikara ofụri ekondo, ke uwem oro enye ọnọde nnyịn ye ifet oro enye ọnọde nnyịn ndida ifiọkn̄wed nnyịn nnam n̄kpọ esie.

[Se ẹwetde ke ikpọ abisi ke page 27]

Ke ini n̄kọtọn̄ọde ndikpep Bible ye Mme Ntiense Jehovah, se ikenemde mi ikan ekedi mme ntịn̄nnịm ikọ Bible

[Ndise ke page 27]

Ami ye Patricia n̄wan mi ke usen ndọ nnyịn

[Ndise ke page 29]

Esinem nnyịn ndin̄wam mme owo ẹkpep akpanikọ Bible