Inyene Emi Abasi Ọnọde

NDI Abasi ọyọnọ fi inyene edieke ọsọn̄ọde ada ye enye? Ekeme ndidi ntre, edi ekeme ndidi ididịghe orụk inyene emi afo ekerede. Da Mary eka Jesus ke uwụtn̄kpọ. Angel Gabriel ama ọbiọn̄ọde enye ke iso onyụn̄ ọdọhọ enye ke enye edi n̄wan emi Abasi ‘ọfọnde akwa mfọn’ ye nte ke enye ayaman Eyen Abasi. (Luke 1:28, 30-32) Edi enye ikedịghe imọ owo. Ke ini Mary akawade uwa ọnọ Abasi ke Jesus ama akamana, enye ọkọnọ “mbomon̄kuku iba m̀mê nditọ ibiom iba,” emi mme ubuene ẹkesinọde Jehovah.—Luke 2:24; Leviticus 12:8.

Ndi Mary ndikedi ubuene ọwọrọ ke Abasi ikamaha enye? Iwọrọke ntre. Ke ini enye akakade ekese Elizabeth iman esie, “Elizabeth [ama] ọyọhọ ye edisana spirit, enye onyụn̄ ofiori ke ọkpọsọn̄ uyo ete: ‘Ọfọfọn ọnọ fi [Mary] ke otu iban, onyụn̄ ọfọfọn ọnọ mfri idịbi fo!’” (Luke 1:41, 42) Mary ama enyene akwa ifet ndidi eka edima Eyen Abasi ke isọn̄.

Jesus ke idem esiemmọ ikedịghe imọ owo. Ete ye eka esie ẹkedi ubuene, mmọ ẹkebọk enye ke obio oro mîkedịghe obio uforo, enye okonyụn̄ edi ubuene ke ofụri eyouwem esie mi ke isọn̄. Ini kiet, enye ama asian eren oro okoyomde ndidi mbet esie ete: “Mme ebua ikọt ẹnyene ndudu, mme inuen enyọn̄ ẹnyụn̄ ẹnyene mme efọk, edi Eyen owo inyeneke ebiet eke enịmde ibuot esie.” (Luke 9:57, 58) Edi Jesus Christ ndikenyịme ndidi isọn̄ akam anam mme mbet esie ẹnyene uwak inyene. Apostle Paul ekewet ete: “Enye ama akabade edi ubuene ke ntak mbufo, man mbufo ẹkpekabade ẹdi mme enyene-n̄kpọ owo oto ke unana esie.” (2 Corinth 8:9) Nso orụk inyene ke Jesus ọkọnọ mme mbet esie? Ndien nso orụk inyene ke enye ọnọ nnyịn mfịn?

Nso Orụk Inyene?

Inyene obụkidem isiwakke ndiyak owo enyene mbuọtidem, sia owo inyene ekeme ndibuọt idem ke okụk esie utu ke Abasi. Jesus ọkọdọhọ ete: “Edidi ọkpọsọn̄ n̄kpọ didie ntem mbon emi ẹnyenede okụk ndidụk  ke obio ubọn̄ Abasi!” (Mark 10:23) Do, an̄wan̄a ke idịghe inyene obụkidem ke Jesus ọkọnọ mme mbet esie.

Ke nditịm ntịn̄, ata ediwak Christian ke akpa isua ikie ẹkedi ubuene. Ke ini eren oro akamanade mbụn̄ọ ekeben̄ede Peter okụk, Peter ọkọdọhọ enye ete: “Nnyeneke silver ye gold, edi se nnyenede ke nnọ fi: Ke enyịn̄ Jesus Christ eyen Nazareth, san̄a!”—Utom 3:6.

Se James mbet eketịn̄de n̄ko owụt ke mme ubuene ẹkewak ẹkan ke esop Christian. Enye ekewet ete: “Ẹkpan̄ utọn̄, ndima nditọete mi. Nte Abasi ikemekke mbon oro ẹdide ubuene ke mme n̄kpọ eke ererimbot ete ẹdi mme enyene-n̄kpọ owo ke mbuọtidem ye mme andida obio ubọn̄ nnyene, emi enye ọkọn̄wọn̄ọde ndinọ mbon oro ẹmade enye?” (James 2:5) Apostle Paul ama etịn̄ n̄ko ke owo ikokotke ediwak “mbon oro ẹnyenede ọniọn̄ ke ido obụkidem” m̀mê ‘mbon oro ẹkopde odudu’ m̀mê “mbọn̄” ẹdidi ubak esop Christian.—1 Corinth 1:26.

