Ndi Abasi Esikpụhọde Ekikere?

BIBLE ọdọhọ ke Abasi “ikemeke ndikpụhọde nte emi mbukpọn̄ okpụhọde itie.” Abasi ke idemesie ọdọhọ ete: “Koro ami ndide Jehovah, n̄kpụhọkede.” (James 1:17; Malachi 3:6) Jehovah Abasi itiehe nte mbon oro edide anam anam ẹkpụhọde ekikere, emi owo mîkemeke ndiberi edem m̀mê ndifiọk se ẹkpenamde man ẹnem mmọ esịt.

Edi ndusụk mbon oro ẹsikotde Bible ẹkeme ndikere ke Abasi esikpụhọde ekikere. Ke uwụtn̄kpọ, enyene ini emi Jehovah Abasi ọkọnọde mme Christian odudu man ẹsinam utịben̄kpọ, edi inọhọ aba idahaemi. Ke eset, Abasi ama esinyịme mme owo ẹdọ uwak iban, edi inyịmeke ẹnam utọ n̄kpọ oro aba idahaemi. Ke Ibet Moses, Jehovah ama enyịme mme owo ẹnịm Sabbath, edi idọhọke ẹnịm aba idahaemi. Ndi kpukpru emi iwụtke ke Abasi okpụhọde?

Akpa kan̄a, fiọk ete ke akananam ima ye edinen ido Abasi ikpụhọkede. Ke adianade do, “nsinsi uduak” emi enye akaduakde ndida Obio Ubọn̄ esie ndiọn̄ ubonowo ikpụhọkede. (Ephesus 3:11) Nte ededi, ukem nte idiọk edu owo ekemede ndinam fi okpụhọde ekikere ke se akaduakde ọnọ enye, Jehovah n̄ko esinam ukpụhọde etiene se itịbede.

Abasi esinyụn̄ okpụhọde ndausụn̄ oro enye ọnọde ikọt esie ekekem ye idaha mmọ ye se itịbede. Ikpanaha emi akpa nnyịn idem. Kere se owo emi adade mme owo asan̄a owụt n̄kpọ akpanamde edieke enye adade okụt n̄kpọndịk. Enye ayada mmọ asan̄a ebiet en̄wen mbak n̄kpọ edinam mmọ. Ndi oro  ọwọrọ ke enye okpụhọde ekikere, idinyụn̄ idaha aba mmọ ika ebiet emi akanade ẹka? Ye emi ke ekikere, ẹyak ineme uwụtn̄kpọ ita oro ikasiakde ke enyọn̄ emi, emi mîsin̄wan̄ake ndusụk owo.

Ntak Emi Owo Mînamke Aba Utịben̄kpọ?

Ntak emi Abasi ọkọnọde ndusụk akpa mme Christian odudu ndinam utịben̄kpọ? Ekeme ndidi afo ọmọfiọk ke ini emi Israel ẹkesụk ẹdide ikọt Abasi, ke Abasi ama esinam utịben̄kpọ ndiwụt ke imọ do ye mmọ. Abasi ama ada Moses owụt Israel akaka odudu Esie ke ndisio mmọ ke Egypt nnyụn̄ nda mmọ mbe wilderness n̄kesịm Isọn̄ Un̄wọn̄ọ. Edi n̄kpọ mbọm nditịn̄ nte ke nditọ Israel ikesiwakke ndinyene mbuọtidem ke Abasi. Ke Jehovah ama ekesịn mmọ onyụn̄ ọtọn̄ọ esop Christian, enye ama ọnọ mme apostle ye mbon en̄wen odudu ndinam utịben̄kpọ. Ke uwụtn̄kpọ, apostle Peter ye apostle John ẹma ẹnam owo emi akamanade mbụn̄ọ asan̄a, Paul onyụn̄ anam akpan̄kpa eset. (Utom 3:2-8; 20:9-11) Mme utịben̄kpọ oro mmọ ẹkenamde ẹma ẹnam mme owo ke ediwak idụt ẹkabade Christian. Ntak emi owo mînamke aba utịben̄kpọ idahaemi?

Apostle Paul ama ada uwụtn̄kpọ emi ọbọrọ mbụme oro ete: “Ke ini n̄kedide eyenọwọn̄, n̄kesitịn̄ ikọ nte eyenọwọn̄, n̄kere n̄kpọ nte eyenọwọn̄, n̄kọk ibuot nte eyenọwọn̄; edi ke emi mma n̄kokpon n̄wọrọ owo, mmọduọn̄ọ mme ido uyen.” (1 Corinth 13:11) Nte mme ete ye eka ẹsinamde n̄kpọ ye eyenọwọn̄ okpụhọde ye nte ẹsinamde ye eyen oro ama okokpon. Ntre n̄ko, nte Jehovah anamde n̄kpọ ye esop Christian mfịn okpụhọde ye nte enye akanamde ke ini esop Christian ekedide “eyenọwọn̄.” Apostle Paul ama ọdọhọ ke mme utọ utịbe utịbe enọ nte editịn̄ ikọ ke usem m̀mê editịn̄ ntịn̄nnịm ikọ “eyebe efep.”—1 Corinth 13:8.

