2 Nyene Nnennen Ifiọk Abasi

“Nsinsi uwem ọwọrọ mmọ ndinyene ifiọk mban̄a fi, ata Abasi kierakiet.”—John 17:3.

NSO IDI MFỊNA? Ndusụk owo ẹdọhọ ke Abasi idụhe. Ndusụk owo ẹnịm ke Abasi idịghe ata owo, edi ke edi akaka odudu. Mbon oro ẹnịmde ke enye edi ata owo ẹkpep nsio nsio ukpepn̄kpọ ẹban̄a owo emi enye edide ye mme edu esie.

DIDIE KE AFO EKEME NDIKAN MFỊNA EMI? Usụn̄ kiet ndinyene ifiọk Abasi edi ndise mme n̄kpọ oro enye okobotde. Apostle Paul ọkọdọhọ ete: “Tọn̄ọ nte ẹkebot ererimbot, ẹtịm ẹkụt mme edu [Abasi] oro enyịn mîkwe, oro edi, nsinsi odudu esie ye idaha esie nte Abasi, koro ẹkụt mmọ ebe ke mme n̄kpọ oro ẹnamde.” (Rome 1:20) Edieke etịn̄de enyịn ese mme n̄kpọ-obot, afo emekeme ndikpep ekese mban̄a ifiọk ye odudu Andibot nnyịn.—Psalm 104:24; Isaiah 40:26.

 Edi, man inen̄ede ifiọk edu Abasi, nnyịn owo kiet kiet inyene ndikot Ikọ esie, kpa Bible, nnyụn̄ ndụn̄ọde enye. Kûyak mbon en̄wen ẹbiere nte afo ekpekerede n̄kpọ. Utu ke oro, nam item Bible emi: “[Ẹkûbiet] editịm n̄kpọ emi, edi ẹkpụhọde oto ke edinam ekikere mbufo edi obufa, man mbufo ẹkpedomo ẹfiọk uduak Abasi eke edide eti onyụn̄ enemde enye esịt onyụn̄ ọfọnde ama.” (Rome 12:2) Ke uwụtn̄kpọ, kere ban̄a mme n̄kpọ oro ẹtienede mi, oro Bible ayararede aban̄a Abasi.

Abasi enyene ọkpọkpọ enyịn̄. Ọkpọkpọ enyịn̄ Abasi ama odu ediwak tọsịn itie ke akpasarade Bible. Ke ediwak edikabade, enye esịne ke Psalm 83:18, emi ọdọhọde ete: “Ndien owo ẹyefiọk ẹte ke afo emi enyịn̄ fo ikpọn̄ ekerede Jehovah, edi Ata Edikon̄ ke ofụri ererimbot.”

Edinam mme owo esitụk Jehovah Abasi. Ke Jehovah ama akafak nditọ Israel osio ke itie ufụn ke Egypt, mmọ ẹma ẹsifụmi ọniọn̄ ọniọn̄ item esie ndusụk ini. Uwem nsọn̄ibuot mmọ ama ‘ayat enye esịt.’ Mme edinam mmọ ẹma “ẹsuene Edisana Abasi Israel.”—Psalm 78:40, 41.

Jehovah ekere aban̄a nnyịn owo kiet kiet. Jesus ọkọdọhọ mme mbet esie ete: “Nte owo inyamke akadan̄abasi iba ke ekpri okudọk? Edi baba kiet ke otu mmọ iduọhọ ke isọn̄ ke Ete mbufo mîfiọkke. Edi ẹbat kpa kpukpru idet ibuot mbufo. Ke ntre ẹkûfehe ndịk: Mbufo ẹmesọn̄ urua ẹkan ediwak akadan̄abasi.”—Matthew 10:29-31.

Abasi imaha orụk m̀mê ekpụk kiet ikan en̄wen. Apostle Paul akasian mbon Greece ke Athens ete ke Abasi “ama anam kpukpru idụt ubonowo ẹwọn̄ọ ẹto owo kiet, ẹdidụn̄ ke ofụri iso isọn̄.” Enye ama ọdọhọ n̄ko ete ke Abasi “[iyomke] usụn̄ ikpọn̄ owo nnyịn kiet kiet.” (Utom 17:26, 27) Apostle Peter ọkọdọhọ ete: “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—Utom 10:34, 35.

NSO IDI UTỊP? Ndusụk owo “ẹnyene ifịk ẹban̄a Abasi; edi emi isan̄ake ikekem ye nnennen ifiọk.” (Rome 10:2) Edieke afo ọfiọkde se Bible enen̄erede ekpep aban̄a Abasi, owo iditụnke fi usụn̄, ndien afo eyekeme ‘ndisan̄a n̄kpere Abasi.’—James 4:8.

Edieke oyomde ntọt efen efen, se ibuot 1, “Nso Idi Akpanikọ Aban̄ade Abasi?,” ke n̄wed oro Nso ke Bible Enen̄ede Ekpep? *

[Ikọ Idakisọn̄]

[Ndise ke page 6]

Usụn̄ kiet ndifiọk Abasi edi ndise mme n̄kpọ oro enye okobotde