Eti Ido Ukpono Ekpep Mme Owo Ndima Kiet Eken

BIBLE ọdọhọ ete: “Owo eke mîmaha ima ifiọkke Abasi, koro Abasi edi ima.” (1 John 4:8, Edisana Ŋwed Abasi Ibom.) Ke ntem, ido ukpono oro Abasi enyịmede ekpenyene ndikpep mme owo ndima kiet eken.

Ediwak ido ukpono ẹnam nti utom ke ndise mban̄a mbon udọn̄ọ, n̄kani owo, ye mme ubuene. Mmọ ẹsisịn udọn̄ ẹnọ mbon ido ukpono mmọ ẹnam item apostle John oro ọdọhọde ete: “Edi owo eke enyenede inyene ererimbot emi, onyụn̄ okụtde eyen-ete esie ke unana, onyụn̄ eberide mbọm abaha enye, ima Abasi ekeme didie ndidụn̄ owo oro ke esịt? N̄kpri nditọ mi, ẹyak nnyịn ikûma ke  ikọ-inua ye ke edeme, edi yak nnyịn ima ke edinanam ye ke akpanikọ.”—1 John 3:17, 18, Edisana Ŋwed Abasi Ibom.

Edi nso isitịbe ke ini ekọn̄? Ndi ikponyụn̄ inam ewụhọ Abasi oro ọdọhọde ‘ima mbọhọidụn̄ nnyịn nte idem nnyịn’ ke ini idude ke emem, edi ifre utọ ewụhọ oro ke ini ekọn̄?—Matthew 22:39, Edisana Ŋwed Abasi Ibom.

Jesus ọkọdọhọ ete: “Mbufo ẹma ẹma kiet eken, kpukpru owo ẹyeda oro ẹfiọk ẹte mbufo ẹdi mbet Mi.” (John 13:35, Edisana Ŋwed Abasi Ibom.) Nte osụk ọbọrọde mme mbụme oro ẹtienede mi, bụp idemfo ete: ‘Ndi mbon ido ukpono emi ẹsinanam ẹwụt ke imama mme owo kpukpru ini, idịghe nditetịn̄ ke inua kpọt?’

ẸYAK INEME IBAN̄A: Ekọn̄.

SE BIBLE EKPEPDE: Jesus ọkọdọhọ mme mbet esie ete: “Ndọhọ mbufo emi ẹkopde ikọ Mi, nte, Ẹma mme asua mbufo, ẹnyụn̄ ẹnam ufọn ẹnọ mmọ eke ẹsuade mbufo.—Luke 6:27, Edisana Ŋwed Abasi Ibom.

Ke ini mbonekọn̄ ẹkedide ndimụm Jesus, apostle Peter ama osio ofụt odomo ndinyan̄a Jesus. Edi Jesus ọkọdọhọ ete: “Sịn ofụt fo ke efọk: koro kpukpru owo eke ẹmende ofụt ẹyekpan̄a ke ofụt.”—Matthew 26:52, Edisana Ŋwed Abasi Ibom.

Apostle John ekewet ete: “Ẹda emi ẹyarade ẹfiọk nditọ Abasi ye nditọ Satan; baba owo kiet eke mînamke edinen ido idịghe eke Abasi, ndien edi ntre ye owo emi mîman̄a eyen-ete esie. Koro emi edi etop emi mbufo ẹkekopde toto ke editọn̄ọ, ẹte, nnyịn ikpama kiet eken; ikûbiet Cain, emi ekedide eke andidiọk, onyụn̄ owotde eyen-ete esie.”—1 John 3:10-12, Edisana Ŋwed Abasi Ibom.

MBỤME: Ndi ido ukpono emi esisịn udọn̄ ọnọ ikọt mmọ ẹka ekọn̄?

ẸYAK INEME IBAN̄A: Mbre Ukara.

