San̄a Kpere Abasi

Ebiereikpe Emi Esikpede Edinen Ikpe

Numbers 20:2-13

MME owo ẹkeme ndibiere ikpe nte mînenke mîdịghe ẹmia owo ufen ẹbe ubọk, edi Jehovah Abasi emi “amade edinen ikpe” isinamke ntre. (Psalm 37:28) Okposụkedi emi enye edide Abasi ime, enye isinyịmeke ẹnam se ẹmama. Enye esikpe edinen ikpe. Kere ban̄a nte enye akanamde n̄kpọ aban̄a utọk ye nsọn̄ibuot, nte ẹtịn̄de ke Numbers ibuot 20.

Ke ini nditọ Israel ẹkekperede utịt isan̄ mmọ ke wilderness, mmọ ikenyeneke edin̄wọn̄ mmọn̄. * Ntre mmọ ẹma ẹtọhọ ye Moses ye Aaron ẹte: “Nsinam mbufo ẹkedade mbon esop Jehovah ẹdi ke wilderness emi, man nnyịn, ye ufene nnyịn ikpan̄a ke esịt?” (Ufan̄ikọ 4) Mmọ ẹkedọhọ ke wilderness oro ekedi “idiọk ebiet” emi “eto fig, ye vine, ye eke pomegranate” mîdụhe—kpa mfri emi ke nditọ Israel oro ẹkekade uyep ẹkeda ke Isọn̄ Un̄wọn̄ọ ẹnyọn̄ ẹdi ediwak isua ko ke edem—ye nte ke “mmọn̄ eke in̄wọn̄de inyụn̄ idụhe.” (Ufan̄ikọ 5; Numbers 13:23) Ke nditịm ntịn̄, mmọ ẹkeduọhọ Moses ye Aaron sia wilderness oro iketiehe nte eti isọn̄ oro mme ete ete mmọ emi ẹkedide mbon nsụkuyo, mîkamaha ndidụk!

Jehovah ikọkpọn̄ke mbon nsọn̄ibuot oro. Utu ke oro, enye ama ọdọhọ Moses anam n̄kpọ ita emi: ada esan̄ esie, obon mbon esop ọtọkiet, onyụn̄ ‘ọdọhọ itiat oro ke iso mmọ; ndien enye ọyọwọrọ mmọn̄ esie.’ (Ufan̄ikọ 8) Moses ama anam iba ke otu n̄kpọ ita oro ẹkedọhọde enye anam, edi inamke ọyọhọ ita. Utu ke ndida mbuọtidem ntịn̄ ikọ nnọ itiat oro, enye akada iyatesịt etịn̄ ikọ ọnọ nditọ Israel ete: “Mbufo mbon nsọn̄ibuot, ẹkop ndien; nte nnyịn inyene ndinam mmọn̄ ọwọrọ ke itiat emi nnọ mbufo?” (Ufan̄ikọ 10; Psalm 106:32, 33) Ekem Moses eyịbi itiat oro utịm ikaba, “ndien mmọn̄ ọwọrọ ediwak.”—Ufan̄ikọ 11.

Ke ntem, Moses ye Aaron ẹma ẹnam akwa idiọkn̄kpọ. Abasi ama ọdọhọ mmọ ete: “Mbufo [ikokopke] uyo mi.” (Numbers 20:24) Moses ye Aaron ndiketre ndikop uyo Abasi ama anam mmọ n̄ko ẹdi mbon nsọn̄ibuot, emi mmọ ẹkekotde nditọ Israel. Ubiereikpe Abasi akana in̄wan̄-in̄wan̄ ntem: Moses ye Aaron ididaha nditọ Israel idụk Isọn̄ Un̄wọn̄ọ. Ndi ubiomikpe oro ama okpon akaha? Ihih, ye ediwak ntak.

Akpa ntak edi ke Abasi ikọdọhọke Moses etịn̄ ikọ ọnọ nditọ Israel, idịghe nditetịn̄ mban̄a emi enye okokotde mmọ mbon nsọn̄ibuot. Ọyọhọ ntak iba edi ke Moses ye Aaron ikọnọhọ Abasi ubọn̄. Abasi ọkọdọhọ ete: ‘Mbufo ikokponoke mi.’ (Ufan̄ikọ 12) Moses ye Aaron ndikọdọhọ ‘nte nnyịn inyene ndinam mmọn̄ ọwọrọ,’ eketie nte ke enye ye Aaron—idịghe Abasi—ẹkenam mmọn̄ ọwọrọ ke utịbe utịbe usụn̄. Ọyọhọ ntak ita edi ke ubiomikpe oro ekedi ukem ye nte Abasi ekebierede ukem ikpe oro ke ini edem. Abasi ikayakke mme ete ete mmọ oro ẹkedide mbon nsọn̄ibuot ẹdụk Canaan, ntre enye ikonyụn̄ iyakke Moses ye Aaron ẹdụk. (Numbers 14:22, 23) Ọyọhọ ntak inan̄ edi ke Moses ye Aaron ẹkedi mme adausụn̄ Israel. Mbon oro ẹkamade ikpọ ifetutom ẹdinam ibat ikan inọ Abasi.—Luke 12:48.

Jehovah esikpe edinen ikpe. Sia enye amade edinen ikpe, enye ikemeke ndikwan̄a ikpe. Ke akpanikọ, odot ibuọt idem ye utọ Ebiereikpe oro inyụn̄ ikpono enye.

[Ikọ Idakisọn̄]