Ediyom Eti Ndausụn̄

EDIEKE oyomde item, enye do barasuene. Edision̄o mme n̄wed ye mme vidio oro ẹtemede owo ndinam n̄kpọ ke idemesie edidi kiet ke otu mbubehe oro ẹforode ẹkan ke ererimbot. Mme n̄wed oro ẹtemede owo ndinam n̄kpọ ke idemesie ke ẹdep ẹkan ke mme utọ nsio nsio ebiet nte Britain, Latin America, Japan, ye United States. Ediwak owo ẹma vidio, ndutịm unọ ukpep, ye mme edinam ekebe ndise oro ẹtemede owo ndinam n̄kpọ ke idemesie. Ẹma mmọ sia ẹnịmde ke owo ekeme ndikọk mfịna esie ke idemesie ikotke mme ọnọitem mban̄a ekikere, mme ọnọitem ndọ, m̀mê oku ido ukpono. Mme n̄kpọ emi ẹnọ item ẹban̄a nso ye nso?

Ẹnen̄ede ẹma mme n̄wed oro ẹtịn̄de nte owo ekemede ndiforo, ndikụt ata ima, nnyụn̄ mbọk nditọ. Ẹma n̄ko mme n̄wed oro ẹnemede nte ẹkemede ndiyọ mfụhọ ye mme afanikọn̄ oro usiondọ adade edi. Ẹnen̄ede ẹma n̄ko mme n̄wed oro ẹnọde item ẹban̄a edikan mbumehe edidia udia mbe ubọk, edin̄wọn̄ sika, ye edin̄wọn̄ mmịn mbe ubọk. Ndi mme n̄wed emi ẹnọ nti item? Ẹsifọn ndusụk ini, edi ediwak ini isifọnke. Ntre, ọfọn ikere iban̄a item Bible emi: “Ọkọi ese kpukpru ikọ ke akpanikọ: edi ọniọn̄ etịm ese ikpat isan̄ esiemmọ.”—Mme N̄ke 14:15.

Mme n̄wed oro ẹtemede owo ndinam n̄kpọ ke idemesie idịghe ukem ye mme n̄wed oro ẹkpepde owo mme utọ usọ nte edisio ndise, ibat, ye usem. Mme utọ n̄wed enye emi ẹkeme ndifọn ẹnyụn̄ ẹmem urua ẹkan ndika san̄asan̄a ufọkn̄wed oro ẹkpepde mme usọ emi. Edi mme n̄wed oro ẹtemede owo ndinam n̄kpọ ke idemesie—edide aban̄a mbubehe, ndọ, edibọk nditọ, m̀mê edikop inemesịt—itiehe ntre. Mmọ ẹsiwak nditeme owo akpan usụn̄ oro ẹkpedude uwem m̀mê nte ẹkpekerede n̄kpọ. Ke ntre, ọfọn ibụp ite: ‘Anie ọnọnọ idem item emi? Enye ada m̀mọ̀n̄ item emi?’

Idịghe kpukpru ini ke item ntaifiọk ẹkeme ndinen̄ede nnyene isọn̄. Ndusụk mmọ ẹkeme ndinọ item oro mme owo ẹnen̄erede ẹma, sia ẹfiọkde ke mmimọ iyenen̄ede inam  okụk ke ndisian mme owo se mmọ ẹmade ndikop. Kamse, edision̄o mme n̄wed emi ẹtemede owo ndinam n̄kpọ ke idemesie esinọ idụt kiet kpọt se ibede biliọn dollar itiata kpukpru isua!

Mme N̄wed Oro Ẹtemede Owo Ndinam N̄kpọ ke Idemesie Ẹfọn Adan̄a Didie?

Owo esidori enyịn ndibọ nti item edieke okotde n̄wed oro etemede owo ndinam n̄kpọ ke idemesie. Edi ndusụk ini, se edikotde edi enyọn̄ enyọn̄ item m̀mê ikpîkpu ekikere. Mme utọ n̄wed oro ẹsiwak ndidọhọ ẹte: ‘Edieke enịmde, ọyọwọrọ ntre ọnọ fi. Se ededi oro oyomde, eyenyene edieke enịmde, edide okụk, nsọn̄idem, m̀mê edikụt ata ima.’ Nte utọ item oro enyene ufọn? Ndi enye ekeme ndin̄wam fi ọkọk mme mfịna fo?

Ke uwụtn̄kpọ, kere ban̄a mme n̄wed oro ẹban̄ade edinyene eti itie ebuana ye mbon en̄wen ye ndọ, emi ẹdide n̄wed oro ẹmade ẹkan. Ndi mmọ ẹn̄wam mme owo ẹnyene ubon oro adianade kiet ẹnyụn̄ ẹkopde inemesịt? Idịghe kpukpru ini. Owo kiet emi okodụn̄ọrede n̄wed ọkọdọhọ ke owo emi ewetde mme n̄wed oro ẹban̄ade ima ke Latin America, emi ẹkedepde etieti ke ndondo oro ẹkesiode, “eketeme mme andikot nte ẹkpenyenede eti itie ebuana ye mme owo ye nte ẹkpenyenede uku.” Andiwet n̄wed oro ọdọhọ ke ndika iso mma owo oro mîmaha fi edi edisuene idem. Enye oyom mme owo ẹfiọk ke akpan n̄kpọ edi ndinam se inamde owo okop inemesịt utu ke ndifiọk ke owo enyene mfịna nnyụn̄ ndomo ndikọk mme mfịna oro.

Edi akpanikọ ke mme n̄wed oro ẹtemede owo ndinam n̄kpọ ke idemesie ẹkeme ndinọ nti item. Edi mmọ ẹkeme ndinọ ndiọi item n̄ko. Ataifiọk ekeme ndinọ eti item ke n̄kpọ kiet, edi item oro enye ọnọde ke n̄kpọ en̄wen ifọnke. Owo ikemeke ndifiọk eke edide eti ke otu item emi mme n̄wed emi ẹnọde, sia mmọ ẹwak ẹsinyụn̄ ẹwak ndituaha ye kiet eken. Afo ekpeberi edem ke item anie? Bụp idemfo ete: ‘Ndi ẹma ẹtịn̄ enyịn ẹdụn̄ọde item emi, mîdịghe ndi andiwet n̄wed emi okonyụn̄ etịn̄ ekikere esie? Okûdi nte andiwet oyomde inyene ye uwọrọiso iyakke enye ekere aban̄a enyịn̄ esie?’

Bible edi n̄wed item oro enyenede ufọn ke anyan ini. Enye ọnọ nti item aban̄a ediwak n̄kpọ oro mme n̄wed emi ẹtemede owo ndinam n̄kpọ ke idemesie ẹnemede. Enye amanam ata ediwak owo ẹnam item emi: “Ẹkabade ẹdi obufa ke odudu oro onụkde ekikere mbufo . . . Ẹmen obufa owo ẹsịne.” (Ephesus 4:23, 24) Bible anam inen̄ede ifiọk se idide ntak mfịna nnyịn onyụn̄ ekpep nnyịn nte ikpọkọkde mmọ. Se ikam ifọnde ikan edi ke enye ọnọ nnyịn ata eti ntak ndinam se inende. Ibuotikọ oro etienede eyetịn̄ ntak emi edide ntre.