Ndikop Idatesịt kpa ye Oro Mbiomode Ndo

Nte Paulette Gaspar obụkde

Okposụkedi emi n̄kedide n̄kpọ nte kilogram ita ke ini emi n̄kamanade, abiausọbọ oro okomụmde eka mi uman ekekere ke ndidụhe uwem. Ndusụk ọkpọ mi ẹma ẹbụn̄ọ ke ini n̄kamanade. Ọwọrọ ke n̄kadada udọn̄ọ emi esinamde ọkpọ owo ọsọp obụn̄ọ mmana. Ẹma ẹsọsọp ẹsiak mi idem, edi mbiausọbọ oro ẹkekere ke nyebe mfep. Mmọ ẹkekere ke usen kiet ete ibe ke nyakpa.

N̄KAMANA ke June 14, 1972, ke Canberra ibuot obio Australia. Okposụkedi emi kpukpru owo ẹkekerede ke ndidụhe uwem eyo esiere, n̄kakpaha. Edi mma mmen udọn̄ọ obufre n̄ko. Sia mbiausọbọ ẹkekerede ke ndidụhe uwem, mmọ ikọnọhọ mi baba usọbọ kiet “ẹte nnyụn̄ n̄kpa ke idemmi.” Edi, mma nnyụn̄ ndu uwem ke idemmi.

Mmesikere nte ọkọsọn̄de ete ye eka mi ndise mban̄a mi ke utọ ini oro. Sia eketiede nte ke ndidụhe uwem, abiausọbọ kiet emi enyenede eti esịt ama ọdọhọ ete ye eka mi ete ẹkûnen̄ede ẹkpere mi idem. Ke nditịm ntịn̄, ke akpa ọfiọn̄ ita oro n̄kodude ke ufọkibọk, owo ikayakke ete ye eka mi ẹtụk mi. Ẹkpekeme ndinọ mi unan ini ekededi. Ke ini ẹkedide ẹdifiọk ke ndikpaha, mbiausọbọ ẹma ẹdọhọ ete ye eka mi ẹda mi ẹka ebiet emi ẹsisede ẹban̄a nditọwọn̄ emi ẹbiomode ndo.

Edi ete ye eka mi ẹkeda mi ẹnyọn̄ ufọk. Ikakam ibịghike eka mi ọkọtọn̄ọ ndikpep Bible ye Mme Ntiense Jehovah. Se enye ekekpepde ama anam enye enen̄ede ọfiọk ke edi mbiomo imọ ndise mban̄a mi. Edi anaedi ama enen̄ede ọsọn̄ enye ndikpere mi idem, sia okoyomde enye anam ekese utom man ekeme ndise mban̄a mi. Ẹma ẹsida mi ẹka ufọkibọk ndien ndien. Ọkpọ mi ama ẹsibụn̄ọ ke ini ẹyetde mi mmọn̄. Idem ke ini nsiade ekpri n̄kpọ nte isia, ọkpọ mi ama esisiaha.

Ini Oro N̄kenen̄ede N̄kop Mfụhọ

Ke ini n̄kọtọn̄ọde ndikọri, n̄kesitie ke n̄kpọitie mbon n̄kpọnnam kpukpru ini. N̄kekemeke ndikpep isan̄. Kpa ye ofụri afanikọn̄ emi, ete ye eka mi ẹma ẹnen̄ede ẹse ẹban̄a mi.

Ke adianade do, eka mi ama enen̄ede esịn ifịk ekpep mi etop Bible emi ọnọde owo ndọn̄esịt. Ke uwụtn̄kpọ, enye ama ekpep mi ete ke ini iso, Abasi ayanam isọn̄ emi akabade Paradise, ndien ke kpukpru owo ẹyesan̄a ẹkpere Abasi, ẹkop inemesịt, ẹnyụn̄ ẹkop nsọn̄idem ke mfọnmma usụn̄. (Psalm 37:10, 11; Isaiah 33:24) Edi eka mi ama etịn̄ in̄wan̄-in̄wan̄ ke imọ ikereke ke ami nyokop inem  uwem ibọhọke Abasi anam ofụri isọn̄ emi akabade Paradise.

Ke akpa, n̄kesika ufọkn̄wed mbon oro ẹbiomode ndo. Mme andikpep ikenịmke utịtmbuba ndomokiet inọ mi, ami n̄konyụn̄ nnịmke utịtmbuba ndomokiet nnọ idemmi. Ke nditịm ntịn̄, ndikam n̄kaka ufọkn̄wed ekedi ata ọkpọsọn̄ n̄kpọ ọnọ mi. Ediwak nditọwọn̄ ẹma ẹsifiomo mi. Ekem, mma ndika ata ufọkn̄wed. Mma ndikụt ke ndikpep ndinam n̄kpọ ye mbon en̄wen ama ọbọ mi ofụri odudu. Kpa ye oro, mma mbiere ndika n̄wed tutu n̄kụre ufọkn̄wed sekọndri.

