Ntak Emi Bible Ọfọnde ye Eyo Nnyịn

“Abasi ọkọnọ odudu ẹda ẹwet ofụri n̄wed Abasi ndien ẹkeme ndida enye . . . nnọ mme owo ndausụn̄.”—2 TIMOTHY 3:16, The Jerusalem Bible.

BIBLE amanam mme owo emi ẹtode ediwak ebiet ẹkpụhọrede ẹdu eti uwem ke ofụri ediwak isua ikie emi ẹbede. Itie N̄wed Abasi oro odude ke enyọn̄ emi etịn̄ ntak emi Bible ekemede ndinam emi—ọwọrọ ke ọniọn̄ esie oto Abasi. Ekikere Abasi odu ke Bible, okposụkedi emi edide mme owo ẹkewet. Bible ọdọhọ ete: “Mme owo ẹketịn̄ ikọ ẹto Abasi nte edisana spirit akadade mmọ usụn̄.”—2 Peter 1:21.

Bible ọnọ eti ndausụn̄ ke nsụhọde n̄kaha usụn̄ iba. Akpa, enye anam owo enen̄ede ọfiọk se idide mfọnn̄kan usụn̄ uwem. Ọyọhọ iba, enye enyene odudu ndinam mme owo ẹnam mme ukpụhọde oro odotde man ẹdu mfọnn̄kan uwem oro. Ẹyak ineme ikpehe iba emi.

Ndinyene Ikike Mban̄a Nti Utịtmbuba

Abasi ọn̄wọn̄ọ ntem ke Bible ete: “Ami nyanam fi enyene ikike nyonyụn̄ nteme fi usụn̄ eke afo edisan̄ade. Nyetịn̄ fi enyịn ke idem nnyụn̄ nteme fi.” (Psalm 32:8, NW) N̄kọ omokụt ke Abasi inọhọ item kpọt edi ọnọ n̄ko ikike, emi edide ukeme ndifiọk nte n̄kpọ ẹnen̄erede ẹtie. Edieke inyenede ikike oro ekemede ndinam ifiọk mme utịtmbuba oro ẹnen̄erede ẹfọn, emi idiyakke ida uwem nnyịn inam mme n̄kpọ oro mînyeneke ufọn.

Ke uwụtn̄kpọ, ediwak owo ẹda uwọrọetop m̀mê uforo nte utịtmbuba mmọ. Mme n̄wed emi ẹtemede owo nte enye ekemede ndikan mbon en̄wen man enyene uku m̀mê inyene ẹyọyọhọ. Edi Bible ọdọhọ nnyịn ete: ‘Mbọhọidụn̄ owo ndifịbe ufụp ye owo edi ikpîkpu n̄kpọ ye idomo eke mîwọrọke usụn̄.’ “Owo eke amade silver iyụhọke silver.” (Ecclesiastes 4:4; 5:10) Ndi item oro ọfọn ye nnyịn mfịn?

Man iwụt nte item Bible enyenede ufọn, ẹyak ikere iban̄a uwụtn̄kpọ Akinori ke Japan. Akinori ama akan ikan̄-ikan̄ mbuba onyụn̄ esịm utịtmbuba esie ndikụre n̄wed ke akakan ufọkn̄wed ntaifiọk nnyụn̄ nnyene utom ke ọwọrọetop itieutom. Eketie nte n̄kpọ eke kpukpru n̄kpọ ẹkefọnde ye enye. Edi uforo esie ikọnọhọ enye inemesịt oro enye ekekerede ke imọ iyenyene. Utu ke oro, editịmede esịt ye mba ikayakke idem ọsọn̄ enye. Mme ufan esie ke itieutom  ikekemeke ndidọn̄ enye esịt. Enye ama akabade owo mmịn onyụn̄ akam oyom ndiwot idem sia uwem ekefekde enye. Ekem, enye ama ọtọn̄ọ ndikpep Bible ye Mme Ntiense Jehovah. Se enye ekekpepde ama anam enye okpụhọde se enye akadade nte akpan n̄kpọ ke uwem. Ikebịghike, mfek uwem oro mîkayakke idem ọsọn̄ enye ama ọtọn̄ọ ndikụre. Akinori ikanamke aba n̄kpọ ke ntak ntan̄idem ye udọn̄ ikpọ n̄kpọ, edi ama edikụt ke idemesie se Mme N̄ke 14:30 etịn̄de, ete: “Sụn̄ sụn̄ esịt edi uwem obụkidem.”

