Obio Ukara Pope Odomo Nditre Mme Owo Ndikot Enyịn̄ Abasi

MME akama ukara Ufọkabasi Catholic ke ẹdomo nditre mme owo ndikot enyịn̄ Abasi ke ini edinam ufọkabasi mmọ. Isua oko, Esop Obio Ukara Pope Oro Esede Aban̄a Utuakibuot Abasi ye Ndutịm Edinam Ido Ukpono ama ọnọ item oro aban̄ade editre ndikot enyịn̄ Abasi ẹsọk otu mme bishop Catholic ke ofụri ererimbot. Pope “eketeme” ete ẹwet item emi.

Item oro ẹkewetde ke June 29, 2008 mi, ọdọhọ ke kpa ye oro ẹkekpande, “ke mme isua ndondo emi, mme owo ẹmetọn̄ọ sụn̄sụn̄ ndikot ata enyịn̄ Abasi Israel, emi ẹdiọn̄ọde nte edisana tetragrammation, oro ẹwetde ke anana-uyo abisi usem Hebrew inan̄ ntem יהוה, YHWH.” N̄wed item oro ọdọhọ ke ẹwet enyịn̄ Abasi ke nsio nsio usụn̄ nte “Yahweh,” “Yahwè,” “Jahweh,” “Jahwè,” “Jave,” “Yehovah,” ye ntre ntre. * Edi item oro Obio Ukara Pope ọkọnọde oyom ẹfiak ẹkenam nte Catholic ekesinamde ke akpa. Oro ọwọrọ ke ẹdiwet “Ọbọn̄” ke itie abisi Hebrew inan̄ oro ẹdade ẹnọ enyịn̄ Abasi. Akan oro, “owo inyeneke ndisiak m̀mê ndikot” enyịn̄ Abasi oro “YHWH” ke mme edinam, ikwọ, ye akam Ufọkabasi Catholic.

N̄wed item Obio Ukara Pope oro asiak “ido eset” Ufọkabasi Catholic man ọsọn̄ọ se ẹtịn̄de emi. N̄wed item oro ọdọhọ ke akam edi Septuagint, N̄wed Abasi Usem Hebrew oro ẹkekabarede ẹsịn ke usem Greek, emi ẹkekabarede mbemiso eyo mme Christian, ke ẹkewet enyịn̄ Abasi nte Kyʹri·os, ikọ Greek oro ọwọrọde “Ọbọn̄.” Ntem, n̄wed item oro ọdọhọ ke “toto ke ntọn̄ọ, ke mme Christian n̄ko ikesikotke enyịn̄ Abasi oro tetragrammaton.” Edi item emi idọn̄ke enyịn ke uyarade oro owụtde ke se ẹtịn̄de inenke. Owo ikewetke Kyʹri·os ke mme akpasarade nsiondi Septuagint, edi ẹkewet enyịn̄ Abasi ntem יהוה. Mme anditiene Christ ke n̄kpọ nte isua tọsịn iba emi ẹkebede ẹma ẹfiọk ẹnyụn̄ ẹsikot enyịn̄ Abasi. Jesus ke idem esiemmọ ọkọdọhọ ntem ke akam oro enye ọkọbọn̄de ọnọ Ete esie, ete: “Ami mmonyụn̄ nnam mmọ ẹfiọk enyịn̄ fo.” (John 17:26) Ndien ke akam uwụtn̄kpọ esie oro ẹtịmde ẹdiọn̄ọ, Jesus ekekpep nnyịn ete ibọn̄ akam ntem: “Ete nnyịn emi odude ke heaven, yak ẹnam enyịn̄ fo asana.”—Matthew 6:9.

Akpana ọdọn̄ kpukpru mme Christian ndikụt ke ẹnam enyịn̄ Abasi asana. Obio Ukara Pope ndisịn ukeme nditre mme owo ndikot enyịn̄ Jehovah, esuene enye Jehovah emi ọkọdọhọde ete: “Emi edi enyịn̄ mi ke nsinsi; enyịn̄ emi ke ẹdikot mi ke kpukpru emana.”—Exodus 3:15, The Jerusalem Bible.

[Ikọ Idakisọn̄]

[Se ẹwetde ke ikpọ abisi ke page 30]

“Emi edi enyịn̄ mi ke nsinsi.”—Exodus 3:15, JB

[Ndise ke page 30]

Ubak “Septuagint” emi ẹkekabarede ke n̄kpọ nte tọsịn isua iba emi ẹkebede. Ẹwet ekara ẹsịn enyịn̄ Abasi oro ẹkewetde ke abisi usem Hebrew inan̄, emi ẹwakde ndisio n̄wet YHWH

[Ebiet Ẹdade Ndise Ẹto]

Ẹbọ ẹto Egypt Exploration Society