Ntak Ition Oro Ikpeten̄ede Abasi Idịghe Owo

IDEM ama akpa akparawa oro. Enye ikodorike enyịn iban̄a se iketịbede. Se Ntiense Jehovah iba ẹkenemede ye enye ama ekpep enye n̄kpọ. Ntak emi Abasi ayakde idiọkido odu ama afịna enye ke ediwak isua, edi idahaemi ẹma ẹda Bible ẹbọrọ mbụme oro ediye ediye. Enye ikọfiọkke ke Bible ọdọn̄ọ ekese nti n̄kpọ ntre.

Esisịt ini ke isenowo oro ẹma ẹkenyọn̄ọ, mma enyeneufọk ama ebe odụk ubet esie odudu odudu onyụn̄ obụp ete, “Isenowo oro ẹkedi mmanie?”

Sia emi akakpade akparawa oro idem, enye ikọbọrọke n̄kpọ ndomokiet.

Mma oro ama ofiori ete, “Mmọfiọk mmọ, ndien edieke ayakde mmọ ẹfiak ẹdụk ubet fo, ọyọwọrọ okoyom ufọk ke ebiet en̄wen!”

Enye ama ọtọ usụn̄ eberi ke iyatesịt ọwọrọ.

Ata Mme Anditiene Christ Ẹfiọk ke Ẹyekọbọ Mmimọ

Se ikọwọrọde akparawa emi idịghe esen n̄kpọ. Ikọ Abasi, kpa Bible, ọdọhọ ete: “Kpukpru owo eke ẹyomde ndidu uwem uten̄e Abasi ke ebuana ye Christ Jesus ẹyesobo ukọbọ n̄ko.” (2 Timothy 3:12) Owo iwakke ndima ata mme Christian, akanam owo inyụn̄ iwakke ndima mmọ. Ntak-a? Apostle John akasian mme Christian ete: “Nnyịn imọfiọk ite nnyịn itọn̄ọ ito Abasi, edi ofụri ererimbot esịne ke idak odudu andidiọk.” Ẹdọhọ n̄ko ke Satan kpa Devil “oyoyo asan̄a nte ekpe eke okụnide, oyom owo eke enye editade.” (1 John 5:19; 1 Peter 5:8) Uten̄e  owo edi kiet ke otu akakan n̄kpọekọn̄ Satan.

Akamedi Jesus Christ, emi akanamde ata ekese nti n̄kpọ, emi mîkonyụn̄ inamke baba idiọkn̄kpọ kiet, ẹma ẹsak ẹnyụn̄ ẹkọbọ enye. Enye ọkọdọhọ ete: “Mmọ ẹsua mi ke unana ntak.” (John 15:25) Ke okoneyo oro ekesierede usen oro enye akakpade, enye ama ada ikọ emi etịm mme mbet esie idem: “Edieke ererimbot asuade mbufo, mbufo ẹmefiọk ẹte enye ama asua mi mbemiso asuade mbufo. Ẹti ikọ oro n̄kọdọhọde mbufo nte, Ofụn ikponke ikan eteufọk esie. Edieke mmọ ẹkekọbọde mi, mmọ ẹyekọbọ mbufo n̄ko.”—John 15:18, 20.

Emi ama anam ediwak owo ẹmen̄e ndidụk ido ukpono akpanikọ. Bible etịn̄ ntem aban̄a mbon oro ẹkeyomde Jesus isan̄ kiet ete: “Ke akpanikọ, baba owo kiet itịn̄ke ikọ iban̄a enye an̄wan̄wa ke ntak ẹkopde ndịk ẹban̄a mme Jew.” (John 7:13; 12:42) Mme adaiso ido ukpono ini oro ẹkesidọhọ ke iyebịn mbon oro ẹbuọtde idem ke Christ ision̄o ke synagogue. Ntem, uten̄e owo ikayakke ediwak owo ẹkabade ẹdi mme Christian.—Utom 5:13.

Nte ini akakade, ke ẹma ẹketọn̄ọ Ido Ukpono Christ, N̄wed Abasi etịn̄ aban̄a “akwa ukọbọ” emi ẹkekọbọde esop ke Jerusalem. (Utom 8:1) Ke nditịm ntịn̄, ẹma ẹsua mme Christian ke ofụri Obio Ukara Rome. Mme ọwọrọiso owo ke Rome ẹkedọhọ apostle Paul ẹte: “Amaedi n̄ka emi nnyịn imọfiọk ite ẹtịn̄ n̄kpọ ẹdian enye ke kpukpru ebiet.” (Utom 28:22) Ih, ẹma ẹbiọn̄ọ ata mme Christian ke kpukpru ebiet.

