Ini Ndimek

“Abasi obot owo esịn ke mbiet esiemmọ, ke mbiet Abasi ke obot enye; eren ye n̄wan ke obot mmọ.” —Genesis 1:27.

IKỌ oro itịmde imehe mi, oro odude ke ntọn̄ọ ntọn̄ọ Bible, owụt kiet ke otu mme akakan n̄kpọ oro Abasi ‘anamde ẹye ke ini mmọ’—oro edi, ndibot Adam ye Eve, akpa eren ye n̄wan emi ẹkedide mfọnmma owo. (Ecclesiastes 3:11) Jehovah Abasi ọkọdọhọ mmọ nte Andibot mmọ ete: “Mbufo ẹtọt, ẹnyụn̄ ẹwak, ẹnyụn̄ ẹyọhọ ke isọn̄, ẹnyụn̄ ẹkan enye: ẹnyụn̄ ẹkara iyak ke akamba mmọn̄, ye inuen ke enyọn̄, ye kpukpru n̄kpọ uwem eke ẹnyọnide ke isọn̄.”—Genesis 1:28.

Abasi akada ikọ emi asian akpa owo iba oro uduak esie. Mmọ ẹkenyene nditọt nnyụn̄ nse mban̄a isọn̄, ẹnam enye akabarede Paradise ofụri ekondo emi mmọ ye nditọ mmọ ẹdụn̄ọde. Abasi ikemekke akpan ini emi mmọ ẹdidude uwem ẹnyụn̄ ẹkpa. Utu ke oro, Abasi ọkọn̄wọn̄ọ ata utịbe utịbe n̄kpọ ọnọ mmọ. Edieke mmọ ẹkpekenamde nnennen ubiere ẹnyụn̄ ẹsọn̄ọ ẹda ẹnam se Abasi amade, mmọ ẹkpekenyene ata emem ye inemesịt ke nsinsi.

 Mmọ ẹkenam idiọk ubiere, ndien emi anam kpukpru owo ẹsọn̄ ẹnyụn̄ ẹkpan̄a. Ke nditịm ntịn̄, Job ete-ekpụk ọkọdọhọ ete: “Owo eke n̄wan amande omụhọ usen, onyụn̄ oyụhọ ukụt.” (Job 14:1) Nso iketịbe?

Bible ọdọhọ ete: “Idiọkn̄kpọ [okoto] owo kiet odụk ke ererimbot, n̄kpa onyụn̄ [oto] ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.” (Rome 5:12) “Owo kiet” oro ekedi Adam, emi okokoide-koi etre ndinam mmemmem ewụhọ Abasi oro ekedide in̄wan̄-in̄wan̄. (Genesis 2:17) Adam ekememek ndiduọk ifet oro enye ekenyenede ndidu uwem ke nsinsi ke Paradise isọn̄. Enye ama anam nditọ esie ẹtaba ọsọn̄urua enọ emi n̄ko, onyụn̄ ayak ubiomikpe idiọkn̄kpọ ye n̄kpa ọnọ mmọ. Eketie nte ke ẹma ẹtaba kpukpru n̄kpọ, edi ndi ẹma ẹtaba?

Ini Ndinam Kpukpru N̄kpọ Ẹdi Mbufa

Ke ediwak tọsịn isua ẹma ẹkebe, ẹma ẹnọ andiwet psalm odudu spirit man ewet ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Man ọsọn̄ọ ke se Abasi ọkọn̄wọn̄ọde ke In̄wan̄ Eden oyosu, Ikọ Abasi etịn̄ se enye edinamde ke mîbịghike ediye ediye ete: “Enye ọyọkwọhọde kpukpru mmọn̄eyet ke enyịn mmọ efep, n̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba. Mme akpa n̄kpọ ẹma ẹbe ẹfep.” Ekem, Abasi ke idem esiemmọ ọdọhọ ete: “Sese! Mmanam kpukpru n̄kpọ ẹdi mbufa.”—Ediyarade 21:4, 5.

Sia ẹmenịm ini ẹnọ kpukpru n̄kpọ, mbụme oro edemerede edi, Ini ewe ke ẹdinam kpukpru n̄kpọ ẹdi mbufa, man mme utịbe utịbe un̄wọn̄ọ Abasi ẹkpesu? Mme Ntiense Jehovah, oro ẹsiode magazine emi, ẹmesịn ukeme ndinam mme owo ẹfiọk ke nnyịn idu ke ini emi Bible okotde “mme akpatre usen” ye nte ke ini emi Abasi edinamde n̄kpọ man “[anam] kpukpru n̄kpọ ẹdi mbufa” emekpere. (2 Timothy 3:1) Imesịn udọn̄ inọ fi ite odụn̄ọde Bible onyụn̄ ekpep aban̄a mme utịbe utịbe n̄kpọ emi ekemede ndinyene ke ini iso. Imonyụn̄ isịn udọn̄ inọ fi ite eyere ikot emi: “Mbufo ẹyom Jehovah, ke ini ẹkemede ndikụt enye, ẹseme ẹkot enye, ke ini enye ekperede.” (Isaiah 55:6) Idịghe akan̄a ebiere uwem fo, utu ke oro, idotenyịn oro enyenede ndidu uwem ke nsinsi esịne fi ke ubọk!

[Se ẹwetde ke ikpọ abisi ke page 8]

“Sese! Mmanam kpukpru n̄kpọ ẹdi mbufa”