Leta Bolivia

N̄wan Emi Okopde Inemesịt Onyụn̄ Enyenede Idotenyịn kpa ye Oro Edide Ubuene

OKPOSỤKEDI emi nnamde utom isụn̄utom ke idụt oro ọtọn̄ọde-tọn̄ọ uforo, imeheke mi ndikụt nte mme owo ẹbuenede ẹnyụn̄ ẹnanade idotenyịn. Esidọn̄ mi ndikụt nte kpukpru owo ẹbọhọde ndutụhọ iwiwa. Edi mmọfiọk ke Obio Ubọn̄ Abasi kpọt edikọk mme mfịna emi. Edi ediwak ini, mmesikụt ke mbon oro ẹnamde Ikọ Abasi ẹsikop inemesịt kpa ye oro ẹdide ọkpọikpọi ubuene. Sabina edi kiet ke otu mmọ.

Ke ediwak isua emi ẹkebede, Sabina ama afak n̄kpri nditọiban esie iba ke n̄kan̄ ada ese nte ebe esie odụkde akani bọs aka idụt en̄wen man okoyom utom oro ẹdikpede ediwak okụk. Mma mbon ama ebet ke ediwak isua, edi ebe itoho idi. Tọn̄ọ ebe esie akadaha, Sabina esin̄wana idem kpukpru usen man enye ye nditọ esie, Milena ye Ghelian, ẹnyene se ẹdade ubọk ẹka inua.

Akpa ini oro n̄kosobode ye Sabina, enye akanyam n̄kpọ ọnọ akpakịp mbonurua mmọ ke ufọkurua eyeneka esie. Mma n̄kụt ke iso esie ke enye akpa utom tọn̄ọ ke usenubọk. Mma ndọhọ ke nyesidi ndikpep Bible ye enye ye nditọ esie. Enye ama ọdọhọ ete: “N̄kpama ndikpep, edi ini afaha mi akaha. Edi n̄kpama ekpep nditọ mi.” Mma nnyịme. Nte ukpepn̄kpọ nditọ oro akakade iso, mma ndi ndifiọk Sabina nnyụn̄ mfiọk nte n̄kpọ ọkọsọn̄de ye enye.

Sabina esitọn̄ọ utom ke n̄kanika inan̄ usenubọk. Ke adan̄aemi nditọ esie ẹsụk ẹdede ke ubet kiet oro mmọ ẹdụn̄de, enye ayabara ikan̄ etem ata akani akamba eso n̄ket. Enye etem unam emi enye edidade inam inịn̄e-inịn̄e uyo emi enye esinyamde ada akama ubon esie. Enye esinam ndomuyo emi enịm okoneyo, man ada anam inịn̄e-inịn̄e uyo emi ẹsịnde unam eyo ama esiere.

Sabina ọbọ owo ukpatn̄kpọ atan̄ kpukpru n̄kpọutom esie ọdọn̄ ke nde ke nde—oro edi, akamba ufụkeyo, mfiọk mbakara, iko aranikan̄, okpokoro, nnyan ifịm, eso, aran, ọkọrọ ye unam ye ndomuyo ye ediwak mmọn̄ mfri oro enye akanamde.

Sabina ye nditọ esie mbiba ẹben̄e idem ndiwọrọ ke n̄kanika itiokiet usenubọk. Mmọ ẹberi ẹnyụn̄ ẹda ukpọhọde ẹkọbi usụn̄ mmọ. Owo iyatke esịt inyụn̄ inemke esịt; owo itịn̄ke ikọ inyụn̄ isakke imam. Nditọ mbon ẹbọk ofụri odudu mmọ ẹnịm ndida nnam utom oro ẹyomde ndinam. Mmesida ke window ufọkidụn̄ isụn̄utom nnyịn n̄kụt nte mme owo ẹwọrọde tụhi-tụhi ntre ẹka utom. Ke nditịm ntịn̄, Sabina edi kiet kpọt ke otu ata ediwak iban emi ẹsikpọn̄de ufọk tụhi-tụhi usenubọk man ẹkenyam udia ye mmịn ke mme efak Bolivia.

 Sabina ye nditọ esie ẹsịm itie urua mmọ ke n̄kanika ebe itiokiet, oro utịn ọtọn̄ọde ndisiaha. Ẹsion̄o n̄kpọ ke ukpatn̄kpọ ẹnyụn̄ ẹbara ikan̄, owo isụk itịn̄ke ikọ. Ẹsịn akpa inịn̄e-inịn̄e uyo ke ikan̄ enye anam uyom fran̄ nyai-i. Edinem ufuọn̄ akara mbịtmbịt ofụm usenubọk, onyụn̄ anam mme andidep ẹsọsọp ẹwaha ẹdi.

Sabina obụp akpa andidep ete, “Oyom ifan̄?” Eren emi enyịn etiede idap idap imenekede iso ke enyọn̄, edi anyan nnuenubọk iba. Sabina ọnọ enye ata ufiop ufiop uyo iba onyụn̄ ọbọ ekpri okụk. Ẹyenam ntre ata ediwak ini ke ofụri usen oro. Ẹma ẹnyam akpatre inịn̄e-inịn̄e uyo, mmọ ẹtan̄ n̄kpoduoho ẹtọn̄ọ isan̄ unyọn̄. Okposụkedi emi ukot abiakde Sabina ke ntak utom usenubọk emi, enye ebe nnennen aka utom ke ufọkurua eyeneka esie.