Ke ini n̄kodude ke ufọkn̄wed sekọndri ke n̄kenen̄ede n̄kere nte uwem nditọ ufọkn̄wed nnyịn ẹdide ikpîkpu mînyụn̄ inyeneke se ọwọrọde. Mma nsinyụn̄ n̄kere mban̄a se eka mi ekekpepde mi ke Bible. Mma ndiọn̄ọ ke se enye ekekpepde mi ekedi akpanikọ. Edi mme n̄kpọ emi ikenen̄ekede idụk mi esịt ini oro. Ntre, mma mbiere ndinọ uwem se uwem oyomde nnyụn̄ n̄kereke mban̄a ini iso.

Ke ini n̄kedide isua 18, mma n̄wọrọ n̄kpọn̄ ufọk n̄kodụn̄ ye mbon n̄kpọnnam en̄wen. Emi ama anam n̄kop inemesịt, edi ama enyek mi idem n̄ko. Ama enen̄ede enem mi ndiwọrọ n̄kpọn̄ ete ye eka mi, ndinyene mbufa ufan, ye ndisiwọrọ an̄wa ye mme ufan mi. Ediwak ufan mi ẹma ẹdọ ebe. Ama onyụn̄ ọdọn̄ mi nditiene ndọ ebe. Edi ama enen̄ede etie nte ke ndikwe ebe ke ntak unana nsọn̄idem mi. Ndifiọk emi ama anam mi mfụhọ.

Edi akananam n̄kọduọhọke Abasi ke ntak se iwọrọde mi. Mma nnen̄ede n̄kpep n̄kpọ mban̄a Abasi nnyụn̄ mfiọk ke enye isinamke ukwan̄n̄kpọ. (Job 34:10) Mma ndomo ndida uwem mi nte n̄kokụtde. Kpa ye oro, mma nnen̄ede n̄kop mfụhọ.

Ndikop Nsọn̄idem Sụn̄sụn̄

Ekebiet Abasi anam, eka mi ama ọfiọk nte n̄kpọ eketiede ye ami onyụn̄ asian ebiowo esop Mme Ntiense Jehovah oro okodụn̄de ekpere mi. Ebiowo oro ama okot mi ke urụk ukopikọ onyụn̄ ọdọhọ ndidụk mbono esop ke Ufọkmbono Obio Ubọn̄ Mme Ntiense Jehovah do. Ke adianade do, eyenete an̄wan ke esop oro ama ọtọn̄ọ ndikpep mi Bible kpukpru urua.

Uwem ama ọtọn̄ọ ndinem mi nte n̄ketide akpanikọ Bible oro eka mi ekekpepde mi. Ama esinem mi ndidu ye Mme Ntiense eken. Edi n̄kesitịn̄ke nte etiede mi ke idem sia mmen̄koyomke emi etịmede mi esịt. Etie nte emi mîkayakke nnen̄ede mma Abasi. Edi kpa ye oro, mma mfiọk ke ọfọn nyak idemmi nnọ enye. Ntre, mma nna baptism ke December 1991, ndiwụt ke mma nyak idemmi nnọ Abasi.

Mma n̄wọrọ ke ufọk oro n̄kabuanade ye mme ufan mi oro ẹkedide mbon n̄kpọnnam n̄kodụn̄ ikpọn̄. Emi ama enyene ufọn onyụn̄ ada afanikọn̄ edi. Ke uwụtn̄kpọ, mma nnen̄ede n̄kop ndobo. Mma nsinyụn̄ n̄kop ndịk ke irenowo ẹyedụk ẹdi. Ikebịghike mma mfiak ntọn̄ọ ndikop mfụhọ. N̄kesikopke inemesịt okposụkedi oro n̄kesituakde inua imam nnyụn̄ nnamde nte mmokop inemesịt. Mma nyom eti ufan oro n̄kemede ndiberi edem ke mbrenyịn.

Mmenịm ke Jehovah Abasi ama ọnọ mi orụk ufan oro. Mbiowo ke esop Mme Ntiense do ẹma ẹdọhọ Suzie, eyenete an̄wan emi enyenede ebe, aka iso ekpep mi Bible. Suzie ikesinamke n̄kpọ ye ami nte andikpep kpọt. Enye ama akabade ata ufan mi, emi n̄kamade etieti.

Suzie ama ekpep mi nte ntịn̄de se n̄kekpepde nnọ mbon en̄wen—ke utom ukwọrọikọ eke enyịnusụn̄ ke enyịnusụn̄ ye ke ido nneme. Mma nnen̄ede ntọn̄ọ ndifiọk mme edu Abasi. Edi kpa ye oro mma n̄kana baptism, n̄kenen̄ekede mma Abasi kan̄a. Enyene ini emi n̄kakam nyomde nditre ndinam n̄kpọ Abasi. Mma ntịn̄  nnọ Suzie, ndien enye ama an̄wam mi osio ke mfịna oro.

