Ndi Odu Owo Oro Enen̄erede Ekere Aban̄a Mi?

Ndi akanam ibuot oyon̄ fi tutu etie fi nte idụhe owo eke ọfiọkde mfịna fo? Ndien idem edieke owo ọfiọkde, osụk etie fi nte ke mfịna fo ibeheke mmọ.

KE INI afanikọn̄ etịbede, ekeme nditie fi ke idem nte oyobio oro mîditreke. Ndusụk ini, mfịna ekeme ndinen̄ede mmem fi idem onyụn̄ etie nte ke ọbọ ufen ikpîkpu tutu afo ekere ke imọ idikemeke aba ndiyọ. Nte n̄kpọ esitiede edi oro, akpan akpan ke ini owo ọdọn̄ọde udọn̄ọ ọfiọn̄, enyenede ata idiọk mbabuat unọmọ, ye ke ini esịt ọduọde owo, m̀mê n̄kpọ ntre. Ibuot ekeme ndiyon̄ fi onyụn̄ etie nte ke idụhe owo eke ọfiọkde mfịna fo tutu afo ke idemfo ufiọkke se akpanamde ọdọn̄ idem esịt. Ndi odu owo oro enen̄erede ekere aban̄a fi?

“Abasi Kpukpru Ndọn̄esịt” Ekere Aban̄a Fi

Bible okot Abasi “Ete mbọm ye Abasi kpukpru ndọn̄esịt.” (2 Corinth 1:3) Abasi emi ekerede Jehovah ọfiọk ke imoyom ndọn̄esịt. Bible etịn̄ aban̄a “ndọn̄esịt” ke ediwak itie, ndien emi anam ifiọk ke Abasi ọdiọn̄ọ se ifịnade nnyịn, ye nte ke akam enenem enye ndidọn̄ nnyịn esịt. Emi anam nnyịn ifiọk ke ọkpọkọm mme owo ifiọkke inyụn̄ idọn̄ke enyịn ke mfịna nnyịn, Jehovah Abasi ọfiọk onyụn̄ ekere aban̄a nnyịn.

N̄wed Abasi enen̄ede owụt ke Jehovah ekere aban̄a nnyịn owo kiet kiet. Bible ọdọhọ ke “enyịn Jehovah ẹdu ke kpukpru ebiet, ẹse mme idiọk owo ye nti.” (Mme N̄ke 15:3) Job 34:21 esịn ke uyo oro ete: “Koro enyịn [Abasi] esede usụn̄ owo, onyụn̄ okụtde kpukpru ikpat esie.” Jehovah okụt se nnyịn inamde—edide eti m̀mê idiọk—onyụn̄ ọfiọk idaha nnyịn, ntre enye ekeme ndinam se enye okụtde ke ọfọn. Se prọfet Hanani, emi ẹkenyụn̄ ẹdiọn̄ọde nte okụt-n̄kukụt, eketịn̄de ọnọ Edidem Asa, emi akakarade Judah, owụt emi. Enye ọkọdọhọ ete: “Koro enyịn Jehovah ẹsan̄ade ke ofụri ererimbot, ẹte isọn̄ọ imụm mmọ eke ofụri esịt mmọ odude ye enye ikama.”—2 Chronicles 16:7, 9.

Enyene ntak en̄wen emi anamde Jehovah ese nnyịn enyịn. Jesus ọkọdọhọ ete: “Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi.” (John 6:44) Ekpedi Jehovah inen̄ekede ikere iban̄a owo, ndi enye akpabiat ini odụn̄ọde owo ese m̀mê esịt esie odu ye imọ? Ndien edieke enye okụtde ke esịt owo odu ye imọ, enye esin̄wam owo oro ọfiọk imọ. Ke uwụtn̄kpọ, kere ban̄a se iketịbede inọ n̄wan kiet emi ọkọdọn̄ọde kansa ana ke ufọkibọk ke Dominican Republic. Mma emi ama eseme ọnọ Abasi ete anam imọ ikụt ido ukpono akpanikọ. Ke ebe oro, ebe esie ama ada ediye uduot ekpri n̄wed oro ẹkotde Nso ke Abasi Oyom Oto Nnyịn? * ọsọk enye. Mme Ntiense Jehovah emi ẹkewahade ufọk mmọ usenubọk oro ẹkenọ enye. Mma emi ama okot n̄wed emi onyụn̄ okụt ke n̄wed emi ekedi ibọrọ akam imọ. Enye ama enyịme Ntiense oro ekpep imọ Bible, ndien ikesịmke ọfiọn̄ itiokiet, mma emi ama ayak idemesie ọnọ Abasi onyụn̄ ana baptism.