Nso orụk inyene ke Jesus ọkọnọ mme mbet esie sia mîdịghe inyene obụkidem ke enye ọkọnọ? Jesus ọkọdọhọ ntem ke leta oro enye ọkọnọde ẹsọk esop ke Smyrna: “Mmọfiọk ukụt ye unana fo—edi afo emenyene inyene.” (Ediyarade 2:8, 9) Okposụkedi emi mme Christian ke Smyrna ẹkedide ubuene, mmọ ẹma ẹnyene inyene oro ẹkesọn̄de urua ẹkan silver m̀mê gold. Mmọ ẹma ẹnyene inyene sia ẹkebuọtde idem ẹnyụn̄ ẹsọn̄ọde ẹda ye Abasi. Mbuọtidem ke idem esiemmọ edi ọsọn̄urua inyene koro “idịghe kpukpru owo ẹnyene.” (2 Thessalonica 3:2) Mbon oro mînyeneke mbuọtidem ẹnen̄ede ẹdi ubuene ke enyịn Abasi.—Ediyarade 3:17, 18.

Inyene Oro Mbuọtidem Ọnọde

Edi nso inam mbuọtidem edi ọsọn̄urua inyene? Mbon oro ẹbuọtde idem ye Abasi  ẹbọ ufọn “uwak mfọnido esie ye ime ye anyanime.” (Rome 2:4) ‘Ẹfen mme idiọkn̄kpọ’ mmọ n̄ko ke ntak emi mmọ ẹbuọtde idem ke uwa ufak Jesus. (Ephesus 1:7) N̄ko-n̄ko, mmọ ẹnyene ọniọn̄ oro “ikọ Christ” ọnọde mbon oro ẹnyenede mbuọtidem. (Colossae 3:16) Ke ini mmọ ẹbọn̄de akam ẹnọ Abasi ke mbuọtidem, “emem Abasi emi akande kpukpru ekikere” esikpeme esịt ye ekikere mmọ onyụn̄ anam mmọ ẹnen̄ede ẹkop inemesịt.—Philippi 4:7.

Ke adianade ye kpukpru ufọn emi, mbon oro ẹbuọtde idem ye Abasi ebe ke Jesus Christ Eyen esie, ẹnyene utịbe utịbe idotenyịn nsinsi uwem. Mme owo ẹnen̄ede ẹmehe ye ikọ Jesus Christ emi: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.” (John 3:16) Utịbe utịbe idotenyịn emi esinen̄ede enyene nsọn̄ọ ke ini owo enyenede nnennen ifiọk aban̄a Ete ye Eyen, koro Jesus ama ọdọhọ n̄ko ete: “Nsinsi uwem ọwọrọ mmọ ndinyene ifiọk mban̄a fi, ata Abasi kierakiet, ye enye emi afo okosiode ọdọn̄, kpa Jesus Christ.”—John 17:3.

Okposụkedi emi akpan edidiọn̄ Abasi edide enye ndiyak owo anam ufan ye imọ, mme owo ẹsibọ ata ufọn n̄ko. Da Dalidio emi odụn̄de ke Brazil ke uwụtn̄kpọ. Enye ama esikpa mmịn mbemiso ekedide edinyene nnennen ifiọk uduak Abasi. Emi ama ada ekese afanikọn̄ ọsọk ubon esie. Akan oro, okụk ama esinana enye etieti. Ekem enye ama ọtọn̄ọ ndikpep Bible ye Mme Ntiense Jehovah onyụn̄ okụt akamba ukpụhọde ke uwem esie.

Se Dalidio ekekpepde ke Bible ama anam enye etre ndiọi edu esie. Se enye ekekpepde ama onyụn̄ anam enye enen̄ede okpụhọde tutu enye ọdọhọ ete: “Ini akpa, n̄kesisan̄a n̄n̄wọn̄ n̄kpọ, idahaemi ndisan̄a n̄kwọrọ ikọ.” Enye edidi asan̄autom emi akpan ubọkọkọ esie edide ndikpep mbon en̄wen Ikọ Abasi. Ukpụhọde emi enye anamde mi anam idem ọsọn̄ enye, inyụn̄ iyakke enye atahade aba okụk. Dalidio ọkọdọhọ ete, “Idahaemi ndida okụk oro n̄kesidade n̄n̄wọn̄ n̄kpọ n̄n̄wam mbon en̄wen mîdịghe nda ndep mme n̄kpọ oro mmenyeneke.” Enye enyene ata nti ufan n̄ko sia odụkde ndụk ye mbon oro ẹnamde se Abasi amade. Esịt ana Dalidio sụn̄, enye onyụn̄ enen̄ede okop inemesịt akan nte enye ekekerede mbemiso ekedide edifiọk Abasi.

