Ibat Ibat Owo Ẹkara, Ediwak Owo Ẹbọ Ufọn

ABASI ememek ibat ibat mme anam-akpanikọ Christian ke otu ubonowo toto ke eyo mme apostle onyụn̄ ada mmọ enyene nte nditọ. Idaha nditọ oro ẹdade ẹnyene mi enen̄ede okpụhọde tutu Ikọ Abasi okot enye edimana obufa. Uduak edimana obufa oro edi man ẹtịm mme asan̄autom Abasi oro ẹtọn̄ọde ntak ẹmana do, idem, man ẹkekara ke heaven. (2 Timothy 2:12) Ẹnam mmọ ẹset ke n̄kpa ẹka heaven man ẹdot ndidi mme andikara. (Rome 6:3-5) Ke ini ẹdude ke heaven, “mmọ ẹyekara isọn̄ nte ndidem” ye Christ.—Ediyarade 5:10; 11:15.

Edi Ikọ Abasi ọdọhọ n̄ko ke mbon oro mîtọn̄ọke ntak imana ẹyetiene ẹnyene nsinsi edinyan̄a. Ẹtịn̄ ke Bible (ke N̄wed Abasi Usem Hebrew ye ke N̄wed Abasi Christian Usem Greek) ke Abasi aduak ndinyan̄a otu iba—oro edi,  ekpri otu mme andikara emi ẹdidụn̄de ke heaven ye akwa otu mme andidu ke idak ukara oro emi ẹdidụn̄de ke isọn̄. Ke uwụtn̄kpọ, kop se apostle John ekewetde ọnọ mme Christian eken oro ẹkemanade obufa. Enye eketịn̄ ntem aban̄a Jesus: “Enye . . . edi uwa usio-isop mme idiọkn̄kpọ nnyịn, edi idịghe eke nnyịn ikpọn̄ [ekpri otu], edi edi eke ofụri ererimbot [akwa otuowo] n̄ko.”—1 John 2:2.

Apostle Paul ekewet kpasụk ntre ete: “Edibotn̄kpọ [akwa otuowo] etie ye ọkpọsọn̄ idotenyịn ebet ini eke ẹdiyararede nditọ Abasi [ekpri otu].” (Rome 8:19-21) Didie ke ikọ apostle John ye Paul oro ẹkpen̄wan̄a nnyịn? Ẹkpen̄wan̄a ntem: Mbon oro ẹtọn̄ọde ntak ẹmana ẹyetiene ẹkara ke heaven. Kaban̄a nso? Man ẹkpediọn̄ anana-ibat owo, emi ẹdidụn̄de ke idak ukara Abasi ke isọn̄. Mmọdo, Jesus ekekpep mme mbet esie ete ẹbọn̄ akam ẹte: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.”—Matthew 6:10.

N̄wed Abasi Usem Hebrew n̄ko etịn̄ ke ẹdinyan̄a otu iba. Ke uwụtn̄kpọ, kop se Jehovah akasiande Abraham, ete ete Jesus, ete: “Kpukpru mme idụt isọn̄ [akwa otuowo] ẹyebọ edidiọn̄ eke otode mfri fo [ekpri otu].” (Genesis 22:18, NW) Oro ọwọrọ ke ẹkenyene ndida “mfri” Abraham ndiọn̄ kpukpru mme idụt.

Anie edi “mfri” oro”? Jesus Christ, ọkọrọ ye mbon oro ẹmanade obufa, kpa nditọ oro Abasi adade enyene. Apostle Paul ọkọdọhọ ete: “Edieke mbufo ẹdide eke Christ, mbufo ke akpanikọ ẹdi mfri Abraham.” (Galatia 3:16, 29) Ndien nso idi mme edidiọn̄ oro mme owo ke kpukpru idụt ẹdibọde ke ntak “mfri” oro? Akwa ifet ndinyene eti idaha ke iso Abasi ye ndidu nsinsi uwem ke Paradise isọn̄. David andiwet psalm ama etịn̄ prọfesi ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29; Isaiah 45:18; Ediyarade 21:1-5.

Ke akpanikọ, ẹmek ibat ibat owo ẹnọ ukara eke heaven, edi mme ufọn ukara eke heaven oro—kpa nsinsi uwem ke isọn̄ ye kpukpru edidiọn̄ emi enye edidade idi—ẹnyene ediwak owo. Afo ye ubon fo ẹkpekam ẹsịne ke otu mbon oro ẹdibọde mme nsinsi edidiọn̄ oro Obio Ubọn̄ Abasi edinọde.

[Ndise ke page 12]

Ẹyenọ anana-ibat owo nsinsi uwem ke isọn̄. Nte afo eyesịne ke otu mmọ?