Se Ikpepde Ito Jesus

Iban̄a “Utịt”

Utịt Nso?

Mme mbet Jesus ẹma ẹbụp enye ẹte: “Nso idinyụn̄ idi idiọn̄ọ edidu fo ye eke utịt editịm n̄kpọ emi?” (Matthew 24:3) Ke ini Jesus ọkọbọrọde mbụme emi, enye ikọdọhọke ke ẹdisobo ata isọn̄. Ke ini enye eketịn̄de aban̄a “editịm n̄kpọ emi” ke mbemiso, enye ọkọdọhọ ke aban̄a ofụri ndutịm ukara ererimbot, eke unyamurua, ye eke ido ukpono oro Satan akarade. (Matthew 13:22, 40, 49) Ntre, editịm n̄kpọ emi ke enye ekenyene ke ekikere ke ini enye ọkọdọhọde ete: “Ndien adan̄aoro ke utịt eyedi.”—Matthew 24:14.

Jesus ọkọdọhọ ke utịt editie didie?

Utịt idiọk editịm n̄kpọ emi edi “eti mbụk.” Jesus ọkọdọhọ ete: “[Ẹyekwọrọ] eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.” Jesus eketịn̄ ntem aban̄a utịt editịm n̄kpọ emi: “Akwa ukụt oyodu, orụk eke akanam mîdụhe toto ke editọn̄ọ ererimbot tutu esịm emi, eke mîdinyụn̄ idụhe aba. Ke akpanikọ, ke mîkpesịbeke mme usen oro ẹmụhọ, baba obụkidem kiet ikpọbọhọke.”—Matthew 24:14, 21, 22.

Mmanie ke ẹdisobo?

Mbon oro mîmaha mînyụn̄ inamke n̄kpọ Jehovah ye Jesus kpọt ke ẹdisobo? Mme utọ owo oro ikopke uyo Abasi. Jesus ọkọdọhọ ete: “Kpa nte mme usen Noah ẹkedide, kpasụk ntre ke edidu Eyen owo edidi. Koro kpa nte mmọ ẹkedude ke mme usen oro ẹkebemde ukwọ iso, . . . mmọ inyụn̄ ifiọkke tutu ukwọ edi edikpọri mmọ kpukpru efep.” (Matthew 24:36-39) Jesus ọkọdọhọ ke ediwak  owo ẹdu ke usụn̄ oro adade esịm nsobo. Edi enye ama ọdọhọ ke ‘mfafaha inuaotop emi adade esịm uwem’ odu.—Matthew 7:13, 14.

Ini ewe ke utịt editịm n̄kpọ emi edidi?

Ke ini ẹkebụpde Jesus ẹban̄a idiọn̄ọ edidu esie “ye eke utịt editịm n̄kpọ emi,” enye ọkọbọrọ ete: “Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen, ndien akan̄ ye unyekisọn̄ ẹyedu . . . ndien ke ntak emi ubiatibet editọtde ima ediwak owo ẹyebịt.” (Matthew 24:3-12) Ntem, kpukpru idiọk mbụk oro ikopde mfịn ọnọ idotenyịn—oro edi, ke ukara Obio Ubọn̄ Abasi ayanam okopitem ubonowo enyene emem ke mîbịghike. Jesus ọkọdọhọ ete: “Ke ini mbufo ẹkụtde nte mme n̄kpọ emi ẹtịbede, ẹfiọk ẹte obio ubọn̄ Abasi ke ekpere.”—Luke 21:31.

Nso ke afo akpanam?

Jesus ọkọdọhọ ke Abasi “[ọkọnọ] ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Oyom enen̄ede ọfiọk Abasi ye Eyen esie man ọbuọt idem ye mmọ. Ntak edi oro Jesus ọkọdọhọde ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.”—John 17:3.

Kpeme idem mbak editịmede esịt ye mme mfịna ẹdinam fi etre ndikpep nte akpamade Abasi. Jesus ọkọdọhọ ete: “Ẹnọ ntịn̄enyịn ke idem mbufo mbak . . . editịmede esịt uwem emi ẹdinam esịt mbufo ẹkabade ẹdobi, ndien usen oro edibuat mbufo nte ekpọ. Koro enye eyesịm kpukpru mbon oro ẹdụn̄de ke ofụri iso isọn̄.” Edieke anamde item Jesus, ‘ọyọbọhọ kpukpru n̄kpọ emi ẹditịbede.’—Luke 21:34-36.

Edieke oyomde ntọt efen efen, se ibuot 9, “Nte Nnyịn Idu Uwem ke ‘Mme Akpatre Usen’?,” ke n̄wed oro Nso ke Bible Enen̄ede Ekpep? *

[Ikọ idakisọn̄]