Nte Abasi Ekere Aban̄a Mi?
Nte Abasi Ekere Aban̄a Mi?
Se ẹsiwakde ndibọrọ:
▪ “Abasi okpon akaha ndikere mban̄a mme mfịna mi.”
▪ “N̄kereke ke enye ekere aban̄a mi.”
Jesus ọkọdọhọ didie?
▪ “Nte owo inyamke akadan̄abasi ition ke n̄kpri okudọk iba? Kpa ye oro Abasi ifreke ndomo mmọ kiet. Edi ẹmebat kpa kpukpru idet ke ibuot mbufo. Ẹkûfehe ndịk; mbufo ẹmesọn̄ urua ẹkan ediwak akadan̄abasi.” (Luke 12:6, 7) Ke akpanikọ, Jesus ekekpep ke Abasi ekere aban̄a nnyịn.
▪ “Ẹkûtịmede esịt ẹnyụn̄ ẹdọhọ ẹte, ‘Nnyịn ididia nso?’ m̀mê, ‘Nnyịn idin̄wọn̄ nso?’ m̀mê, ‘Nnyịn idisịne nso?’ Sia kpukpru emi ẹdi mme n̄kpọ emi mme idụt ẹbịnede ye ọkpọsọn̄ udọn̄. Koro Ete mbufo eke heaven ọfiọk ke mbufo ẹmeyom kpukpru n̄kpọ emi.” (Matthew 6:31, 32) Jesus ama enịm ke Abasi ọfiọk se inanade nnyịn.
BIBLE enen̄ede etịn̄ ke Abasi ekere aban̄a nnyịn. (Psalm 55:22; 1 Peter 5:7) Edieke enye ekerede aban̄a nnyịn, ntak emi nnyịn ibọde ufen ntem mfịn? Edieke Abasi amade nnyịn onyụn̄ enyenede akakan odudu, ntak emi enye mîtreke ndutụhọ?
Ibọrọ mbụme oro abuana n̄kpọ kiet oro ediwak owo mîfiọkke—oro edi, ke Satan kpa Devil edi andikara idiọk ererimbot emi. Ke ini Satan okodomode Jesus, enye ama enyịme ndinọ Jesus kpukpru obio ubọn̄ ererimbot emi, onyụn̄ ọdọhọ ete: “Nyọnọ fi ofụri odudu emi ye ubọn̄ mmọ, koro ẹma ẹyak enye ẹnọ mi, nnyụn̄ nda enye nnọ owo eke mmade.”—Luke 4:5-7.
Anie ekemek Satan andikara ererimbot? Ke nditịm ntịn̄, Adam ye Eve emi ẹkedide akpa ete ye eka nnyịn ẹkemek Satan nte andikara ke ini mmọ ẹkekopde uyo Satan ẹnyụn̄ ẹkpọn̄de Abasi. Toto ke ini nsọn̄ibuot oro, Jehovah Abasi enyene ime onyụn̄ ayak anyan ini ebe man owụt ke ukara Satan okpu idiọk idiọk. Jehovah inyịkke-nyịk mme owo ẹnam n̄kpọ ẹnọ imọ, edi enye emebererede usụn̄ man nnyịn ikpafiak itie ke emem ye enye.—Rome 5:10.
Sia Abasi ekerede aban̄a nnyịn, enye amanam ndutịm man Jesus akpanyan̄a nnyịn osio ke ukara Satan. Ke mîbịghike, Jesus ‘oyosobo enye emi ekemede ndida n̄kpa ndi, oro edi, Devil.’ (Mme Hebrew 2:14) Enye ndinam emi ọwọrọ ke enye ‘ayabiat mme utom Devil.’—1 John 3:8.
Ẹyenam isọn̄ emi afiak edi Paradise. Ini oro, Abasi “ọyọkwọhọde kpukpru mmọn̄eyet ke enyịn [mme owo] efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.”—Ediyarade 21:4, 5. *
[Ikọ Idakisọn̄]
^ ikp. 12 Edieke oyomde ntọt efen efen kaban̄a ntak emi Abasi ayakde ndutụhọ odu, se ibuot 11 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.
[Se ẹwetde ke ikpọ abisi ke page 8]
Ẹyenam isọn̄ emi afiak edi Paradise