 N̄wed Psalm ọdọn̄ọ ediwak ndinem ikọ oro mme andiwet psalm ke Israel eset, nte Edidem David, ẹkewụtde ke Jehovah enen̄ede ekere aban̄a mme asan̄autom Esie. Ke uwụtn̄kpọ, se nte Edidem David ekesemede ọnọ Abasi ke Psalm 56:8 ete: “Da mmọn̄eyet mi sịn ke ekpeme fo: nte mmọ idụhe ke n̄wed fo?” Uwụtn̄kpọ oro David ọkọnọde ke eseme esie emi owụt ke Jehovah ọfiọk ukụt ye ubiak oro owo osobode. Jehovah ọfiọk nte akabiakde David onyụn̄ ọfiọk se ikanamde David atua. Ke akpanikọ, Andibot ke ese kpukpru mbon oro ẹdomode ndinam uduak esie, “mmọ eke ofụri esịt mmọ ẹdude ye enye.”

Itie Bible en̄wen oro anamde ifiọk nte Abasi ekerede aban̄a nnyịn edi Psalm 23, emi edide ediwak owo ẹdiọn̄ọ ke ibuot. Ntọn̄ọikọ psalm oro emen Abasi odomo ye eti ekpemerọn̄, ete: “Jehovah edi andibọk mi, ndinanake n̄kpọ.” Ekpemerọn̄ ke Ufọt Ufọt Edem Usiahautịn esinen̄ede ese erọn̄ esie enyịn, onyụn̄ akam osio kpukpru mmọ enyịn̄. Idụhe usen emi enye mîmenke erọn̄ kiet kiet ifiọn̄ọ ise m̀mê ada unan. Ndien edieke enye okụtde unan ke idem erọn̄ esie, enye ayada aran m̀mê ibọk ọfiọn̄ọ man unan oro ọsọp akpa. Edieke erọn̄ ọdọn̄ọde, ekpemerọn̄ ekeme ndifiọn erọn̄ inua ọnọ ibọk onyụn̄ akama enye ke ubọk mbak erọn̄ oro edisụhọde ana akpa. Ke akpanikọ, uwụtn̄kpọ emi enen̄ede owụt nte Jehovah ekerede aban̄a mbon oro ẹbịnede enye.

Akam ye Ediset ke N̄kpa Ẹwụt ke Abasi Ekere Aban̄a Fi

Owo ikewetke kpukpru emi ye ndinem psalm eken ke Bible ite ikot inyụn̄ ikop nte  mmọ ẹnemde kpọt. Mme psalm emi ẹwụt nte mme anam-akpanikọ asan̄autom Abasi ke eset ẹkesemede ẹnọ Jehovah ẹben̄e un̄wam, ẹnyụn̄ ẹkọm enye ke ukpeme ye edidiọn̄ esie. Emi owụt ke mme asan̄autom Abasi emi ẹma ẹnen̄ede ẹnịm ke Abasi ekere aban̄a mmimọ. Ndikot nnyụn̄ ntie n̄kere mme akam ofụri esịt emi ayanam ifiọk ke Abasi ekere n̄ko aban̄a nnyịn. Abasi ndikam nyak nnyịn isibọn̄ akam inọ imọ enen̄ede owụt ke enye ekere aban̄a nnyịn.

Nte ededi, ndusụk ini, afanikọn̄ ekeme ndimen nnyịn mmen tutu nnyịn ikam ifiọkke se ikpetịn̄de ke akam. Ndi Jehovah oyosụk ọfiọk se ifịnade nnyịn do aba ke emi nnyịn ke idem nnyịn mîfiọkke se ikpeben̄ede enye? Rome 8:26 ọbọrọ mbụme emi ete: “Spirit n̄ko etiene an̄wam ke mmemidem nnyịn; koro nnyịn inyenede mfịna edifiọk se nnyịn ikpọbọn̄de akam iben̄e, edi spirit ke idemesie anam n̄kpeubọk ọnọ nnyịn ke mmụm oro uyo mîwọrọke.” Itie N̄wed Abasi emi owụt ke Abasi “emi okopde akam” ekeme ndida akam ikọt esie oro ẹwetde ke Bible oro ekemde ye mme idaha nnyịn nte akam nnyịn onyụn̄ ọbọrọ enye nte nnyịn ikọbọn̄.—Psalm 65:2.

Idotenyịn ediset ke n̄kpa n̄ko owụt ke Abasi ekere aban̄a nnyịn owo kiet kiet. Jesus Christ ọkọdọhọ ete: “Ini ke edi eke kpukpru mme andidu ke udi editi ẹdikopde [mi] uyo ẹnyụn̄ ẹwọn̄ọ ẹdi.” (John 5:28, 29) Ẹkabade ikọ Greek itien̄wed emi ọfọn nte “udi editi,” idịghe ikpîkpu “udi.” Ikọ emi owụt ke Abasi eti onyụn̄ ọfiọk nte akpan̄kpa ekesidude uwem.