Idem mfịn emi, Satan osụk adada uten̄e owo ọbiọn̄ọ ediwak owo ndikabade ndi ata mme anditiene Christ. Mbon oro ẹnyenede esịt akpanikọ, emi ẹkpepde Bible ye Mme Ntiense Jehovah ẹsobo ubiọn̄ọ m̀mê nsahi ke ufọkn̄wed, itieutom, ke mbọhọ mmọ, m̀mê ke otu mme ufan mmọ. Mmọ ẹkeme ndikop ndịk nditaba uku, mme ufan, m̀mê se ẹkesinọde mmọ. Ke ndusụk obio-in̄wan̄, mme ọtọin̄wan̄ ẹsikop ndịk ke mme mbọhọidụn̄ idin̄wamke mmimọ idọk n̄kpọ m̀mê ikpeme ufene mmimọ. Edi kpa ye utọ ndịk oro, ata ediwak owo ẹmebiere ndiberi edem ke Abasi nnyụn̄ ndu uwem ekekem ye Ikọ Abasi, nte Jesus Christ okodude. Jehovah ọmọdiọn̄ mmọ sia ẹnamde emi.

Ntak Emi Ikpeten̄ede Abasi, Idịghe Owo

Bible eteme nnyịn ete iten̄e Abasi, idịghe owo. Enye ọdọhọ ete: “Uten̄e Jehovah edi editọn̄ọ ifiọk.” (Psalm 111:10) Uten̄e emi idịghe editen̄e owo enyịn, edi edi mbak emi mîyakke inam se Ọnọ-Uwem mîmaha. Enye enyene ebuana ye ima. Edi ntak emi nnyịn ikpeten̄ede Abasi, idịghe owo? Ẹyak ineme ntak ition.

1 Jehovah edi Ata Ọkpọsọn̄. Jehovah enen̄ede enyene odudu akan owo ekededi. Edieke iten̄ede Enye, nnyịn ida ye Ata Ọkpọsọn̄, emi “mme idụt [ebietde enye] ntọi mmọn̄ ke aban̄.” (Isaiah 40:15) Sia Abasi edide Ata Ọkpọsọn̄, enye enyene odudu ndikan “n̄kpọ ekọn̄ [ekededi] eke ẹbotde ẹban̄a” mbon oro ẹsọn̄ọde ẹda ye enye. (Isaiah 54:17) Ndien sia edide enye edibiere owo emi odotde ndidu nsinsi uwem, ọfọn ikûyak baba n̄kpọ kiet akpan nnyịn ndikpep n̄kpọ mban̄a enye nnyụn̄ nnam uduak esie.—Ediyarade 14:6, 7.

2 Abasi ayan̄wam onyụn̄ ekpeme nnyịn. Bible ọdọhọ ke Mme N̄ke 29:25 ete: “Uten̄e owo ọkọk afia enịm: edi ẹda owo eke ọbuọtde idem esie ye Jehovah ẹmenede enye ẹnịm ke enyọn̄.” Uten̄e owo edi afia koro enye ekeme ndinam nnyịn ifehe ndinyene mbuọtidem ke Abasi. Abasi ọn̄wọn̄ọ ọnọ nnyịn ke iyanyan̄a nnyịn, ete: “Kûdịghe, koro ami ndude ye afo: kûnyek idem, koro ami ndide Abasi fo: nyọsọn̄ọ fi idem; nditreke ndinyan̄a fi; nditreke ndimụm fi n̄kama ke edinen ubọk nnasia mi.”—Isaiah 41:10.

3 Abasi ama mbon oro ẹsan̄ade ẹkpere enye. Apostle Paul ekewet ikọ emi otụkde owo mi ete: “Mmenịm ke akpanikọ nte n̄kpa m̀mê uwem m̀mê mme angel m̀mê mme ukara m̀mê mme n̄kpọ eke ẹdude ke emi m̀mê mme n̄kpọ eke ẹdidide m̀mê mme odudu m̀mê uniọn̄ m̀mê utụn̄ọ m̀mê edibotn̄kpọ efen ekededi idikemeke ndidianade nnyịn ke ima  Abasi oro odude ke Christ Jesus Ọbọn̄ nnyịn.” (Rome 8:37-39) Edieke ikpepde ndibuọt idem ye Abasi nnyụn̄ n̄kop uyo esie, Andikara Ekondo ekeme ndima nnyịn ke nsinsi. Nso akwa ukpono ke emi edi ntem!

4 Nnyịn imowụt esịtekọm iban̄a kpukpru se Abasi anamde ọnọ nnyịn. Jehovah edi Andibot nnyịn, enye emi anamde nnyịn inyene uwem. Ke adianade do, enye ọnọ nnyịn mme n̄kpọ udu uwem ye mme n̄kpọ oro ẹnamde nnyịn ikop inem uwem. Ke akpanikọ, kpukpru nti enọ ẹto enye. (James 1:17) David, anam-akpanikọ, emi okowụtde esịtekọm aban̄a mfọnido Abasi, ekewet ete: “Afo, O Jehovah Abasi mi, amanam utịbe ido fo, ye ekikere fo eke ekerede nnyịn, ẹwak . . . mmoyom ndisiak nnyụn̄ mbụk mmọ, edi mmọ ẹkan nte ẹbatde.”—Psalm 40:5.