Afo ada nso nte ata akpan utịtmbuba? Ewe utịtmbuba ke afo ekpesịm man anam fi enen̄ede okop inemesịt? Ndi edi ndikop inemesịt ke ndọ fo? M̀mê ndisịn eti itiat idakisọn̄ nnọ nditọ fo? Ndinam ediwak ufan? Uwem ndinem fi? Kpukpru emi ẹdi nti n̄kpọ oro ikpanamde. Ke nditịm ntịn̄, Bible ọdọhọ inam mme n̄kpọ emi, edi idọhọke ida mmọ nte akpan uduak oro idude uwem. Bible owụt akpan n̄kpọ oro ekemede ndinam inen̄ede ikop inemesịt ete: “Bak Abasi, nyụn̄ nịm mbet esie: koro emi edi eke kpukpru owo.” (Ecclesiastes 12:13) Ke ini nnyịn mînịmke mbet emi, uwem inyeneke uduak, ayat owo esịt, onyụn̄ efek owo. Edi Bible ọn̄wọn̄ọ ọnọ nnyịn ete: “Ama edi owo eke ọbuọtde idem esie ye Jehovah, ọfọfọn ọnọ enye!”—Mme N̄ke 16:20.

Nte Bible Esinamde Mme Owo Ẹkpụhọde

Apostle Paul ekewet ete: “Ikọ Abasi enyene uwem onyụn̄ enyene odudu.” Enye ekeme ndibe ndụk uduak ye ekikere esịt owo nte edisọp ofụt iso iba. (Mme Hebrew 4:12) Bible enyene odudu ndikpụhọde nte mme owo ẹdude uwem sia enye anamde mmọ ẹkụt nte mmọ ẹnen̄erede ẹtie, idịghe nte mmọ ẹkerede nte mmimọ itiede. Oro ayanam mbon oro ẹnyenede eti esịt ẹfiọk ke oyom mmimọ inam ukpụhọde. Ke uwụtn̄kpọ, Paul ama etịn̄ aban̄a mbon oro ẹkedude ke esop Corinth eset, emi ini kiet ko ẹkedide mme inọ, mme akpammịn, mme esịn efịbe, ye mme n̄kpọ ntre, ete: “Ndusụk mbufo ẹketie ntem. Edi ẹmeyet mbufo . . . ẹsana . . . ke spirit Abasi nnyịn.” (1 Corinth 6:9-11) Edisana spirit Jehovah ke anam utom onyụn̄ enyene odudu ntre mfịn, onyụn̄ ekeme ndinam mme owo ẹkpụhọde.

Mario, emi odụn̄de ke Europe, ekedi owo afai emi ekesin̄wọn̄de onyụn̄ anyamde ikọn̄ekpo. Isan̄ kiet, ke ini bodisi kiet okomụmde ikọn̄ekpo esie, esịt ama ayat enye tutu enye amia bodisi oro onyụn̄ abiat ubomisọn̄ esie. Ke ẹsiode emi ẹfep, Mario ikenyeneke utom onyụn̄ enen̄ede akama isọn. Enye ama enyịme ndikpep Bible ke ini ọkọfiọkde ke imọ idikemeke ndikọk mfịna imọ ke idemmọ. Nte Mario akanamde ukpụhọde, enye ama edikama idem ọfọn, etre ndin̄wọn̄ ye ndinyam ikọn̄ekpo, onyụn̄ etre afai. Idem ama akpa ediwak owo emi ẹkefiọkde nte enye ekesidude uwem. Mmọ ẹma ẹsidọhọ enye ebet kan̄a ẹnyụn̄ ẹbụp ẹte, “Mario, ndi afo edi emi?”

Nso isinam mme utọ owo nte Akinori ye Mario ẹkpụhọde uwem mmọ, ẹnen̄ede ẹma uwem, ẹnyụn̄ ẹkop idatesịt ndidu uwem? Ana in̄wan̄-in̄wan̄ ke edi obufa ifiọk Abasi oro mmọ ẹnyenede ebe ke ndikpep Bible. Abasi ikpọn̄ ekeme ndinọ eti item oro iyomde man ifori uwem nnyịn idahaemi inyụn̄ inyene idotenyịn nsinsi uwem ke ini iso. Sia Jehovah Abasi edide Ete, enye ada Bible etịn̄ ikọ ọnọ nnyịn ete: “Eyen mi, kop, nyụn̄ nịm ikọ mi; ndien isua uwem fo ẹyewak. . . . Ke ini afo asan̄ade, ukot fo idikọmọkede; ndien ke ini afo efehede itọk, udutuakke ukot uduọ. Sọn̄ọ mụm item kama, kûyak: nịm enye; koro enye edide uwem fo.” (Mme N̄ke 4:10-13) Mmọn̄ọ, ndi odu item oro ọkpọfọnde akan ndausụn̄ oro Andibot ọnọde?

