Nte Abasi Edi Ata Owo?
Nte Abasi Edi Ata Owo?
Se ẹsiwakde ndibọrọ:
◼ “Enye odu ke kpukpru ebiet ye ke kpukpru n̄kpọ. Enye etie nte ofụm.”
◼ “Enye edi odudu emi enyenede ifiọk etieti, m̀mê odudu oro ẹkerede-kere.”
Jesus ọkọdọhọ didie?
◼ “Ke ufọk Ete mi ediwak ebietidụn̄ ẹdu.” (John 14:2) Jesus ọkọdọhọ ke Abasi enyene ndamban̄a ufọk, m̀mê itieidụn̄.
◼ “N̄kọwọrọ nto ke Ete ndidụk ke ererimbot. N̄ko, ami mmọn̄ n̄kpọn̄ ererimbot ndien mmọn̄ nnyọn̄ ntiene Ete.” (John 16:28) Jesus ekenịm ke Abasi edi ata Owo emi enyenede akpan ebiet oro odụn̄de.
AKANANAM Jesus idọhọke ke Abasi edi odudu oro ẹkerede-kere. Utu ke oro, enye ama etịn̄ ikọ ọnọ Abasi onyụn̄ ọbọn̄ akam ọnọ enye. Enye esiwak ndikot Jehovah, Ete imọ eke heaven, oro owụtde ke enye enen̄ede enyene n̄kpet n̄kpet itie ebuana ye Abasi.—John 8:19, 38, 54.
Edi akpanikọ ke “akananam baba owo kiet ikwe Abasi” ye nte ke “Abasi edi spirit.” (John 1:18; 4:24) Edi emi iwọrọke ke enye inyeneke idem m̀mê nte etiede. Bible ọdọhọ nnyịn ete: “Edieke idem eke obụk odude, idem eke spirit odu n̄ko.” (1 Corinth 15:44) Ntem, nte Jehovah enyene idem eke spirit?
Ih. Ke ini ẹkenamde Jesus eset, enye “okodụk ke heaven, man enye ke emi akpada ke iso Abasi kaban̄a nnyịn.” (Mme Hebrew 9:24) Emi ekpep nnyịn akpan n̄kpọ iba aban̄a Abasi. Akpa, enye enyene ebietidụn̄. Ọyọhọ iba, enye edi Owo, idịghe ikpîkpu odudu oro owo mîfiọkke nte etiede, emi odụn̄de ke kpukpru ebiet.
Do, didie ke Abasi ekeme ndinyene odudu ndinam n̄kpọ ke kpukpru ebiet? Abasi ekeme ndidọn̄ edisana spirit, m̀mê anam-utom odudu esie, aka ebiet ekededi ke ekondo. Ukem nte ete oro anyanarede ubọk man ọdọn̄ nditọ esie esịt onyụn̄ an̄wam mmọ, Abasi esida edisana spirit esie anam uduak esie.—Psalm 104:30; 139:7.
Sia Abasi edide Owo, enye enyene edu n̄ko ye mme n̄kpọ oro enye amade onyụn̄ asuade—esinyụn̄ okop inemesịt ye iyatesịt. Bible asian nnyịn ke enye ama ikọt esie, adat esịt ke n̄kpọ emi enye anamde, asua ukpono ndem, inyụn̄ inemke esịt iban̄a idiọkido. (Genesis 6:6; Deuteronomy 16:22; 1 Ndidem 10:9; Psalm 104:31) Ẹkot enye “Abasi inemesịt” ke 1 Timothy 1:11. Imosụk ise Jesus ọkọdọhọde ke imekeme ndikpep ndima Abasi emi ke ofụri esịt!—Mark 12:30. *
[Ikọ Idakisọn̄]
^ ikp. 12 Edieke oyomde ntọt efen efen kaban̄a ibuotikọ emi, se ibuot 1 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.
[Se ẹwetde ke ikpọ abisi ke page 5]
Ukem nte ete oro anyanarede ubọk man ọdọn̄ nditọ esie esịt, Abasi esida edisana spirit esie anam uduak esie