Ndikwọrọ Ikọ Nnyụn̄ N̄kpep Mme Owo N̄kpọ ke Africa

Idụt: 57

Ibatowo: 848,582,269

Mme Ntiense Jehovah: 1,122,493

Ukpepn̄kpọ Bible: 2,202,217

KPUKPRU isua, imesikot iban̄a ukeme oro ẹsịnde ndin̄wam mme owo ẹdi ẹdifiọk ẹnyụn̄ ẹma Jehovah Abasi. Nte utom emi okponde ye adan̄a nte enye atarade inyeneke mbiet. Idụhe esop oro ekpekemede ndikpe ediwak miliọn owo ete ẹtan̄a etop ekededi ẹnọ utọ akpakịp owo oro ke ofụri ererimbot. Edi Mme Ntiense Jehovah isiyomke ẹkpe mmimọ okụk ke utom unọ ukpep Bible oro mmọ ẹnamde. Mmọ ẹsinam item oro Jesus ọkọnọde mme mbet esie ke se ikperede ndisịm tọsịn isua iba emi ẹkebede, ete: “Mbufo ẹkebọ ke mfọn, ẹnọ ke mfọn.” (Matthew 10:8) Mme uwụtn̄kpọ oro ẹtienede mi ẹsọn̄ọ emi.

Rwanda Ekpri n̄kaiferi emi edide isua usụkkiet ama okụt ediwak okụk ke ekpri ekpat emi anade ke usụn̄ ke ini enye ọkọnyọn̄de n̄wed. Ubon esie, emi ẹkekpepde Bible ye Mme Ntiense Jehovah, ẹma ẹbiere ndinam se mmọ ẹkekpepde ke Bible. Ntre, mmọ ẹma ẹyom andinyene ẹda ẹsọk. Andinyene ama obụp n̄kaiferi oro ete, “Edieke nnọde fi okụk nte n̄kpọ eyenutom ke ntak emi anamde akpanikọ, nso ke edida inam?”

Eyen oro ama ọbọrọ ete: “Ndida ndep Bible.”

Sia idem akakpade ọbọn̄ oro, enye ama ọdọhọ ete, “N̄kese nte edida idep ọfọn̄ m̀mê ikpaukot sia se afo esịnede ẹnen̄ede ẹkani.” Eyen oro okosụk ọdọhọ ke imọ iyom Bible. Ọbọn̄ oro ama obụp ntak emi ubon oro mîkadaha okụk oro. Ke ama okokop ke mmọ ẹkekpep Bible ye Mme Ntiense Jehovah, enye ama edep Bible iba, ọnọ eyen oro kiet ubon esiemmọ enyene kiet. Enye ama ọdọhọ n̄ko ete Mme Ntiense ẹdi ufọk imọ ẹdikpep Bible ye mmimọ. Ubon mbiba emi ke ẹnam n̄kọri ke ukpepn̄kpọ Bible mmọ.

Madagascar Esenyịn circuit, asan̄autom emi asan̄ade-san̄a emi esikade nsio nsio esop Mme Ntiense Jehovah kpukpru urua man ọkọkwọrọ ikọ ye mmọ, ye n̄wan esie ẹkeka ndise esop ke obio-in̄wan̄. Mmọ ẹma ẹsobo ye mme inọ enan̄ emi ẹkekamade ekụri ye eduat ke usụn̄. Ke ẹma ẹkebọn̄ akam ke ndopuyo ẹyom uko, n̄wan esenyịn circuit oro ama ọnọ mmọ tract oro, Uwem ke Emem Emem Obufa Ererimbot. Enye ama ọdọhọ ete: “Nnyịn idu uwem ke ererimbot ndịk mfịn. Edi Abasi ọyọsọp ndisobo ndiọi owo onyụn̄ ọtọn̄ọ obufa ererimbot emi edide emem emem.” Kiet ke otu iren oro ama enen̄ede akpan̄ utọn̄ onyụn̄ ọbọ tract oro.

Ke isua kiet ama ekebe, eren kiet ama asan̄a ebịne n̄wan esenyịn circuit oro ke itie mbono okobụp m̀mê enye ọfiọk imọ. Enye ama ọdọhọ ke imọ ikedi kiet ke otu inọ oro enye okosobode ke mbatmbat usụn̄ oro ye nte ke imọ ikọbọ tract oro. Ekem enye ama ọdọhọ ete: “Usen oro ikosobode nnyịn ikọnyọn̄ n̄wo. Se eketịn̄de ama anam mi n̄kere  n̄kpọ. Mma n̄kere nte: ‘Nnyịn ikopke ndịk bodisi ye mbonekọn̄ sia imekeme ndifehe mbọhọ mmọ. Edi ndisan̄a didie mbọhọ Abasi edieke enye oyomde ndisobo ndiọi owo?’ Ntre, mma ndọhọ ke nyanam ndụn̄ọde efen efen. Ke mma n̄kesịm ufọk, mma n̄ka n̄kese mbọhọidụn̄ mi oro ekekpepde Bible ye ọkwọrọikọ uyọhọ ini Mme Ntiense Jehovah. Mma nnyịme ndikpep Bible ye enye n̄ko, ndien ami mmọn̄ nna baptism ke mbono emi.”

