Eti Ido Ukpono Ekpep Mme Owo Ndikpono Ikọ Abasi

JESUS ama ekpep mme owo ndikpono Ikọ Abasi, kpa Bible. Imekeme ndikụt emi ke se Jesus ọkọbọrọde Devil ke ini Devil okodomode enye. (Matthew 4:4-11) Ke uwụtn̄kpọ, nso ke Jesus akanam ke ini Satan ọkọdọhọde enye anam itiat akabade uyo? Jesus ama ebe idomo esie ke ndikot Deuteronomy 8:3 oro Abasi ọkọnọde Moses odudu ewet. Ndien didie ke Jesus akanam n̄kpọ ke ini Devil ọkọn̄wọn̄ọde ndinọ enye kpukpru obio ubọn̄ ererimbot emi edieke enye atuakde ibuot ọnọ imọ ini kiet kpọt? Jesus ama esịn enọ oro onyụn̄ okot se idude ke Deuteronomy 6:13 ọnọ Satan.

Afo nyụn̄ kere ise, Jesus akakam edi Eyen Abasi, edi enye esida Bible ọsọn̄ọ se enye ekekpepde. Akananam enye iyakke item owo anam enye ofụmi Ikọ Abasi. (John 7:16-18) Edi ediwak mme adaiso ido ukpono oro ẹkedude ke eyo Jesus ikenyeneke utọ ukpono emi inọ Ikọ Abasi. Ntak emi mmọ mîkenyeneke? Koro mmọ ẹma ẹtọn̄ọ ndikere ke item owo ọfọn akan Edisana N̄wed Abasi. Jesus ọkọdọhọ mmọ nnennen nnennen ete: “Mbufo ẹma ẹnam ikọ Abasi akabade edi ikpîkpu kaban̄a item mbufo. Mbufo mbon mbubịk, Isaiah etetịm etịn̄ nte prophet aban̄a mbufo, ete, mbio emi ẹkpono Mi ke n̄kpọk-inua mmọ; Edi esịt mmọ ada nsan-nsan ye Ami. Edi mmọ ẹkpono Mi ikpîkpu, Sia ẹkpepde item owo ke ukpep-n̄kpọ mmọ.”—Matthew 15:6-9, Edisana Ŋwed Abasi Ibom.

Ata ediwak ido ukpono emi ẹdude ke ererimbot, esịnede mme Christian ye mbon emi mîdịghe Christian ẹsidọhọ ke imokpono  Bible. Edi ido ukpono ifan̄ ke afo ọdiọn̄ọ, emi mîsinamke item owo, idem ke ini oro atuahade ye in̄wan̄-in̄wan̄ ukpepn̄kpọ N̄wed Abasi? Ẹyak ineme uwụtn̄kpọ iba kpọt.

ẸYAK INEME IBAN̄A: Mme udorienyịn̄ ido ukpono.

SE BIBLE EKPEPDE: Jesus ama asua ọnọ mme adaiso ido ukpono eyo esie ke ntak emi mmọ ẹkemade udorienyịn̄ ye uwọrọiso. Enye ọkọdọhọ ke mmọ “ẹma itie-ukpono ke udia, ye ikpọ itie ke mme synagogue, ye ekọm ke an̄wa-urua; ẹnyụn̄ ẹma owo ẹkot mmọ, ẹte, Rabbi (Andikpep mi).” Edi Jesus ọkọdọhọ mbet esie ete: “Ẹkûyak ẹkot mbufo, ẹte, Rabbi; koro Kiet edi Andikpep mbufo, kpukpru mbufo ẹnyụn̄ ẹdi nditọ-ete. Ẹkûnyụn̄ ẹkot ndomo owo kiet ke isọn̄, ẹte, Ete; koro Kiet edi Ete mbufo, kpa Enye emi odude ke heaven.”—Matthew 23:1-10, Edisana Ŋwed Abasi Ibom.

MBỤME: Ndi mme adaiso iso ukpono emi ẹsima ẹnọ mmimọ ikpọ udorienyịn̄ ẹnyụn̄ ẹyom ikpọ itie ke obio, mîdịghe ndi mmọ ẹsinam item Jesus oro ọdọhọde ikûyom ikpọ itie?

ẸYAK INEME IBAN̄A: Ndikama edisọi mbiet ntuak ibuot.

SE BIBLE EKPEPDE: “Kûnam edisọi n̄kpọ unọ idem fo, kûnyụn̄ unam mbiet baba n̄kpọ kiet eke odude ke heaven ke enyọn̄, ye eke odude ke isọn̄ ke idak, ye eke odude ke mmọn̄ ke idak isọn̄; kûnụhọ unọ mmọ, kûnyụn̄ unam n̄kpọ mmọ.—Exodus 20:4, 5, Edisana Ŋwed Abasi Ibom.

Apostle John ọkọdọhọ mme Christian ete: “Ẹkpeme idem ke ndem.”—1 John 5:21, Edisana Ŋwed Abasi Ibom.

MBỤME: Ndi ido ukpono emi anam in̄wan̄-in̄wan̄ ewụhọ Bible oro ọdọhọde ikûda ndisọi mbiet ituak ibuot inọ Abasi?

Emekeme Ndikụt Nnennen Ido Ukpono

Okposụkedi emi ido ukpono ẹwakde etieti mfịn, emekeme ndikụt enye emi adade owo esịm nsinsi uwem. Ediwak n̄kpọ ẹdu ndida mfiọk “ido ukpono emi asanade mînyụn̄ ideheke ke enyịn Abasi.” (James 1:27, New Revised Standard Version.) Mme itie n̄wed Abasi oro inemede ke ibuotikọ emi ekeme ndin̄wam fi okụt ido ukpono emi.

Ntak mûdọhọke Mme Ntiense Jehovah ẹnam mme ibọrọ oro ẹnọde ke mme ibuotikọ emi an̄wan̄a fi? Nte osụk ekerede aban̄a se mmọ ẹnemede ye afo, tiene eti uwụtn̄kpọ mbon Beroea emi ẹkedude ke eyo mme apostle. Ke ẹma ẹkekop se apostle Paul ọkọkwọrọde, mmọ ẹma “ẹdụn̄ọde n̄wed Abasi ke usen ke usen, ẹte ifiọk m̀mê mme ikọ oro ẹkem ntre.” (Utom 17:11, Edisana Ŋwed Abasi Ibom.) Edieke enyenede ukpono ọnọ Bible onyụn̄ enen̄erede ekpep enye nte mbon Beroea, oyokụt ido ukpono oro adade esịm uwem. Akam esịne fi ke ubọk idahaemi ndimek m̀mê ayama ndidụk ido ukpono oro m̀mê udumaha.

[Se ẹwetde ke ikpọ abisi ke page 9]

Ewe Ido ukpono esịn udọn̄ ọnọ mme owo ndikpep Ikọ Abasi man ẹfiọk m̀mê se mmọ ẹkpepde enen̄ede edi akpanikọ?