Bethel Brooklyn Esịm Isua 100 Idahaemi
Bethel Brooklyn Esịm Isua 100 Idahaemi
ISUA 1909 ekedi akpan isua ke New York City. Ẹma ẹsịn Ebọp Queensboro ke ufọt obio Queens ye Manhattan, ẹnyụn̄ ẹsịn Ebọp Manhattan ke ufọt Manhattan ye Brooklyn.
Isua oro okonyụn̄ edi akpan isua ọnọ Mme Ntiense Jehovah. Charles Taze Russell, etieibuot Watch Tower Bible and Tract Society, kpa n̄ka Mme Ntiense Jehovah oro ibet enyịmede, ama ada okụt ke utom edikwọrọ eti mbụk Obio Ubọn̄ Abasi ayatara. (Matthew 24:14) Enye ama enịm ke ndisio ibuot itieutom N̄ka oro ke Pittsburgh ke Pennsylvania, n̄ka Brooklyn ke New York eyenen̄ede an̄wam ndinam emi. Ẹma ẹtọn̄ọ ntịmidem ke 1908 ndikpọn̄ Pittsburgh, ekem ẹkpọn̄ ke ntọn̄ọ ntọn̄ọ 1909.
Ntak Emi Ẹkewọrọde Ẹka Brooklyn?
Mbon oro ẹkedade iso ke utom ukwọrọikọ ini oro ẹma ẹfiọk ke usụn̄ kiet oro ẹkemede ndida nsuan akpanikọ uforo uforo ekedi ndimịn̄ enye ke n̄wed mbụk n̄kpọntịbe. Ke nditịm ntịn̄, ke 1908, ẹma ẹsimịn̄ se Russell ekesikwọrọde kpukpru urua ke nsio nsio n̄wed mbụk n̄kpọntịbe 11, emi kpukpru se ẹkesimịn̄de akawakde esịm idem 402,000.
Edi Russell ekewet ete: “Nditọete oro ẹnyenede ifiọk ẹban̄a nte ẹsisuande ntọt ẹdọn̄ ke nsio nsio n̄wedmbụk n̄kpọntịbe . . . ẹkedọhọ ke edieke itiede ke [akamba obio] imịn̄ etop nnyịn, ke eyedi mmemmem ndisuan enye ke ofụri United States; nte ke ufan̄ isua kiet, ke nsio nsio ufọkutom umịn̄ mbụk n̄kpọntịbe ẹkeme nditọn̄ọ ndimịn̄ enye kpukpru ini.” Mmọdo, mmọ ẹma ẹtọn̄ọ ndiyom ata eti itie oro edinamde utom emi esịm ofụri ererimbot.
Ntak emi ẹkemekde Brooklyn? Russell ọkọdọhọ ete: “Ke ima ikọbọn̄ akam iben̄e ndausụn̄ Abasi, kpukpru nnyịn ima ibiere ke Brooklyn ke New York, emi mme owo ẹnen̄erede ẹwak . . . emi ẹnyụn̄ ẹkọtde ‘Obio Ufọkabasi,’ edifọn akan ndida nnam utom idọk emi.” Se iketịbede ama owụt ke ikanam eti ubiere. Ikebịghike, nsio nsio n̄wed mbụk n̄kpọntịbe 2,000 ẹkemịn̄ etop ukwọrọikọ Russell.
Ima ibọ ufọn en̄wen ke ndikemek New York. Etisịm 1909, ima isiak n̄kọk itieutom ke Great Britain, Germany, Australia, inyụn̄ inam ndutịm ndisiak ediwak ke mme ebiet en̄wen. Ntem, ama owụt ifiọk ndikọbọp ibuot itieutom ofụri ererimbot ke obio mbehe emi enyenede ediwak usụn̄ ye mme usụn̄ tren n̄ko.
Ntak Emi Ẹkotde Enye Bethel?
