3 Kpep Akpanikọ Oro Aban̄ade Jesus

“Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” —John 3:16.

NSO IDI MFỊNA? Ndusụk owo ẹdọhọ ke Jesus ikodụhe. Mbon en̄wen ẹnịm ke enye ama odu, edi ẹsọn̄ọ ẹdọhọ ke enye ekedi owo nte nnyịn emi akakpade anyan ini ko.

DIDIE KE AFO EKEME NDIKAN MFỊNA EMI? Kpebe Nathanael emi ekedide mbet. * Philip ufan esie ama asian enye ke etie nte imokụt Messiah—“Jesus, eyen Joseph, emi otode ke Nazareth.” Edi, ikedịghe Philip ọdọdọhọ Nathanael ke imọ imokụt Messiah, enye enịm. Ke nditịm ntịn̄, enye ọkọbọrọ ete: “Nte eti n̄kpọ ekeme ndiwọrọ nto ke Nazareth?” Kpa ye oro, enye ama enyịme ke ini Philip ọkọdọhọde enye ete, “di dise” ke idemfo. (John 1:43-51) Afo n̄ko ọyọbọ ufọn edieke odụn̄ọrede mme uyarade oro ẹban̄ade Jesus ke idemfo. Nso ke afo akpanam?

Dụn̄ọde mme uyarade oro ẹdude ke mbụk oro owụtde ke Jesus ama odu. Josephus ye Tacitus ẹkedi mme ewetmbụk eset oro ẹkenen̄erede ẹkpono, emi ẹkedude uwem ke n̄kpọ nte tọsịn isua iba emi ẹkebede, edi mmọ ikedịghe Christian. Mmọ ẹdọhọ ke Jesus Christ edi ata owo oro okodude uwem. Tacitus ama ewet aban̄a Nero, akwa edidem Rome, emi ọkọdọhọde ke mme Christian ẹkekịm ikan̄ ke Rome ke isua 64 E.N. Enye ọkọdọhọ ete: “Nero ama ọduọhọ otu oro mme owo ẹkekotde mme Christian, emi ẹkesuade ke ntak edinam mmọ, onyụn̄ enen̄ede otụhọde mmọ. Christus [m̀mê Christ], emi ẹdade enyịn̄ oro Christian ẹto, ama ọbọ ọkpọsọn̄ ufen ke ini ukara Tiberius ke ubọk andikara nnyịn kiet, Pontius Pilatus.”

Kaban̄a se mme ewetmbụk emi ẹkedude uwem ke n̄kpọ nte tọsịn isua iba emi ẹkebede, ẹkewetde ẹban̄a Jesus ye akpa mme Christian, The Encyclopædia Britannica eke 2002 ọdọhọ ete: “N̄kpọ emi nsio nsio owo ẹkewetde mi ẹwụt nte ke ini eset, idem mme andibiọn̄ọ Ido Ukpono Christ akananam ikeyịkke m̀mê Jesus ama odu; eyịghe emi ọkọtọn̄ọ ye unana eti ntak ke n̄kpọ nte isua ikie ita emi ẹkebede.” Ke 2002, ibuotikọ oro okowụtde ekikere mme andiwet The Wall Street Journal ọkọdọhọ ete: “Ke ẹsiode ndusụk mbon oro mînịmke ke Abasi odu ẹfep, ata ediwak nditọ ukpepn̄kpọ ẹnyịme ke Jesus eyen Nazareth ama odu.”

Kere ban̄a uyarade oro owụtde ke ẹma ẹnam  Jesus eset ke n̄kpa. Ke ini mme andibiọn̄ọ ẹkemụmde Jesus, mme ufan esie oro ẹkenen̄erede ẹkpere enye idem ẹma ẹfehe ẹkpọn̄ enye, ndien ndịk ama anam Peter ufan esie akan̄ enye. (Matthew 26:55, 56, 69-75) Ke ẹma ẹkemụm Jesus, mme mbet esie ẹma ẹsuana. (Matthew 26:31) Ekem, inikiet inikiet, mme mbet esie ẹma ẹtọn̄ọ ndisịn idem nnam utom ukwọrọikọ. Peter ye John ẹma ẹsobo uko uko ye mbon oro ẹkewotde Jesus. Mme mbet Jesus ẹma ẹsịn idem ke utom ukwọrọikọ tutu ẹnam ukpepn̄kpọ Jesus asuana ke ofụri Obio Ukara Rome, ẹnyụn̄ ẹnyịme ndikpa utu ke nditre utom ukwọrọikọ mmọ.

Nso ikanam mmọ ẹnam utọ usọp usọp ukpụhọde emi? Apostle Paul ọdọhọ ke ẹma ẹnam Jesus eset, ndien enye “owụt Cephas [m̀mê Peter] idem, ekem owụt mbet duopeba.” Paul adian do ete: “Ke oro ebede enye owụt nditọete emi ẹwakde ẹbe owo ikie ition idem ini kiet.” Ata ediwak mbon oro ẹkekụtde nte Jesus esetde ẹma ẹdu ke ini Paul ekewetde n̄kpọ emi. (1 Corinth 15:3-7) Mbon eyịghe ẹma ẹkeme nditre ndinịm ikọ ntiense owo kiet m̀mê iba. (Luke 24:1-11) Edi ikọ ntiense owo ikie ition ama enen̄ede owụt ke Jesus ama eset.

NSO IDI UTỊP? Ẹkeme ndifen idiọkn̄kpọ mbon oro ẹbuọtde idem ye Jesus ẹnyụn̄ ẹkopde uyo esie, mmọ ẹnyụn̄ ẹkeme ndinyene eti ubieresịt. (Mark 2:5-12; 1 Timothy 1:19; 1 Peter 3:16-22) Edieke mmọ ẹkpade, Jesus ọn̄wọn̄ọ ke iyanam mmọ ẹset “ke akpatre usen.”—John 6:40.

Ėdieke oyomde ntọt efen efen, se ibuot 4, “Anie Edi Jesus Christ?,” ye ibuot 5, “Ufak—Akakan Enọ Abasi” ke n̄wed oro Nso ke Bible Enen̄ede Ekpep? *

[Mme Ikọ Idakisọn̄]

[Ndise ke page 7]

Dụn̄ọde mme uyarade oro ẹban̄ade Jesus nte Nathanael okodụn̄ọrede