Kere ban̄a Renato, emi edide owo en̄wen oro enyenede inyene ke ntak emi ọbuọtde idem ye Jehovah Abasi. Ama okụt ediye mfụk imam esie mfịn, ọsọsọn̄ ndinịm ke ẹma ẹnen̄ede ẹdiọk enye ukama. Eka esie ama emen enye okotop ọduọk ke ini enye akamanade. Eka ekemen enye ye urụk eyen esịn ke ekpat ekenịm ke idak anyan n̄kpọitie; enye ama onyụn̄ enen̄ede ada unan. Iban iba oro ẹkesan̄ade ẹbe ẹma ẹkụt n̄kpọ an̄wanade ke esịt ekpat oro ẹkenịmde ke idak anyan n̄kpọitie. Ke akpa, mmọ ẹkekere ke owo efre eyen an̄wambana. Ke ini mmọ ẹkekụtde ke edi obufa nsekeyen, mmọ ẹma ẹsọsọp ẹda enye ẹka ufọkibọk ke mbọhọ oro.

Kiet ke otu iban emi ekedi kiet ke otu Mme Ntiense Jehovah, ndien enye ama etịn̄ se iketịbede ọnọ Ntiense en̄wen emi ekerede Rita. Rita ama aman obukpo eyen ediwak ini, ndien enye ekenyene eyenan̄wan kiet kpọt. Sia enye ekenen̄erede oyom eyen erenowo, enye ama emen Renato akama.

Toto ke ini emi Renato ekedide ata ekpri,  Rita ama asian enye ke idịghe imọ idi ata eka esie. Edi enye ama enen̄ede ama onyụn̄ ese aban̄a Renato onyụn̄ esịn ukeme ekpep enye ama Abasi. Ke ini Renato okokponde ọdiọn̄ọ idem, enye ama ọtọn̄ọ ndima Ikọ Abasi. Enye ama enen̄ede owụt esịtekọm n̄ko aban̄a ata utịbe utịbe usụn̄ oro ẹkenyan̄ade imọ. Mmọn̄eyet esisiaha enye kpukpru ini oro enye okotde ikọ David, andiwet psalm, emi: “Koro ete mi ye eka mi ẹkekpọn̄de mi, ndien Jehovah emen mi akama.”—Psalm 27:10.

Man owụt ke imọkọm Jehovah ke kpukpru se enye anamde ọnọ imọ, Renato ama ana baptism ke 2002, ndien ke 2003 enye ama akabade asan̄autom Christian emi adade utom ukwọrọikọ nte akpan ubọkọkọ. Tutu emi, enye ifiọkke ata ete ye eka esie, ndien ekeme ndidi idifiọkke tutu amama. Edi Renato ekere ke kiet ke otu akakan enọ oro ẹnọde imọ edi emi imọ idide idifiọk inyụn̄ ibuọt idem ye Jehovah, kpa Ete imọ oro amade onyụn̄ ekerede aban̄a imọ.

Ekeme ndidi ọdọn̄ fi ndinam ufan ye Abasi, emi ekemede ndinen̄ede mfori uwem fo. Ifet eberede ọnọ kpukpru owo—imọ ye ubuene—oro ẹyomde ndinam ufan ntre ye Jehovah Abasi ye Jesus Christ Eyen esie. Ekeme ndidi emi idinamke fi edi imọ owo, edi ayanam enyene ifụre onyụn̄ okop inemesịt oro okụk ofụri ererimbot emi mîkemeke ndidep. Se Mme N̄ke 10:22 etịn̄de enen̄ede edi akpanikọ, ete: “Ufọn Jehovah ofori owo, enye inyụn̄ idianke afanikọn̄ ke esịt.”

Jehovah Abasi enen̄ede enyene udọn̄ ke idem mbon oro ẹnamde ufan ye enye. Enye ọdọhọ ete: “Afo akpakam akpan̄ utọn̄ ke mbet mi! ndien emem fo ekpebiet akpa mmọn̄, edinen ido fo ekpebiet mbufụt inyan̄.” (Isaiah 48:18) Enye ọn̄wọn̄ọ n̄ko ke iyenen̄ede idiọn̄ mbon oro ẹnamde ufan ye imọ ke eti esịt ẹnyụn̄ ẹnyenede eti edu, ete: “Utịp nsụkesịt ye eke uten̄e Jehovah edi inyene, ye ukpono, ye uwem.”—Mme N̄ke 22:4.

[Se ẹwetde ke ikpọ abisi ke page 6]

Owo ndibuọt idem ye Abasi anam enye enyene emem, oyụhọ ye se enyenede, onyụn̄ okop inemesịt

[Ndise ke page 5]

Abasi ama enen̄ede ọdiọn̄ ubon Jesus mi ke isọn̄ okposụkedi emi mmọ ẹkedide ubuene