Ẹkebọp ata akpa ibuot itieutom Watch Tower Bible and Tract Society ke iduọk isua 1880, ke Allegheny (emi odude idahaemi ke Pittsburgh) ke Pennsylvania. Ẹkekot enye Ufọk Bible ini oro. Owo 12 ẹkenam utom do ke 1896.
Ke ẹma ẹkewọrọ ẹka Brooklyn ke 1909, ẹkekot obufa ufọkidụn̄ mbonutom Bethel. * Ntak emi ẹkekotde Bethel? Ufọk oro Watch Tower Society ekedepde ke ọyọhọ ufọk 13-17 ke Efak Hicks ẹto Henry Ward Beecher, ọkwọrọ ederi oro ẹketịmde ẹdiọn̄ọ, ke ẹkekot Bethel Beecher. Ẹma ẹdep n̄ko ufọk oro Beecher ekesidụn̄de akpa ke ọyọhọ ufọk 124 ke Efak Columbia Heights. Enyọn̄-Ukpeme (Ikọmbakara) eke March 1, 1909 ọkọdọhọ ete: “Enen̄ede edi n̄kpọ n̄kpaidem ndidep akani Bethel Beecher ye akani ufọkidụn̄ esie. . . . Utu ke ‘Ufọk Bible,’ idikabade ikot obufa ufọk emi ‘Bethel,’ inyụn̄ ikọt obufa itieutom ye efe mbono, ‘Ataya Brooklyn.’”
Mfịn, ẹkot ikpọ itieutom nnyịn ke Brooklyn ye iba enwen oro ẹsụk ẹdude ke Stet New York, oro edi, Wallkill ye Patterson, emi esịnede mme ufọkidụn̄, ufọk umịn̄n̄wed, ye ọfis, Bethel. Ke nditịm ntịn̄, Bethel odu idahaemi ke idụt 113 ke ofụri ererimbot. Se ibede mme asan̄autom 19,000 ẹnam utom do man ẹka iso ẹsuan etop Bible.
Imesinen̄ede Idara Isenowo
Ẹkeyak mme ufọk emi ẹnọ Abasi ke January 31, 1909. Ẹkeda Monday, September 6, 1909, ẹdara isenowo ke Bethel. Ata ediwak Nditọ Ukpepn̄kpọ Bible, nte ẹkesikotde Mme Ntiense Jehovah ini oro, ẹma ẹdi ẹdise Bethel. Ediwak mmọ ẹketo nnennen ke itie mbono oro ẹkenịmde ke Saratoga Springs, emi ekedide n̄kpọ nte kilomita 320 tọn̄ọ ke edem edere New York City, ẹdi. Charles Taze Russell ke idemesie ama adara isenowo emi onyụn̄ ọkọm mmọ. *
Ke idadara isenowo oro ẹdide ẹdise Bethel. Ke nditịm ntịn̄, se ibede owo 40,000 ẹsidi ẹdise ufọkutom Brooklyn kpukpru isua. Ufọkutom Brooklyn ke aka iso anam utom Obio Ubọn̄ Jehovah esịm nsio nsio ebiet, onyụn̄ ada mme edidiọn̄ ọsọk ediwak miliọn owo.
[Mme Ikọ Idakisọn̄]
^ ikp. 11 “Bethel” edi ikọ Hebrew oro ọwọrọde “Ufọk Abasi.” Ke eyo Bible, Bethel ekedi ata akpan obio ke Israel. Jerusalem kpọt ke ẹsiwak nditịn̄ n̄kpọ mban̄a n̄kan enye.
^ ikp. 14 Edieke oyomde ndifiọk ọyọhọ mbụk utom Mme Ntiense Jehovah, mbọk kot Jehovah’s Witnesses—Proclaimers of God’s Kingdom, page 718-723, emi mme Ntiense Jehovah ẹsiode.
[Ekebe/Mme ndise ke page 25]
Nso ke Ọfiọk Aban̄a Watch Tower Bible and Tract Society?
