Leta Ireland

Ndinen̄ede Nyom Owo

USEN oro eketie nte nnyịn isitịn̄de mi, mbịtmbịt usen. Iwat akanian̄wan ama aka iso anam mmọn̄ ọyọhọ akrasi iso ubomisọn̄ mi inyụn̄ iyakke n̄kụt usụn̄ ke obio-in̄wan̄. Ke mma n̄kawat kilomita 16, mma nsịm etịn̄e obot emi asakde iso ese Westport, ekpri obio mbeninyan̄ emi odude ke edem usoputịn Ireland. Ke akpatre, utịn ama asiaha eyo onyụn̄ an̄wan̄a, ndien emi ama anam n̄kụt ediwak ndiye isuo emi ẹyọhọde itụn̄ inyan̄ibom oro. Mme owo ẹdụn̄ọ ke ibat ibat, edi mbio obio oro ẹsida ufene mmọ ke ubom ẹka ẹketa mbiet ke ndusụk isuo.

Obot ẹtọn̄ọ ke mbeninyan̄ oro tutu ke edem usoputịn. Utịn uwemeyo anam obot oro etie nte nyayama okpoho ke ntak ikpọ nnyama emi ẹdude do. Mma nda anyan usụn̄ n̄kụt Croagh Patrick (Obot Patrick) emi ebietde ikoso, oro mbio obio ẹkotde Reek. Mma n̄wat ke mme mfafaha efak Westport emi mme owo ẹyọhọde, mbe Reek, nnyụn̄ mbe n̄ka n̄kan̄ emi Mme Ntiense Jehovah mîsiwakke ndika.

Ete oro n̄kakade ndise ikọfiọkke ke ami ke ndi mfịn. N̄kọbọ leta emi ọkọdọhọde ke enye ọkọwọrọ ndondo emi edidụn̄ mi, ndien ke enye oyom ndika iso n̄kpep Bible ye Mme Ntiense Jehovah. Mma n̄kere nte: ‘Enye edi isua ifan̄? Ndi enye ọdọ n̄wan m̀mê idọhọ? Nso ke enye esima?’ Mma nse ekpat mi nnyụn̄ nti ke Bible ye nsio nsio n̄wed ukpep Bible do. Mma n̄kere se nditịn̄de man nnam enye aka iso enyene udọn̄ ke etop Obio Ubọn̄.

Obot Reek okodu ke edem edem. Ufọkitiat eset, emi ẹkebọpde ediwak ke eyo unana ke n̄kpọ nte isua ikie iba emi ẹkebede, ẹma ẹye etieti nte ẹkeyọhọde in̄wan̄ oro n̄kpọ mîdụhe tutu ko ke inyan̄. Inuen inyan̄ kiet ke efe ikpọn̄ ko ifụre ifụre. Nsannsan ko, ediwak eto n̄kukịm emi ẹnụhọde ẹnyụn̄ ẹkọbọde nte n̄kaniren, ẹda ọtọkiet, ofụm onyụn̄ eberi mmọ.

Obio-in̄wan̄ emi inyeneke nọmba ufọk ye enyịn̄ efak. Adres ọbọn̄ oro edi enyịn̄ ufọk esie ye ikpehe obio. * Nte ededi, akpa n̄kpọ oro n̄kaduakde ndinam ekedi ndiyom owo emi edifiọkde ebiet emi kpukpru owo ẹdụn̄de—oro edi, owo emi esidade leta ọsọk mme owo. Ke ufan̄ minit 30, mma n̄kụt post ọfis, ubet kiet do ke anyan ufọk kiet ntem. Ẹma ẹwet idiọn̄ọ emi ẹdian ke usụn̄ “Ẹberi.” Mma n̄ka n̄kobụp ke ufọkurua kiet do ndien ẹma ẹteme mi ikpehe obio oro.

 Ke mma n̄kafiak n̄wat kilomita itiaita, mma n̄kụt n̄kpọ ndida mfiọk usụn̄ ufọk oro n̄koyomde—akwa n̄wọn̄ọde ke ubọk nnasia ye mfafaha usụn̄ ke ubọk ufien. Mma n̄kọn̄ usụn̄ ufọk kiet do. Akanian̄wan kiet ama ọwọrọ edi onyụn̄ asian mi uko uko ke imọ idụn̄ do ke ofụri eyouwem imọ edi ke imenen̄ede iseme ke imọ ifiọkke ebiet emi ete oro nyomde odụn̄de. Enye ama ọdọhọ ke imọ imọn̄ ikot owo ke urụk ukopikọ onyụn̄ ọdọhọ mbe ndụk ufọk.