SE BIBLE EKPEPDE: Ke mme owo ẹma ẹkekụt ke Jesus ekeme ndinam utịben̄kpọ, ndusụk mmọ ẹma ẹyom usụn̄ nte ẹkpenamde enye etiene abuana ke mbre ukara obio mmimọ. Nso ke Jesus akanam? “Ke ini Jesus ọfiọkde ete mmọ ẹyom ndidi ndimụm Imọ nnịm ke edidem, Enye ọtọn̄ọ ntak afiak ọdọk ke akamba obot ke Idem Esie ikpọn̄.”—John 6:15, Edisana Ŋwed Abasi Ibom.

Ke ini ẹkemụmde Jesus ẹnyụn̄ ẹsu nsu ẹdori enye ẹte ke enye anam mme owo ẹn̄wana ye ukara, enye ọkọdọhọ ete: “Obio Ubọn̄ Mi idịghe eke ererimbot emi: edieke Obio Ubọn̄ Mi ekpedide eke ererimbot emi, ikọt Mi ẹkpen̄wana en̄wan, mbak ẹdiyak Mi ẹsịn mme Jew ke ubọk: edi Obio Ubọn̄ Mi itoho do.”—John 18:36, Edisana Ŋwed Abasi Ibom.

Ke ini Jesus ọkọbọn̄de akam ọnọ Abasi aban̄a mme mbet esie, enye ọkọdọhọ ete: “Ami n̄kayak ikọ Fo nnọ mmọ; ndien ererimbot asasua mmọ, koro mmọ mîdịghe eke ererimbot, kpa nte Ami mmendịghe eke ererimbot.”—John 17:14, Edisana Ŋwed Abasi Ibom.

 MBUME: Ndi ido ukpono emi ẹtiene uwụtn̄kpọ Jesus inyụn̄ ibuanake ke mbre ukara, idem ọkpọkọm oro ayanam ndusụk mme ebre mbre ukara ẹsua mmọ?

ẸYAK INEME IBAN̄A: Asari m̀mê editen̄e owo enyịn.

SE BIBLE EKPẸPDE: Ke akpa Gentile ama akakabade edi Christian, apostle Peter ama ọdọhọ ete: “Abasi iten̄eke owo enyịn: edi ke kpukpru idụt Enye adadara owo ekededi eke abakde Enye onyụn̄ anamde nti ido.”—Utom 10:34, 35, Edisana Ŋwed Abasi Ibom.

James ekewet ke leta oro enye ọkọnọde esọk mme Christian oro ẹkedude ke eyo esie ete: “Nditọ-ete mi, ẹkûda mbuọtidem emi mbufo ẹnyenede ye Ọbọn̄ nnyịn Jesus Christ, emi edide Ubọn̄, ẹdian ye uten̄e-enyịn. Koro edieke owo emi esịnede n̄kpanuen-a-gold ye ediye ọfọn̄idem odụkde edi ke esop mbufo, eyen ubuene emi esịnede edidehe ọfọn̄ onyụn̄ odụkde edi; ndien mbufo ẹsede esịne ediye ọfọn̄idem, ẹdọhọ enye ẹte, Tetie mi ke eti itie; ẹnyụn̄ ẹdọhọ eyen ubuene ẹte, Da do, mîdịghe, Sụhọde mi ke isọn̄ ke mben udoriukot mi: nte mbufo inyeneke esịt iba, inyụn̄ idaha ukwan̄ ekikere ibiere n̄kpọ inọ owo?”—James 2:1-4, Edisana Ŋwed Abasi Ibom.

MBỤME: Ndi ido ukpono emi ekpep ke kpukpru owo ẹdi ukem ukem ke enyịn Abasi, n̄ko ke ikpanaha ebiet emi owo otode ye m̀mê enye edi imọ m̀mê ubuene anam isari enye asari?

[Se ẹwetde ke ikpọ abisi ke page 7]

Ewe ido ukpono ekpep ikọt mmọ ete ẹkûyak mbre ukara, ebiet emi owo otode, ye se owo enyenede ọtọ ubahade ke otu mmọ?