Se Idinamde Bible An̄wan̄a Fi

1. Ben̄e Andinyene An̄wam Fi

Ninfa emi odụn̄de ke Italy ọdọhọ ete: “Ama odu ini oro n̄kesikotde Bible mbemiso ndụkde idap. N̄kesikot sia mma mfiọk ke enye edi Ikọ Abasi, ndien okposụkedi mîkesinemke mi, ama ọdọn̄ mi ndifiọk se Abasi akanamde ẹwet ke Bible. Mma nduak ndikot enye n̄kụre. Ke ntọn̄ọ ntọn̄o, ama an̄wan̄a mi, edi mma n̄kot n̄kesịm ebiet oro mîkan̄wan̄ake mi, nnyụn̄ ntre do.”

NDI emenyene ukem mfịna oro Ninfa ekenyenede? Se iwọrọde ediwak owo edi oro. Edi nte ẹkenemede ke akpa ibuotikọ, Jehovah Abasi, kpa Andinyene Bible, oyom Ikọ esie an̄wan̄a fi. Edi nso ikeme ndinam Ikọ esie an̄wan̄a fi? Akpa n̄kpọ oro akpanamde edi ndiben̄e Abasi an̄wam fi.

Mme owo ẹkedọhọ ke mme apostle Jesus ‘ifiọkke n̄wed ẹnyụn̄ edi mme usụhọde owo’ sia mmọ mîkọbọhọ ukpep ido ukpono ke ufọkn̄wed mme rabbi. (Utom 4:13) Kpa ye oro, Jesus ama ọn̄wọn̄ọ ọnọ mmọ ke Ikọ Abasi ekeme ndin̄wan̄a mmọ. Didie? Jesus ọkọdọhọ ete: “Edi andin̄wam, kpa edisana spirit, emi Ete edinọde edi ke enyịn̄ mi, enye oro eyekpep mbufo kpukpru n̄kpọ.” (John 14:26) Abasi akada edisana spirit esie obot ererimbot ye kpukpru mme odu-uwem n̄kpọ oro ẹdude ke esịt. (Genesis 1:2) Enye  ke enye okonyụn̄ ada ọnọ n̄kpọ nte owo 40 odudu ẹwet se enye oyomde ke Bible. (2 Peter 1:20, 21) Spirit oro ekeme ndin̄wam kpukpru mbon oro ẹyomde Bible an̄wan̄a mmimọ.

Afo ekeme ndisan̄a didie nnyene edisana spirit Abasi? Enyene ndiben̄e ke mbuọtidem. Ke nditịm ntịn̄, ekeme ndiyom eben̄e ediwak ini. Jesus ọkọdọhọ ete: “Ẹka iso ẹben̄e, ndien ẹyenọ mbufo . . . . Edieke mbufo . . . ẹfiọkde ndinọ nditọ mbufo nti enọ, adan̄a didie akan oro ke Ete mbufo ke heaven ediyak edisana spirit ọnọ mbon oro ẹben̄ede enye!” (Luke 11:9, 13) Jehovah ayatat ubọk ọnọ mbon oro ẹben̄ede enye edisana spirit ke ofụri esịt. Edisana spirit emi ekeme ndinam Bible an̄wan̄a fi kpa ye oro ẹkewetde enye ediwak tọsịn isua emi ẹkebede. Spirit Abasi ekeme n̄ko ndinam fi enyene ọniọn̄ oro edinamde fi ada okopodudu etop oro odude ke Bible esịn ke edinam.—Mme Hebrew 4:12; James 1:5, 6.

Ntre, ini ekededi oro oyomde ndikot Bible, bọn̄ akam ben̄e Abasi edisana spirit man anam Ikọ esie an̄wan̄a fi.