Mozambique Ke 1992, Madalena, emi ekedide n̄kpọ nte isua 30, ama enyene unọmọ ubomisọn̄ emi akanamde enye akpauben̄. Ke oro ebede, enye ikesiwakke ndiwọrọ ke ufọk. Ke isua ita ẹma ẹkebe, Mme Ntiense ẹma ẹnyene nneme ye ete esie ke an̄wa. Enye ekedi adaiso ido ukpono obio, emi ẹkesisopde idem ke edemesa esie. Ke ini Madalena okokopde nneme emi onyụn̄ okopde nte Mme Ntiense ẹbụpde ẹban̄a enye, enye ama ọdọhọ mmọ ẹdụk ẹdi ufọk. Nte mmọ ẹkenen̄erede ẹnyene udọn̄ ke idem esie ama enen̄ede otụk enye. Enye ama enyịme ukpepn̄kpọ Bible onyụn̄ enen̄ede enyene udọn̄ ke se enye ekekpepde. Sia Mme Ntiense ẹkekụtde ifịk oro enye ekenyenede, mmọ ẹma ẹn̄wam enye ke nsio nsio usụn̄, esịnede edisin̄wam enye aka mbono esop. Emi ama anam enye ekeme ndina baptism ke mmọn̄ ke 2002 ndiwụt ke imayak idem imọ inọ Jehovah.

Nte Mme Ntiense ẹkesede ẹban̄a Madalena ama enen̄ede otụk ete ye eka esie. Eka esie ama ọtọn̄ọ ndidụk mme mbono esop onyụn̄ ọkpọn̄ ido ukpono ebe esie. Ke akpa, ete Madalena ọkọdọhọ ke tutu amama imọ idikpọn̄ke ido ukpono imọ, edi nte ini akakade, enye n̄ko ama ọtọn̄ọ ndidụk mme mbono esop. Mbon emi ẹkesidụkde ido ukpono esie ẹma ẹnyịk enye ẹte etre—ẹte ke enye akam edi etubom mmimọ! Edi enye ama ọsọn̄ọ ada onyụn̄ ọfọp kpukpru n̄kpoduoho utuakibuot esie. Enye ye n̄wan esie ẹma ẹna baptism ke 2007. Ofụri ubon ke ẹsịn ifịk ẹtuak ibuot ẹnọ Jehovah.

Zimbabwe Decibel, emi edide isua usụkkiet, esikwọrọ ikọ ọnọ nsan̄a ubet ukpepn̄kpọ esie ye andikpep mmọ. Usen kiet, Decibel ama okụt ke esịt ikenemke andikpep mmọ, ntre enye ama aka okobụp m̀mê nso inam enye. Andikpep oro ama ọdọhọ enye ke eyen eyeneka imọ akpa. Decibel ama ọdọhọ andikpep oro ke imọ iyada n̄kpọ oro edidọn̄de enye esịt isọk enye. Enye ama ọbọ ete ye eka esie ediye uduot ekpri n̄wed oro Ke Ini Owo Oro Afo Amade Akpade ada aka n̄wed ke ndan̄nsiere. Andikpep ama okot ikpehe ifan̄ ke ediye uduot ekpri n̄wed oro onyụn̄ osio n̄kpo idatesịt. Nte ini akakade, enye ama ewet leta ọnọ ẹsọk ete ye eka Decibel ọkọm mmọ aban̄a ukpep oro mmọ ẹnọde eyen mmọ ye ndọn̄esịt oro Decibel ọkọnọde imọ ke ini oro imọ ikofụhọde.

Ghana Ẹkekpep Abigail, emi okodụn̄de ke usụk usụk Ghana ye ete eka ye eka eka esie emi ẹkesikade Ufọkabasi Presbyterian, ẹte ke Mme Ntiense Jehovah ẹdi mme prọfet nsu. Ke ini enye okokopde ke ete ye eka esie, emi ẹkedụn̄de ke ikpehe en̄wen ke idụt oro ke ẹkpep Bible ye Mme Ntiense Jehovah, emi ama afịna enye, enye onyụn̄ ewet leta ọnọ mmọ man ekpek mmọ ẹtre ukpepn̄kpọ oro. Sia leta emi mîkanamke mmọ ẹtre ukpepn̄kpọ oro, enye ama aka isan̄ emi ekedide kilomita 1,000 man ekenyene nneme ye mmọ. Idem ama akpa Abigail ndikot ke Bible esiemmọ ke hell idịghe ebiet emi ẹsitụhọrede ndiọi owo. Enye ama ọtọn̄ọ ndikpep Bible onyụn̄ odụk mme mbono esop ke Ufọkmbono Obio Ubọn̄ ye ete ye eka esie onyụn̄ ọtọn̄ọ nditiene n̄kwọrọ ikọ. Abigail ama ana baptism ke mbono circuit ndondo emi.