Suzie ama onyụn̄ anam mfiọk ke ami ndikodụk ndụk ye mbon oro mînen̄ekede ima Jehovah akanam mi n̄kûwak ndikop inemesịt. Ntre, mma ntọn̄ọ ndinam ufan ye mbon oro ẹkenen̄erede ẹma Jehovah—akpan akpan n̄kani owo. N̄ko-n̄ko, mma ntọhọ ye eka mi; ntre, mma ntọn̄ọ ndifiak ntie ke emem ye enye ye akpaneka mi. Idem ama enen̄ede akpa mi ndikop inemesịt nte akanam mmen̄kopke. Ekemmọ mme Christian ke esop nnyịn, mbonubon nnyịn, ndien ke akande kpukpru, Jehovah ẹma ẹnen̄ede ẹnam mi n̄kop inemesịt ẹnyụn̄ ẹnam n̄kop odudu.—Psalm 28:7.

Obufa Ubọkọkọ

Ke mma n̄kodụk akamba mbono emi ẹkesọn̄ọde ẹtịn̄ nte mme Christian oro ẹsikwọrọde ikọ nte ubọkọkọ mmọ ẹsikopde inemesịt, mma n̄kere nte, ‘Mmọn̄ọ, mmekeme nditiene n̄kwọrọ ikọ nte ubọkọkọ nan̄a.’ Edi mma mfiọk ke emi ididịghe ifia ubọk kiet. Edi ke mma n̄kọbọn̄ akam nnọ Abasi mban̄a n̄kpọ emi, mma nsịn n̄wed man n̄kabade ndi ọkwọrọikọ ofụri ini. Ndien mma ntọn̄ọ ubọkọkọ emi ke April 1998.

Nsisan̄a didie n̄kwọrọ ikọ ye unana nsọn̄idem mi? Nsimaha ndidian idem ye owo nsinyụn̄ mmaha ndidi mbiomo nnọ mbon en̄wen; oro edi, ndibet ẹdada mi isan̄ ẹnyụn̄ ẹn̄wam mi ke mme usụn̄ eken. Ntre, Suzie ye Michael ebe esie ẹma ẹdọhọ ndep ọkpọkkpọk o-moto. Edi ndi nyekeme ndiwat ọkpọkkpọk o-moto? Ẹkenam ọkpọkkpọk o-moto mi san̄asan̄a ẹnọ mi, nte okụtde ke ndise oro odude ke ibuotikọ emi. Inyụn̄ ikam iyomke n̄wọwọrọ ke n̄kpọitie n̄kpọnnam mbemiso ntiede ke ọkpọkkpọk oro!

Ọkpọkkpọk o-moto emi anam nsika n̄kekpep mme owo Bible ke ini oro ọfọnde ye mmọ onyụn̄ ọfọnde ye ami. Esinen̄ede enem mi ndiwat ọkpọkkpọk emi nnyụn̄ n̄kop nte ofụm ọtọde mi ke iso. Emi edi kiet ke otu n̄kpri n̄kpọ oro ẹnamde uwem enem mi!

Mmesima ndineme nneme ye mme owo ke efak, ndien mmọ ẹsiwak ndifọn ido nnyụn̄ n̄kpan̄ utọn̄ nnọ mi. Esinen̄ede enem mi ndikpep mme owo Bible. Esinem mi imam nditi usen kiet oro ami ye anyan anyan eyenete kiet ikọkwọrọde ikọ ke ufọk ke ufọk. Enye ama ọkọm enyeneufọk, ndien enye enyeneufọk ke ese mi ke n̄kpaidem, ekem obụp eyenete oro ete, “Ndi enye ekeme nditịn̄ ikọ?” Nnyịn mbiba ima iduọk imam ini kiet. Ke mma n̄kọkwọrọ ikọ nnọ enye, enye ama okụt ke mmenen̄ede n̄keme nditịn̄ ikọ!

Uwem enem mi idahaemi, mmonyụn̄ mma Jehovah Abasi. Mmenen̄ede n̄kọm eka mi ke emi enye ekekpepde mi akpanikọ Bible, mmonyụn̄ nnyene mbuọtidem ntie mbet ini emi Abasi edinamde “kpukpru n̄kpọ ẹdi mbufa,” ọkọrọ ye ukpasi ukpasi idem mi emi.—Ediyarade 21:4, 5.

[Se ẹwetde ke ikpọ abisi ke page 30]

“Mma ndomo ndida uwem mi nte n̄kokụtde. Kpa ye oro, mma nnen̄ede n̄kop mfụhọ”