Di Dise N̄wọrọnda Itie Umịn̄n̄wed

ETIE nte idịghe akpa okotde utọ magazine emi edi emi. Ekeme ndidi Mme Ntiense Jehovah ẹsidi ufọk fo ẹdinọ fi Enyọn̄-Ukpeme ye Awake! man an̄wam fi etịm ọfiọk Bible. Mîdịghe ekeme ndidi emesikụt Mme Ntiense ẹnọde mme owo utọ n̄wed ukpep Bible emi ke efak m̀mê ke urua. Ke akpanikọ, ẹsisuan magazine emi awak ebe miliọn 35 kpukpru ọfiọn̄, ndien idụhe magazine ido ukpono en̄wen emi ẹmịn̄de awak ntem ke ofụri ererimbot.

Ndi akanam emetie ekere nte ẹsisan̄ade ẹmịn̄ kpukpru n̄wed emi ye itie emi ẹmịn̄de mmọ? Man ibọrọ mbụme emi, ẹyak itịn̄ n̄kpọ iban̄a kiet ke otu ufọk umịn̄n̄wed emi Mme Ntiense Jehovah ẹdade ẹmịn̄ n̄wed ke nsio nsio idụt. Iyom ndineme mban̄a enye emi odude ke Wallkill ke New York ke U.S.A. Ediwak mbon oro ẹsikotde n̄wed nnyịn ke ofụri ererimbot ikemeke ndika ufọk umịn̄n̄wed Mme Ntiense Jehovah oro odude ke United States, ntre se idinemede ye mme ndise emi ẹdude mi ẹyenen̄ede ẹn̄wam mmọ.

Akpa kan̄a, ẹsiwewet se ẹdimịn̄de. Itieutom Uwetn̄wed ke Brooklyn ke New York ẹyewet se ẹdimịn̄de ẹnọ ke Intanet ẹka itieutom oro ẹdidọn̄de mme ndise inyụn̄ itịm se ẹkewetde ediye ediye ke n̄wed. Ẹsida se mmọ ẹbọde emi ẹnam mbatmbat n̄kpọ umịn̄n̄wed. Ẹsitan̄ n̄kpọ nte etuek babru 1,400 ẹka Wallkill kpukpru ọfiọn̄, ndien ẹsimịn̄ ata ediwak n̄wed do kpukpru usen. Ẹsitan̄ etuek babru emi kiet odobide nte ekpat simen 27 ye ubak ẹdọn̄ ke ikpọ ukwak umịn̄n̄wed ition emi ẹma ẹketatan̄ mbatmbat n̄kpọ umịn̄n̄wed ẹfak man ẹda ẹmịn̄ n̄kpọ ke mme babru oro. Ẹyemịn̄ n̄kpọ ke babru oro, ẹkpok, ẹnyụn̄ ẹnam enye edi page 32 nte magazine enye emi osụk okotde mi. Nso ndien kaban̄a mme n̄wed? Ke itie udian n̄wed, ẹsikịm mme ikọn̄n̄wed ẹdian akabade eboho n̄wed. Kiet ke otu masịn iba oro ẹsidade ẹdian n̄wed ekeme ndidian nsọsọn̄ ikpaedem n̄wed 50,000 m̀mê adian mmemmem ikpaedem n̄wed 75,000 ke usen. Masịn udiann̄wed enye eken ekeme ndidian mmemmem ikpaedem n̄wed 100,000 ke usen kiet.

Ke 2008, ẹma ẹmịn̄ se iwakde ibe n̄wed 28,000,000 ke itie umịn̄n̄wed emi, ndien se ibede miliọn iba ye tọsịn ikie itiokiet ke otu emi ẹkedi Bible. Kpa isua oro, ẹma ẹmịn̄ magazine 243,317,564. Ẹbon mme n̄wed ukpep Bible ke n̄kpọ nte usem 380 ke itie umịn̄n̄wed emi. Nso ke ẹsinam ke ẹma ẹmịn̄ mme n̄wed emi ẹma?

Esop Mme Ntiense Jehovah 12,754 emi ẹdude ke ofụri United States ye esop 1,369 emi ẹdude ke Caribbean ye Hawaii ẹsitobo n̄wed ke itie umịn̄n̄wed emi. Mbon oro ẹnamde utom  ke Itieutom Unọ N̄wed Ọwọrọ ẹsinọ mme n̄wed oro ẹtobode mi ẹsọk nsio nsio esop oro ẹketobode mmọ. Kpukpru ọfiọn̄, ẹsinọ ata ediwak n̄wed ẹsọk mme esop ke United States.

Mme owo oro ẹnamde utom ke ufọk umịn̄n̄wed emi ẹkam ẹdi akpan n̄kpọ ẹkan mme masịn oro ẹdade ẹmịn̄ kpukpru n̄wed emi. Se ikande owo 300 ẹnam utom ke nsio nsio ikpehe ke ufọk umịn̄n̄wed emi, utọ nte Itie Umịn̄n̄wed, Itie Udian N̄wed, Itieutom Unọ N̄wed Ọwọrọ, ye ntre ntre eken. Kpukpru mmọ ẹnam utom emi ke imaesịt, owo ikpehe mmọ okụk, ndien ọtọn̄ọde ke owo isua 19 esịm owo isua 92 ẹnam utom mi.

Mmọ ẹnen̄ede ẹkere ẹban̄a mbon oro ẹdibọde mme n̄wed emi ke idatesịt, ẹma ẹda mmọ ẹkpep mmimọ n̄kpọ, ẹsịn udọn̄ ẹnọ mmimo, edinyụn̄ ẹmade ndidu uwem n̄kekem ye mme edumbet Abasi oro ẹnemede ke mme n̄wed emi. Nnyịn imekere ke afo emetiene esịne ke otu emi, n̄ko ke mme n̄wed oro ẹmịn̄de mi ayan̄wam fi aka iso ekpep n̄kpọ aban̄a Jehovah Abasi ye Jesus Christ man enyene nsinsi uwem.—John 17:3.

[Mme ndise ke page 16]

 [Ndise ke page 17]