Leta Russia Ndika “Utịt Ererimbot”

IMA idụk ekpri ubomofụm ke Yakutsk idaha, inyụn̄ idọk enyọn̄ nsịtnsịt ibe ebiet emi Itịghede Tuymaada, ye ediwak n̄kpọdiọhọ ice ẹdude. Ima ibe n̄ko obio Verkhoyanskiy, emi ice ofụkde, ndien eyo ada mi etieti. Ke ima ikefe n̄kpọ nte kilomita 900, ima ibehe ke obio-in̄wan̄ emi ekerede Deputatskiy.

Nte n̄kọtọn̄ọde isan̄ uka Sakha emi ẹsinyụn̄ ẹkotde Yakutia edi oro. Enye edi ata ediye idụt, edi isọn̄ mmọ asat etieti, ndien idụt emi okpon akan ofụri Edem Usoputịn Europe. Ke ndaeyo, idụt emi esinen̄ede ofiop, edi ke ini etuep, enye esibịt nte ice. Ọkpọ n̄kani unam emi ẹma ẹkekpan̄a ke ata anyan ini ẹyọyọhọ idụt emi, ndien utọ unam emi ikam idụhe aba ke ererimbot. Okposụkedi emi edide isua ifan̄ ẹbe n̄kaka isan̄ emi, osụk etie nte n̄kọnyọn̄ do n̄kpọn̄, koro ke nteti nte ntụhube okofụkde n̄kpri obio idụt oro, nte utịn ekeyede ke edere edere, ye nte mbon Yakutia ẹketiede imam imam kpa ye oro eyo esifiopde m̀mê ebịtde akaha do.

Kpa ye oro ikebehede ke Deputatskiy, ama enyene mme obio-in̄wan̄ en̄wen oro ami ye owo emi n̄kasan̄ade kiet ikoyomde ndika. Ima ife n̄kpọ nte kilomita 300 mbemiso isịmde akpa obio-in̄wan̄ emi ekerede Khayyr, onyụn̄ ekpere Inyan̄ Laptev, ke edere edere Siberia. Nso ikada nnyịn ika isan̄ emi? Owo kiet ke otu Mme Ntiense Jehovah ama ededi obio emi edikwọrọ ikọ onyụn̄ edikụt ke ediwak owo ke obio emi ẹkpema ndikpep Bible. Edi nnyịn emi idụn̄ọde ke Yakutsk ikam ikpere do ikan, koro to ke obio nnyịn sịm do edi n̄kpọ nte kilomita 1,000! Ima ifiọk ke mmọ ẹnen̄ede ẹyom un̄wam ye nsịnudọn̄.

Ke ima ikesịm Deputatskiy, ete kiet emi okoyomde ndika Khayyr ama enyịme ndibọ ata esisịt okụk mmen nnyịn ke ubomisọn̄ esie n̄kayak. Nnyịn ikoyomke ndidụk sia enye akawat ata akani ubomisọn̄ eset—udia-aran emi ama akataha ama. Nte ededi, ima inyụn̄ idụk ibe, ete mbon awat n̄kpọ esie adaha mbubreyo oro. Nnyịn ikọfiọkke se inade ibet nnyịn.

N̄kpọitie ubomisọn̄ oro ekebịt nte ice, edi ikekere ke ima itie ibịghi ke oyofiop esisịt, edi ke m̀mọ̀n̄? Ima isọsọp ision̄o ikpọ ọfọn̄ etuep isịne ke enyọn̄ ọfọn̄ oro ikesịnede esisịt ini oro ọbọn̄ mbon akatuakde ada ke usụn̄. Edi okosụk etie nte isan̄a iferi.

Awat-ubomisọn̄ mbon emi edide ata eyenisọn̄ oro ke awat n̄kpọ esie aka, inyeneke mfịna. Enye ama obụp inikiet inikiet ete, “Ndi akanam ẹmekụt un̄wana obio emi?” Akanam n̄kwe, ntre enye atuak ada, nnyịn inyụn̄  in̄wana in̄wọn̄ọ sụn̄sụn̄. Se ikokụtke ama enen̄ede akpa nnyịn idem tutu nnyịn ikopke aba tuep—nte fi, un̄wana emi eyede nte akpara ko ke enyọn̄, eketie nte ikpanyan ubọk, imotụk.