5 Ndusụk mbon oro ẹbiọn̄ọde nnyịn ẹkeme ndikpụhọde. Emekeme ndin̄wam mbon oro ẹbiọn̄ọde fi edieke mûyakke idem unọ ubiọn̄ọ edi ọsọn̄ọ ada eten̄e onyụn̄ ama Abasi. Kere ban̄a iman Jesus. Ke akpa, mmọ ikọbuọtke idem ye enye, edi ẹkedọhọ ẹte: “Ibuot ọbọhọ enye.” (Mark 3:21; John 7:5) Ekem, ke Jesus ama akakpa onyụn̄ eset, ediwak mmọ ẹma ẹnịm ke akpanikọ. James ye Jude nditọeka Jesus ẹma ẹkam ẹtiene ẹwet N̄wed Abasi. Saul emi ekedide idat idat andikọbọ ama akam akabade edi apostle Paul. Ndusụk owo oro ẹnọde nnyịn mfịna idahaemi ẹkeme ndidi ndikụt ke nnyịn inen̄ede idi mme anditiene Jesus Christ ke ntak emi inyenede uko isọn̄ọ ida.—1 Timothy 1:13.

Ke uwụtn̄kpọ, Aberash, n̄wan kiet mi ke Africa ama esibọn̄ akam oyom ndinen̄ede mfiọk Abasi. Ke enye ama ọkọtọn̄ọ ndikpep Bible ye Mme Ntiense Jehovah, mbonubon esie ye mme adaiso ido ukpono mmọ ẹma ẹnen̄ede ẹkọbọ enye. Ndusụk iman esie, emi ẹketọn̄ọde ndikpep Bible n̄ko, ẹma ẹtre ke ntak uten̄e owo. Edi Aberash ama ekpe Abasi ubọk ete ọnọ imọ odudu ye uko, ndien enye ama ana baptism nte kiet ke otu Mme Ntiense Jehovah. Nso ikedi utịp? Iman esie itiaita ẹma ẹkpebe uko esie ẹfiak ẹtọn̄ọ ndikpep Bible, ndien ke ẹnam n̄kọri etieti.

Afo Emekeme Ndikan Uten̄e Owo

Edieke mûyomke ndiduọ ke afia uten̄e owo, nam ofụri se ekekeme man enen̄ede ama Abasi. Emekeme ndinam emi ke ndikpep Bible nnyụn̄ ntie n̄kere mme utọ itie N̄wed Abasi nte Mme Hebrew 13:6, emi ọdọhọde ete: “Jehovah edi andin̄wam mi; ndifeheke ndịk. Nso ke owo ekeme ndinam mi?” Kûdedei ufre mme ntak emi ẹwụtde ke nditen̄e Abasi idịghe nditen̄e owo edi edinen ye n̄kpọ oro owụtde eti ibuot ndinam.

Ti n̄ko ekese ufọn oro ọbọde ke ndida se ekpepde ke Bible nsịn ke edinam. Afo emekeme ndinyene ibọrọ mme akpan mbụme oro ẹban̄ade uwem. Emekeme ndinyene eti ibuot ndida n̄kọk mme mfịna uwem. Emekeme ndinyene utịbe utịbe idotenyịn kpa ye mme idaha oro ẹyon̄de owo ibuot mfịn. Omonyụn̄ ekeme ndibọn̄ akam nnọ Ata Ọkpọsọn̄ Abasi ini ekededi.

Apostle John ekewet ete: “Ererimbot ke ebebe efep kpasụk ntre n̄ko ye mbumek esie, edi owo eke anamde uduak Abasi ododu ke nsinsi.” (1 John 2:17) Idahaemi edi ini ndisọn̄ọ nda nsan̄a ke uten̄e Abasi. Utu ke ndiduọ ke afia editen̄e owo enyịn, afo emekeme ndinam item emi Abasi ọnọde ete: “Eyen mi, nyene ibuot, nyụn̄ dat mi esịt, man n̄kụt se ndibọrọde owo eke osụn̄ide mi.” (Mme N̄ke 27:11) Nso akwa ifet ke oro edi ntem!

Ti ete ke baba owo kiet ikemeke ndinọ fi se Abasi edinọde mbon oro ẹten̄ede enye, oro edi: “Utịp nsụkesịt ye eke uten̄e Jehovah edi inyene, ye ukpono, ye uwem.”—Mme N̄ke 22:4.

[Ndise ke page 14]

Iman Aberash itiaita ẹka iso ndikpep Bible ke ntak uko esie