Ẹketọn̄ọ n̄ka Mme Ntiense Jehovah oro ibet enyịmede, oro ẹkotde Watch Tower Bible and Tract Society of Pennsylvania ke 1884 nte Zion’s Watch Tower Tract Society. Akpan uduak n̄ka emi ekedi ndida mme n̄wed nsuan etop Bible. Mfịn, Watch Tower Bible and Tract Society edi kiet ke otu n̄ka oro ibet enyịmede, oro Mme Ntiense Jehovah ẹdade ẹnam n̄kpọ ke ofụri ererimbot. *—Philippi 1:7.
Watch Tower Bible and Tract Society emịn̄ Bible ye mme n̄wed Bible ke usem 473. Enye osio se ibede New World Translation of the Holy Scriptures miliọn 150, ofụri ofụri m̀mê ubak ubak ke usem 72. Ke adianade ye New World Translation, N̄ka emi emịn̄ mîdịghe ekpe okụk ke itie en̄wen man ẹmịn̄ mme Bible oro ẹsiakde mi: American Standard Version, The Bible in Living English, The Emphatic Diaglott, Linear Parallel Edition Eke Holman, King James Version (ye enye oro Nditọ Ukpepn̄kpọ Bible Ẹkesiode), ye The New Testament Newly Translated and Critically Emphasized, Udiana Nsiondi.
Ke ẹsiode Bible ẹfep, Mme Ntiense Jehovah ẹda ufan̄ isua duop emi ẹbede ẹsion̄o mme n̄kpọ oro ẹwakde ẹbe biliọn 20, utọ nte ikpọ n̄wed, magazine, tract, CD, DVD, ye mme n̄kpọ eken. * Ẹnam ekese ke otu emi ke Bethel emi ẹdude ke mme utọ idụt nte Argentina, Australia, Brazil, Britain, Canada, Colombia, Finland, Germany, India, Italy, Japan, Korea, Mexico, Myanmar, Nigeria, Philippines, South Africa, Spain, ye United States, ẹnyụn̄ ẹnọ ẹka nsio nsio ebiet.
[Mme Ikọ Idakisọn̄]
^ ikp. 21 Ke 2008, Mme Ntiense Jehovah 7,124,443 ẹkedu ke idụt 236. Mmọ ẹkedu ke esop 103,267.
^ ikp. 23 Owo inyamke-nyam mme n̄kpọ emi. Mme Ntiense Jehovah ẹda enọ imaesịt ẹse ẹban̄a utom unọ ukpep Bible mmọ.
[Chart]
SE ẸKENAMDE ỌTỌN̄ỌDE KE 1998-2008
Ikpọ N̄wed 458,230,708
Magazine 11,292,413,199
Tract 7,996,906,376
Ndiye Uduot N̄kpri N̄wed 862,050,233
CD/MP3 34,621,130
DVD 13,500,125
Mme N̄kpọ Eken 129,083,031
Ofụri ibat 20,786,804,802
[Ndise ke page 22]
Bethel ke ọyọhọ ufọk 122-124 ke Efak Columbia Heights
[Ndise ke page 22]
Bethel ke ọyọhọ ufọk 13-17 ke Efak Hicks (1909-1918)
[Ndise ke page 22]
Ukwọrọikọ Russell ke n̄wedmbụk n̄kpọntịbe
[Mme ndise ke page 22, 23]
Bethel ke ọyọhọ ufọk 35 ke Efak Myrtle (1920-1922)
[Ndise ke page 23]
Bethel ke ọyọhọ ufọk 18 ke Efak Concord (1922-1927)
[Ndise ke page 23]
Bethel ke ọyọhọ ufọk 117 ke Efak Adams (1927 tutu esịm emi)
[Ndise ke page 24]
Bethel ke ọyọhọ ufọk 25-30 ke Efak Columbia Heights
[Mme ndise ke page 24]
Ufọk umịn̄n̄wed ke Wallkill
[Ndise ke page 24]
Itie Unọ Ukpep ke Patterson