Kere ise, mbemiso Abasi ekeme ndinam owo eset, oro ọwọrọ ke enye ọfiọk kpukpru n̄kpọ aban̄a owo oro, emi esịnede nte enye eketiede, mme edu oro enye akadade-da amana, mbon oro enye ekekpepde-kpep, ye ofụri ekikere esie! (Mark 10:27) Abasi ifreke owo oro ama akakpa ọkpọkọm ediwak tọsin isua ẹbe. (Job 14:13-15; Luke 20:38) Mmọdo, ndi Jehovah Abasi nditi kpukpru n̄kpọ mban̄a ediwak biliọn owo oro ẹma ẹkekpan̄a inen̄ekede iwụt ke enye ekere aban̄a nnyịn owo kiet kiet?

Jehovah Edi Andinọ Utịp

Nso ke ikpanam man Abasi ekere aban̄a nnyịn? Akpa kan̄a, ana ibuọt idem ke enye inyụn̄ ikop uyo esie. Apostle Paul ama owụt ke owo oro oyomde Abasi ekere aban̄a imọ enyene ndibem iso nnyene mbuọtidem ke Abasi. Enye ekewet ete: “Ke mbuọtidem mîdụhe owo ikemeke nditịm nnem enye esịt, koro ana owo eke asan̄ade ekpere Abasi enịm ke akpanikọ ete enye odu ye nte ke enye edi andinọ mmọ eke ẹsịnde ifịk ẹyom enye utịp.”—Mme Hebrew 11:6.

N̄kọ omokụt ke utọ mbuọtidem oro Abasi amade abuana n̄kpọ iba. Akpa kan̄a, ana ‘inịm ke akpanikọ ke Abasi odu,’ ye nte ke enye edi Akakan Andikara, kpa Enye emi nnyịn ikpokponode inyụn̄ ikop uyo esie. Ọyọhọ iba, ana inịm ke enye edi “andinọ mmọ eke ẹsịnde ifịk ẹyom enye utịp.” Ata mbuọtidem esịne ndinịm ke Abasi enen̄ede ekere aban̄a kpukpru mbon oro ẹsịnde ifịk ẹdomo ndinam uduak esie, onyụn̄ ọdiọn̄ mmọ. Edieke ekpepde Ikọ Abasi onyụn̄ odụkde ndụk ye mbon oro ẹkopde uyo Abasi, afo n̄ko emekeme ndinyene orụk mbuọtidem oro edinamde Abasi etiene ọnọ fi utịp onyụn̄ ekere aban̄a fi.

Ediwak owo mfịn ẹkere ke Abasi ikereke iban̄a se owo anamde. Edi nte ima ikokụt, Bible owụt ke Abasi enen̄ede ekere aban̄a mbon oro ẹnen̄erede ẹbuọt idem ke enye. Okposụkedi emi ekese nnanenyịn, edikpu, ye mme mfịna eken ẹsịmde nnyịn mfịn, inaha iduọk idotenyịn. Abasi enen̄ede ekere aban̄a nnyịn. Ke akpanikọ, enye ọdọhọ nnyịn iben̄e imọ in̄wam nnyịn. Andiwet psalm ọkọdọhọ ete: “Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.”—Psalm 55:22.

[Ikọ Idakisọn̄]

[Ekebe/Ndise ke page 29]

Mme Itie N̄wed Abasi Oro Ẹwụtde ke Abasi Enen̄ede Ekere Aban̄a Fi

“Koro enyịn Jehovah ẹsan̄ade ke ofụri ererimbot, ẹte isọn̄ọ imụm mmọ eke ofụri esịt mmọ odude ye enye ikama.”—2 CHRONICLES 16:9

“Da mmọn̄eyet mi sịn ke ekpeme fo: nte mmọ idụhe ke n̄wed fo?” —PSALM 56:8

“Jehovah edi andibọk mi, ndinanake n̄kpọ.”—PSALM 23:1

“Afo emi okopde akam, kpukpru obụkidem ẹyetiene fi.”—PSALM 65:2

“Afo okpokot, ndien ami n̄kpeyere fi, utom ubọk fo ọkpọdọn̄ fi.”—JOB 14:15

“Ana owo eke asan̄ade ekpere Abasi enịm ke akpanikọ ete enye odu ye nte ke enye edi andinọ mmọ eke ẹsịnde ifịk ẹyom enye utịp.”—MME HEBREW 11:6

“Top mbiomo fo nọ Jehovah, ndien enye ayakama fi: enye idiyakke edinen owo esehede ke nsinsi.”—PSALM 55:22