 [Ekebe/Ndise ke page 7]

Nti Item Mfịn

Bible ọdọn̄ọ mme akpan nti edumbet oro ẹkemede ndida nnyịn usụn̄ ke ofụri uwem nnyịn. Ndusụk uwụtn̄kpọ ẹdi emi:

• Ndinyene eti itie ebuana ye mbon en̄wen

“Ke ntre, kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.” —Matthew 7:12.

“Owo emi enịmde idem ke n̄kpri-n̄kan ke otu mbufo kpukpru edi enye emi okponde.”—Luke 9:48.

“Ẹma ndikama isenowo.”—Rome 12:13.

• Ndikan ndiọi edu

“Owo eke asan̄ade ye mme enyene-ibuot eyenyene ibuot: edi nsan̄a mbon ndisịme ọyọdiọn̄ ọdiọk.”—Mme N̄ke 13:20.

“Kûda ke otu mme ofobo wine, emi ẹtade unam ke en̄weme.”—Mme N̄ke 23:20.

“[Kûmana iman] ye owo iyatesịt.” —Mme N̄ke 22:24.

• Ndinam ndọ enyene iwụk

“Yak owo mbufo kiet kiet enen̄ede ama n̄wan esie nte enye amade idemesie; ke n̄kan̄ eken, yak n̄wan enyene ntotụn̄ọ ukpono ọnọ ebe esie.”—Ephesus 5:33.

“Ẹsịne esịt ima emi asan̄ade ye mbọm, mfọnido, nsụhọdeidem, ifụre ifụre ido, ye anyanime. Ẹka iso ẹyọ kiet eken ẹnyụn̄ ẹfen kiet eken ke ofụri esịt.”—Colossae 3:12, 13.

• Ndin̄wam nditọwọn̄

“Tịm teme eyenọwọn̄ nte ekemde ye usụn̄ esie: ke ini enye akabarede idem akani owo, enye idikpọn̄ke enye.”—Mme N̄ke 22:6.

“Mme ete, ẹkûfiomo nditọ mbufo, edi ẹka iso ẹkama mmọ ke ntụnọ ye ke usụn̄ ukere n̄kpọ Jehovah.”—Ephesus 6:4.

• Ndikpan utọk

“Sụn̄-sụn̄ ibọrọ akabade ifiopesịt efep: edi uyat ikọ edemede iyatesịt.” —Mme N̄ke 15:1.

“Ẹda iso ke ndinọ kiet eken ukpono.”—Rome 12:10.

Ọkpọkọm mme owo ẹdi ufan, edieke ẹwetde-wet n̄kpọ ẹnịm, emi esikpan eneni ndidu ke mbubehe. Ntem, Jeremiah asan̄autom Abasi ekewet ete: “N̄wet nsịn ke n̄wed, mbọp nsịn idiọn̄ọ, nnyụn̄ n̄kot ntiense ẹdi, nnyụn̄ ndomo silver ke n̄kpọ udomo.”—Jeremiah 32:10.

• Ndinyene nti ekikere

“N̄kpọ ekededi eke ẹdide akpanikọ, . . . eke ẹmade, . . . eke ẹwọrọde eti etop, n̄kpọ ekededi eke eti ido odude ye n̄kpọ ekededi eke itoro odude, ẹka iso ẹkere mme n̄kpọ emi.”—Philippi 4:8.

Bible akpan ndisikere ndiọi ekikere onyụn̄ asua ọnọ “mbon oro ẹsemede ẹban̄a itie mmọ ke uwem.” Enye ọdọhọ ete: “Ẹdat esịt ke idotenyịn.”—Jude 4, 16; Rome 12:12.

Ndida nti edumbet emi nsịn ke edinam ayanam nnyịn inyene emem, ikop inemesịt, onyụn̄ anam isịm mme n̄kpọ oro Abasi oyomde man ibọ edidiọn̄ esie. Bible ọdọhọ ete: “Nti owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

[Mme Ndise ke page 5]

Ke ini Akinori ekedide anam-mbubehe (ufien) ye nte enye asan̄ade ye n̄wan esie ọkwọrọ ikọ ke inemesịt idahaemi