Ntak Emi Ẹkeyakde Ẹdọ Uwak Iban?

Jesus ama owụt ke Abasi okoyom erenowo ọdọ n̄wan kiet kpọt ke ini Abasi ọkọdọhọde akpa eren ye n̄wan ete: “Owo ọyọkpọn̄ ete ye eka esie onyụn̄ akadiana ye n̄wan esie, ndien mmọ mbiba ẹyekabade ẹdi obụk kiet.” (Matthew 19:5) Ndọ ekpenyene ndibịghi ke adan̄a ini emi ebe ye n̄wan ẹdude uwem. Nte ededi, mbemiso Abasi akanamde Israel akabade edi idụt onyụn̄ ọnọ mme Ibet, nditọ Israel ẹma ẹtọtọn̄ọ udọ uwak iban. Ọwọrọ ke idịghe Abasi ọkọtọn̄ọ udọ uwak iban, inyụn̄ idịghe enye ọkọdọhọ ẹdọ, edi enye ama ọnọ ibet oro edin̄wamde mmọ. Ikọ Abasi ama akpan udọ uwak iban ke ẹma ẹketọn̄ọ esop Christian.—1 Timothy 3:2.

Jehovah esiyọ ndusụk n̄kpọ tutu ekem ini oro enye oyomde ndinen̄ede mmọ. (Rome 9:22-24) Jesus ọkọdọhọ ke Jehovah ‘ekenyịme’ ndiyọ idiọk ndutịm ndọ emi ke ibio ini ke “ntak nsọn̄esịt” nditọ Israel.—Matthew 19:8; Mme N̄ke 4:18.

 Ntak Emi Ẹkenịmde Sabbath ke Ibio Ini-e?

Abasi ọkọtọn̄ọ Sabbath eke urua ke urua ke ama okosio nditọ Israel ke Egypt. Ekem, enye ama anam Sabbath akabade edi ibet ofụri idụt Israel. (Exodus 16:22-30; 20:8-10) Apostle Paul ọkọdọhọ ke uwa oro Jesus akawade ama “abiat . . . Ibet ewụhọ emi ẹsịnede ke mme item” onyụn̄ “ọsọhi n̄wed isọn oro ẹwetde ke ubọk.” (Ephesus 2:15; Colossae 2:14) Ibet Sabbath esịne ke se ‘ẹkebiatde’ ẹnyụn̄ ‘ẹsọhide ẹfep,’ koro Bible aka iso ọdọhọ ete: “Ke ntre ẹkûyak baba owo kiet ekpe ikpe ọnọ mbufo ke edidia n̄kpọ ye edin̄wọn̄ n̄kpọ m̀mê kaban̄a usọrọ m̀mê edinịm obufa ọfiọn̄ m̀mê sabbath.” (Colossians 2:16) Ntak ndien emi Abasi ọkọnọde Ibet emi esịnede ibet Sabbath?

Apostle Paul ekewet ete: “Ibet ama akabade edi andikpeme nnyịn adade esịm Christ.” Ekem enye ama adian do ete: “Edi ke emi mbuọtidem ama ekedisịm, nnyịn idụhe aba ke idak andikpeme.” (Galatia 3:24, 25) Utu ke Abasi ndikpụhọde ekikere, enye akakam ada Sabbath oro ke ekpri ibio ini ekpep mme owo ke akpana mmọ ẹsisio ini ẹtie ẹkere mme n̄kpọ Abasi kpukpru ini. Okposụkedi emi ibet Sabbath ekedide ke ibio ini, ndutịm emi ama anam mme owo ẹfiọk ke ini ke edi emi mme owo ẹdibọhọde ofụri afanikọn̄ oro esịmde mmọ.—Mme Hebrew 4:10; Ediyarade 21:1-4.

Abasi Ima Oro Edide Se Ẹberide Edem

Mme uwụtn̄kpọ Bible emi ẹwụt ke Jehovah Abasi ọkọnọ mme owo nsio nsio item ye ndausụn̄ ke nsio nsio ini. Edi oro iwọrọke ke enye okpụhọde. Utu ke oro, enye akakam anam n̄kpọ ekekem ye se ikọt esie ẹkeyomde ke nsio nsio idaha man akam ọfọn ye mmọ. Ntre n̄ko ke enye anam mfịn.

Nnyịn imọfiọk se ikpanamde man inem Jehovah esịt sia enye mîkpụhọkede mme edumbet esie. Ke adianade do, nnyịn imenen̄ede inịm ke kpukpru se Abasi ọn̄wọn̄ọde ẹyesu. Jehovah ọdọhọ ete: “Nyanam kpukpru se mmade. . . . Mma mbot, nyonyụn̄ nnam enye.”—Isaiah 46:10, 11.

[Se ẹwetde ke ikpọ abisi ke page 21]

Abasi ikpụhọkede mme edumbet ima ye edinen ido esie

[Se ẹwetde ke ikpọ abisi ke page 22]

Paul ama ọdọhọ ke enọ edinam mme utịben̄kpọ ‘ẹyebe ẹfep’

[Se ẹwetde ke ikpọ abisi ke page 23]

Ndọ ekpenyene ndibịghi ke adan̄a ini emi ebe ye n̄wan ẹdude uwem