Akpa ini oro n̄kakade ufọkurua oro man ikpep Bible, ẹma ẹbobon n̄kpri nnyan n̄kpọitie iba. Toto ke ntọn̄ọ, Milena emi ekedide isua usụkkiet ye Ghelian emi ekedide isua itiaba, ẹkesitetie ẹbet ukpepn̄kpọ ẹnyụn̄ ẹnen̄ede ẹtịm idem. Sụn̄sụn̄, nditọ emi ẹsikopde bụt mi ẹma ẹtọn̄ọ ndineme nneme ye ami ẹnyụn̄ ẹyak ndi ufan mmọ. Emi ama enem Sabina esịt. Ikebịghike, enye ama ebiere ke okposụkedi oro ini afahade imọ etieti, ke imọ n̄ko iyekpep Bible ye ami.

Nte ifiọk Sabina okokponde, ntre ke enye ekenen̄ede ama Jehovah Abasi. Enye ama ọtọn̄ọ ndinyene n̄kpọ oro enye mîkesinyeneke—oro edi, inemesịt! N̄wan emi ekesikpade mba, mînyụn̄ ikopke inemesịt mi ama akabade ata isio isio owo. Idahaemi enye ama enen̄ede asan̄a, ibuot esie ana nnennen, iso esie onyụn̄ ayama. Eyeneka esie ọdọhọ ete, “Sabina esituak inua imam kpukpru ini. Enye ikesituakke inua imam.” Mbon en̄wen n̄ko ẹkụt ke Sabina ye nditọ esie ẹnen̄ede ẹkpụhọde. Ẹma ẹyụhọ udọn̄ oro enye ekenyenede ke anyan ini ndifiọk akpanikọ oro aban̄ade Abasi ye uduak esie.

Sabina ama esinen̄ede ama ukpepn̄kpọ esie, edi enye ikekemeke ndidụk mbono esop Christian sia enye ekenyenede ekese ndinam. Ke akpatre, enye ama enyịme ndidi Ufọkmbono Obio Ubọn̄. Toto ke usen oro, enye ifiakke mbono esop. Sabina ama enyene nti ufan ke Ufọkmbono Obio Ubọn̄. Enye ama onyụn̄ okụt ke Jehovah esinen̄ede ese aban̄a mbon oro ẹmade Enye ẹnyụn̄ ẹyakde n̄kpọ atak mmọ man ẹnam n̄kpọ esie.—Luke 12:22-24; 1 Timothy 6:8.

Sabina ama ama se enye ekekpepde, ama onyụn̄ ọdọn̄ enye nditịn̄ nnọ mbon en̄wen. Edi enye ọkọdọhọ ete, “Idem esinyek mi ini ekededi oro n̄kerede nte ndikwọrọde ikọ an̄wan̄wa.” Enye ama ekere ete, ‘Ami emi ndide owo bụt, emi mmefiọkke n̄wed, ndisan̄a didie n̄kpep owo en̄wen n̄kpọ?’ Kpa ye oro, mfọn emi ẹfọnde enye ye nte uwem esie okokpụhọrede ama esịn udọn̄ ọnọ enye anam emi. Enye ama ọfiọk n̄ko ke ana imọ inịm uwụtn̄kpọ inọ nditọ imọ. Ntre enye ama ọtọn̄ọ ndikwọrọ eti mbụk nnọ mbon en̄wen. Nditọ esie ẹma ẹtiene enye ẹkwọrọ ikọ ifịk ifịk.

Idahaemi, Sabina idịghe ubuene an̄wan emi esinamde utom akpa mba kpukpru usen, mînyụn̄ ikopke inemesịt. Idịghe nte ke enye enen̄ede enyene n̄kpọ. Edi nte enye esede n̄kpọ okpụhọde. Idahaemi enye edide Ntiense emi ama akana baptism, enye esikwọrọ eti mbụk Obio Ubọn̄ Abasi—emi editrede ubuene ye unana idotenyịn ke ererimbot emi ke nsinsi—ọnọ mbon en̄wen.—Matthew 6:10.

Amia n̄kanika ition usenubọk, ndien Sabina eben̄e idem ndiwọrọ ke ubet ufọk kiet oro enye odụn̄de. Edi isan̄ enye emi, enye ikaha ndinyam inịn̄e-inịn̄e uyo. Enye aka ndisobo ye Mme Ntiense eken man ọkọkwọrọ ikọ ke efak. Enye ndida ndusụk ini esie n̄n̄wam mbon en̄wen kpukpru urua anam enye ọdọdiọn̄ okop inemesịt. Enye ọkọbi usụn̄ esie onyụn̄ atuak inua iman asan̄a odụk efak. Akama ekpat utu ke ndikpat ukpatn̄kpọ. Ọdọn̄ Bible ye mme n̄wed un̄wam ukpep Bible emi enye edidade inọ mbon en̄wen etop idotenyịn. Sabina atuak ediye mfụk imam, ete, “Akananam n̄kereke ke mmekeme nditịn̄ ikọ nnọ mbon en̄wen mban̄a Bible.” Enye adian do ete, “Edi mmama enye nsọn̄!”