Nte enye eketịn̄de ikọ, enye ama aka iso ndiyep mi, eyedi ekere owo emi n̄kedide ye se n̄koyomde. Mma n̄kụt ekpri editara mbiet Edisana Mary ke usụn̄ ye akwa ndise Christ ke ibibene. N̄kwa akam odoro ke okpokoro itie utemudia. Man esịt osụhọ enye, mma nsian enye nte, “Enyene akpan etop emi mme owo ẹtobode mi ẹte nditobo enye.”

Ebe esie ama editie ye nnyịn onyụn̄ ọtọn̄ọ ndinọ mi mbụk mban̄a ikpehe oro. N̄wan emi ikenyeneke n̄kpọ ndomokiet ito akpa owo emi enye okokotde onyụn̄ eyịre ete mbet imọ ikot mbon en̄wen. Eketie nte baba owo kiet ikokopke n̄kpọ iban̄a ete oro m̀mê ufọk esie. Mma nse n̄kanika itọn̄ubọk, nnyụn̄ n̄kụt ke ini aka. Mma n̄kụt ke oyom mfiak ndi isan̄ en̄wen. Mma n̄kọm mmọ mbiba ke un̄wam oro mmọ ẹkenọde mi, n̄ka n̄kodụk ubomisọn̄ mi ndaha anyan isan̄ unyọn̄.

Mma mfiak ndi urua en̄wen. Isan̄ enye emi, mma nsobo ye owo emi esidemede leta, enye onyụn̄ eteme mi nnennen ebiet. Ke ufan̄ minit 15 mma nsịm ibiọn̄ usụn̄ oro enye ọkọdọhọde. Mma n̄waha ubọk ufien nnyụn̄ n̄wat ndọdọk nsosụhọde mfafaha efak, ke nyom akani ebọp emi ẹdade itiat ẹbọp, emi edide n̄kpọ en̄wen oro ndidade mfiọk usụn̄. N̄kekwe. Ke akpatre, mma n̄kụt n̄kpọ en̄wen ndida mfiọk usụn̄, ndien mma n̄kụt ufọk oro n̄kabiatde ofụri ini ye ukeme emi nyom nte odorode ke enyọn̄ obot.

Mma nda esisịt ini n̄kere nte ndinemede eti mbụk. Akanieren kiet ama eberede usụn̄. Enye ama ọdọhọ ete, “Idịghe mi, ufọk oro oyomde edi oko ko.” Ama anyan ubọk owụt ufọk emi eto ẹfụkde. Mma nsan̄a ye idotenyịn n̄ka n̄kọkọn̄ usụn̄ ufọk oro. Mma nda ini oro n̄kadade mbet nse Inyan̄ibom Atlantic, emi mîyomke usụn̄. Ofụm ama ọdọdiọn̄ ọsọn̄ ubọk, ndien mbufụt mmọn̄ ẹkedi afia nte mmọ ẹkemiade ke mben ediye anyan esụk oro. Owo ndomokiet ikodụhe ke mbọhọ oro, owo ikonyụn̄ idụhe ke ufọk oro.

Mma mfiak ndi ikaba mbemiso n̄kosobode akparawa kiet. Enye ama ọdọhọ ete, “Ufọk emi afo oyomde edi emi, edi owo emi ekebemde iso odụn̄ mi, ete oro afo oyomde, ama ọwọrọ, ndien mfiọkke ebiet eke enye ọwọrọde okodụn̄.” Mma nsian enye ntak emi n̄kedide nnyụn̄ ndifiọk ke akanam enye inyeneke nneme ye Mme Ntiense Jehovah. Mbon n̄wo ẹma ẹwo enye, enye onyụn̄ ekere ntak emi Abasi akayakde emi ye mme ukwan̄n̄kpọ eken ẹtịbe. Enye ama adat esịt ọbọ nsiondi Enyọn̄-Ukpeme ye Awake! eke ndondo oro emi ẹkenemede n̄kpọ oro.

N̄wed Abasi owụk nnyịn ete isịn ifịk iyom mbon oro ẹnyenede esịt akpanikọ, emi ẹyomde ndifiọk akpanikọ oro odude ke Bible. Inemke mi nditịn̄ ke n̄kekwe ete oro n̄koyomde. Kpa ye oro, ndaha ke ukeme oro n̄kesịnde akatatak. Ediwak owo ẹnyene ọkpọsọn̄ udọn̄ ke Ireland ndikop etop Obio Ubọn̄, ndien Jehovah ekeme ndinam ekpri etop oro ẹkenọde akparawa oro anam enye ọbọ akpanikọ.

[Mme Ikọ Idakisọn̄]