“Ikekemke Kan̄a Ini Mi”

Iso ubomisọn̄ ama ọbọhọ awat akamba ubomisọn̄ mbio. Ubomisọn̄ oro ama ọwọrọ ọkpọn̄ usụn̄ ọdọk ebiet oro mme andisan̄a ke ukot ẹsisan̄ade, ọtọ ebe ye n̄wan ye akparawa isua 23 oro ẹkesan̄ade do. Nte n̄wedmbụk n̄kpọntịbe New York City ọdọhọde, ebe ye n̄wan oro ẹma ẹkpa ke ebe oro, edi akparawa oro okosọsụhọ. Ke ini enye ekesetde edifiọk se iketịbede, akpa n̄kpọ emi okodụkde enye ekikere ekedi: ‘Se itịbede emi akpa mi idem-e! Abasi mbọk nyan̄a mi.’ Enye ama ọdọhọ ete, “Ikekemke kan̄a ini mi.”

ANAEDI emesikop mme orụk mbụk emi. Ke ini owo ọbọhọde n̄kpa ke ikwa ifụhi, mme owo ẹsidọhọ ẹte, ‘Ikekemke kan̄a ini esie,’ edi ke ini owo akpade ke ata mbabuat unọmọ, mmọ ẹsidọhọ ẹte, ‘Ini esie ekem’ m̀mê, ‘Abasi ada enye.’ Edide mmọ ẹdọhọ ke se itịbede oto akan̄a, mfọniso, m̀mê Abasi, mmọ ẹnyene ukem ekikere. Ediwak owo ẹnịm ke ẹma ẹbebiere se iditịbede ke uwem mmimọ ye mme utịp n̄kpọntịbe emi ẹnịm, ndien ke mmimọ ikemeke ndinam baba n̄kpọ kiet mban̄a emi. Ekikere emi itọn̄ọke mfịn, inyụn̄ idịghe n̄kpa ye mbabuat n̄kpọntịbe kpọt esinam ẹnyene utọ ekikere emi.

Ke uwụtn̄kpọ, mbon Babylon eset ẹkenịm ke mme ntantaọfiọn̄ ye nte mmọ ẹsan̄ade ẹsibiere se mme owo ẹnamde. Mmọdo, mmọ ẹkesidori enyịn ke ikpaenyọn̄ man ọnọ mmọ idiọn̄ọ ye mme utịben̄kpọ oro ẹdidade mmọ usụn̄. Mbon Greece ye Rome ẹma ẹtuak ibuot ẹnọ mme abasi an̄wan akan̄a, oro eketiede ndusụk ini nte odudu emi mmọ ẹkenyenede ndibiere m̀mê owo edinyene mfọniso m̀mê ndiọkiso ama akam okpon akan uduak akakan abasi mmọ, Zeus ye Jupiter.

Ke Edem Usiahautịn Asia, mbon Hindu ye Buddha ẹnịm ke akpanikọ ke se itịbede inọ owo idahaemi edi utịp mme n̄kpọ oro enye akanamde ke emana oko, ye nte ke mme n̄kpọ oro enye anamde ke uwem emi ẹdibiere se iditịbede inọ enye ke emana en̄wen. Mme ido ukpono eken—emi esịnede ediwak ufọkabasi Christendom—ẹmenịm ẹnyụn̄ ẹkpep ukpepn̄kpọ akan̄a n̄ko.

Mmọdo, ikpaha nnyịn idem nte ke idem inua-okot eyo ntatenyịn nnyịn emi, ediwak owo ke ẹsụk ẹnenịm ke akan̄a akara idaha mmimọ ke uwem, se iwọrọde mmimọ ke usen ke usen, ye se uwem mmimọ ẹdiwọrọde ke akpatre ye nte ke mmimọ ikemeke ndinyan̄a. Ndi nte afo esede uwem edi oro? Ndi ẹma ẹbebiere se iditịbede inọ owo kiet kiet, edikụt unen ye edikpu—idem emana ye n̄kpa? Ndi akan̄a akara uwem fo? Ẹyak ise nte Bible ekemede ndin̄wam nnyịn ibọrọ mme mbụme emi.

[Ebiet Ẹdade Ndise Ẹto ke page 3]

Ken Murray/New York Daily News