Edimana Obufa Nso ke Enye Anam?

NTAK emi Jesus ọkọdọhọde “amana oto . . . spirit” ke ini enye eketịn̄de aban̄a edina baptism ke edisana spirit? (John 3:5) Ke ini ẹdade ikọ oro “emana” ẹtịn̄ ikọ ke ndamban̄a usụn̄, enye esiwọrọ “ntọn̄ọ.” Ntem, ikọ oro ‘edimana obufa’ owụt “editọn̄ọ obufa.” Ke ntre, ndamban̄a ikọ oro ‘mana’ ye ‘edimana obufa’ owụt ke itie ebuana ọyọtọn̄ọ obufa ke ufọt Abasi ye mbon oro ẹnade baptism ke edisana spirit. Edikpụhọ itie ebuana ntre ofụri ofụri asan̄a didie ada itie?

Ke ini apostle Paul eketịn̄de nte Abasi etịmde mme owo idem ọnọ ukara eke heaven, enye akada uwụtn̄kpọ oro aban̄ade uwem ubon. Enye ekewet mme Christian ke eyo esie ete ke mmọ ẹyebọ ‘itie nditọ ẹnyene’ ndien ke ntre ke Abasi ekenyene ndinam n̄kpọ ye mmọ “nte nditọ.” (Galatia 4:5; Mme Hebrew 12:7) Man okụt nte uwụtn̄kpọ edida itie nditọ nnyene anamde ẹfiọk orụk ukpụhọde oro adade itie ke ini owo anade baptism ke edisana spirit, fiak kere ban̄a akparawa oro okoyomde ndika n̄wed ke ufọkn̄wed oro enyenede nditọ ufọkn̄wed oro ẹdide mme amanaisọn̄ kpọt.

Ukpụhọde Oro Otode Edida Nnyene nte Nditọ

Ke uwụtn̄kpọ oro, akparawa oro ikemeke ndika n̄wed ke ufọkn̄wed oro sia enye mîdịghe amanaisọn̄. Idahaemi, kere nte ẹnamde akamba ukpụhọde usen kiet. Ete kiet emi edide amanaisọn̄ ada enye enyene nte eyen. Didie ke emi otụk akparawa oro? Ke ntak emi ẹdade enye ẹnyene nte eyen, idahaemi enye ekeme ndinyene unen oro mme amanaisọn̄ n̄kparawa eken ẹnyenede—emi onyụn̄ esịne unen edika n̄wed ke ufọkn̄wed oro. Edida enye nnyene omokpụhọde kpukpru se enye ekemede ndinam.

Emi owụt se itịbede ke ata akamba udomo inọ mbon oro ẹmanade obufa. Kere ban̄a ndusụk n̄kpọ oro ẹdide ukem. Ẹdida akparawa oro ke ufọkn̄wed oro edieke enye esịmde se ẹyomde man ẹda owo—oro edi, edieke enye edide amanaisọn̄. Edi enye ikemeke ndidot ke idem esiemmọ. Kpasụk ntre, ẹyenọ ndusụk owo ifet ndikara ke Obio Ubọn̄ Abasi, m̀mê ke ukara eke heaven edieke mmọ ẹsịmde mme n̄kpọ oro ẹyomde—oro edi, ‘nditọn̄ọ ntak mmana.’ Edi mmọ ikemeke ndisịm se ẹyomde oro ke idemmọ sia edi Abasi esinam owo amana obufa.

Nso ikanam idaha akparawa oro okpụhọde? Edida enye nnyene nte odotde. Edi emi  ikpụhọkede obot akparawa oro. Ke ẹma ẹkeda enye ẹnyene, enye osụk edi owo oro enye ekedide. Kpa ye oro, ke ẹma ẹkeda enye ẹnyene nte odotde, akparawa oro enyene obufa idaha. Ke nditịm ntịn̄, enye enyene obufa ntọn̄ọ—amana obufa, yak idọhọ ntre. Enye akabade eyen owo emi ọnọde enye unen ndika n̄wed ke ufọkn̄wed oro onyụn̄ akabade owo ubon oro.

Kpasụk ntre, Jehovah okpụhọde idaha otu mme anana-mfọnmma owo ebe ke ndinam mme n̄kpọ oro ẹdotde man ada mmọ enyene nte nditọ. Apostle Paul, emi esịnede ke otu oro, ekewet ntem ọnọ mme Christian eken: “Mbufo ẹkebọ spirit emi anamde nnyịn idi nditọ, onyụn̄ oto ke spirit emi nnyịn ifiori ite: ‘Abba, Ete!’ Spirit ke idemesie etiene spirit nnyịn etie ntiense ete nnyịn idi nditọ Abasi.” (Rome 8:15, 16) Ih, ke ntak emi ẹdade mme Christian oro ẹnyene nte nditọ, mmọ ẹmekabade ẹdi mbonubon Abasi, m̀mê “nditọ Abasi.”—1 John 3:1; 2 Corinth 6:18.

Edi Abasi ndida mmọ nnyene nte nditọ ikokpụhọke obot mmọ, koro mmọ ẹsụk ẹdi mme anana-mfọnmma owo. (1 John 1:8) Edi, nte Paul akakade iso etịn̄, ke ẹma ẹkenam kpukpru n̄kpọ oro ẹyomde man ẹda mmọ ẹnyene nte odotde, mmọ ẹnyene obufa idaha. Ke ukem ini oro, spirit Abasi anam mbon oro ẹdade ẹnyene nte nditọ do ẹnen̄ede ẹnịm ke mmimọ ididu ye Christ ke heaven. (1 John 3:2) Ọkpọsọn̄ mbuọtidem oro edisana spirit anamde mmọ ẹnyene do anam mmọ ẹnyene isio isio idotenyịn kaban̄a uwem. (2 Corinth 1:21, 22) Ih, mmọ ẹnyene obufa ntọn̄ọ—ẹmana obufa, yak idọhọ ntre.

Bible etịn̄ ntem aban̄a nditọ oro Abasi adade enyene: “Mmọ ẹyedi mme oku Abasi ye Christ, ẹyenyụn̄ ẹkara nte ndidem ye enye ke isua tọsịn kiet.” (Ediyarade 20:6) Ẹyenam nditọ oro Abasi adade enyene ẹtiene Christ ẹdi ndidem ke Obio Ubọn̄ Abasi, m̀mê ukara eke heaven. Apostle Peter ama asian mme Christian eken ete ke mmọ ẹyebọ “inyene udeme eke mîkemeke ndibiara mînyụn̄ isabakede mînyụn̄ ikemeke ndibe mfep” oro ‘ẹnịmde ke heaven’ ẹnọ mmọ. (1 Peter 1:3, 4) Nso ọsọn̄urua inyene ke emi edi ntem!

Edi n̄kpọ emi aban̄ade ukara mi edemerede mbụme n̄ko. Edieke mbon oro ẹtọn̄ọde ntak ẹmana ẹdikarade nte ndidem ke heaven, mmọ ẹdikara mmanie? Ẹyebọrọ mbụme oro ke ibuotikọ oro etienede.

[Ndise ke page 10]

Nso ke Paul eketịn̄ aban̄a edida owo nnyene nte eyen?