Ima iwat tụhi-tụhi usenubọk ikobụhọ ke ice emi ọkọyọhọde usụn̄. Ima isiwọrọ ediwak ini inụk ubomisọn̄ isio ke ice mbemiso isịmde Khayyr. Ke eyo ama akan̄wan̄a, ima idi idifiọk ke idịghe ọkpọusụn̄ ke ikawat, edi ke ikawat ke enyọn̄ inyan̄ oro ama ọkọsọn̄ akabade ice. Ima idisịm Khayyr ke n̄kpọ nte n̄kanika 12 uwemeyo tọn̄ọ ikọkpọn̄ Deputatskiy ke n̄kpọ nte n̄kanika 8 okoneyo n̄kpọn̄. Okposụkedi emi ikekerede ke utọ ọkpọsọn̄ etuep oro ayanam idọn̄ọ, ima inen̄ede ikop inem idem ke ndan̄nsiere. N̄kukụre mfịna ekedi ke ibikpai ama odori mi ke nnuenukot ke ntak ọkpọsọn̄ etuep. Nditọ obio oro ẹma ẹnọ mi n̄kpọ mfiọn̄ọ.

Nnyịn ikesika ibịne mme owo ke ufọk mmọ ikọkwọrọ eti mbụk. Edi mbio obio emi ndisụk n̄kokop ke imedi idisịm, mmọ ẹma ẹtọn̄ọ ndiyom nnyịn. Ikodụhe usen oro nnyịn mîkpepke owo Bible tọn̄ọ ke tụhi-tụhi usenubọk tutu eyo okụt ke ofụri urua iba ye ubak. Ama enem ndisobo ediwak mbon oro ẹnemde itie, ẹmade ndikama isenowo, ẹnyụn̄ ẹmade n̄kpọ Abasi. Ediwak n̄kaniban obio oro ẹkedọhọ nnyịn ẹte: “Nnyịn imenịm ke Abasi do. Mbufo ndito utọ anyan usụn̄ oro ndi utịt ererimbot emi owụt ke Abasi do ke akpanikọ!”

Ama enem nnyịn ndikụt nte mbio obio oro ẹdude uwem. Ke uwụtn̄kpọ, mme owo ẹbon eboho ice ke mbenufọk mmọ nte owo obon ifia. Ini ekededi oro mmọ ẹyomde mmọn̄, mmọ ẹnyene nditan̄ eboho ice ndọn̄ ke eso ntem man atara. Mmọ ẹma ẹnọ nnyịn edinem udia edem mmọ oro ẹdade ndekiyak ẹtem. Iyak ẹsisat nte ẹsio ke ice ke ndondo oro ẹkọde, ekem ẹsịbe enye mbatmbat ẹdọn̄ inụn̄ ye ntokon, ẹnyụn̄ ẹta inikiet inikiet. Esinyụn̄ enem nditọ obio oro nditịn̄ n̄kpọ mban̄a mbakidem unam oro ẹbụhọde ke ice toto ke eset, utọ nte nnụk ata ikpọ enen eset, ye mme eto eset, emi ẹwakde ke ebiet emi.

Mma nsife ediwak kilomita ke ubomofụm n̄ka n̄kese mbon oro ẹnyenede udọn̄ ke etop Bible ke mme obio-in̄wan̄ en̄wen ke Yakutia. Nditọ idụt emi ẹnem itie etieti! Usen kiet mma nsobo ekpri eyenọwọn̄ emi ekedide edifiọk ke idem esinyek mi ke ini mfede ke ubomofụm. Enye ama ọ-drọ akadan̄abasi iba ye ekpri ubomofụm ke kad ọnọ mi, onyụn̄ ewet ke kad oro ete: “Sasha, kûsukop ndịk iduọ ke ini efede ke ubomofụm. Matthew 10:29.” Ama enen̄ede otụk mi ke ini n̄kokotde itie N̄wed Abasi oro. Itien̄wed oro aban̄a se Jesus eketịn̄de aban̄a akadan̄abasi. Enye ọdọhọ ete: “Baba kiet ke otu mmọ iduọhọ ke isọn̄ ke Ete mbufo mîfiọkke.”

Se mbụkde emi edi ata esisịt ke otu n̄kpọ oro n̄kokụtde ke Yakutia. Nte idụt oro ebịtde idiyakke mfre nte mbon oro ẹdụn̄ọde ke ata “utịt ererimbot” oro ẹnemde itie.

[Mme ndise ke page 25]

Mbon Yakutia ẹma ẹnem itie etieti ẹnyụn̄ ẹdara isenowo