Ndi Abasi Ọn̄wọn̄ọ Ndinọ Fi Inyene?

‘Abasi oyom fi oforo—enyene ediwak ubomisọn̄, mbubehe esene fi. N̄kukụre se ẹyomde anam edi, nịm enye ke akpanikọ nyụn̄ tat ubọk nọ ofụri okụk oro ekemede.’

N̄WEDMBỤK n̄kpọntịbe kiet oro ẹmịn̄de ke Brazil ọdọhọ ke ndusụk ido ukpono do ẹsikwọrọ orụk ikọ emi. Ediwak owo ẹnịm emi ke akpanikọ. Kop se magazine Time eketịn̄de mi aban̄a ndụn̄ọde oro ẹkenamde ye mme owo oro ẹdọhọde ke idi Christian ke United States: “Ofụri owo 61 ke otu owo 100 oro ẹkedade ẹnam ndụn̄ọde emi ẹnịm ke Abasi oyom mme owo ẹforo. Ndien owo 31 ke otu owo 100 . . . ẹnịm ke edieke owo ọnọde Abasi okụk, ke Abasi ọyọnọ enye ata ediwak okụk.”

Mme utọ ekikere emi, oro ẹsiwakde ndikot ukwọrọikọ uforo, ke asuana, akpan akpan ke mme utọ idụt Latin America nte Brazil, ndien mme owo ke ẹbụn̄ọ ẹdụk mme ufọkabasi oro ẹkpepde ke Abasi ayanam mmọ ẹforo. Edi ndi Abasi enen̄ede ọn̄wọn̄ọ ke iyanam mbon oro ẹnamde n̄kpọ imọ ẹforo? Ndi kpukpru mme asan̄autom Abasi ke eset ẹkeforo?

Imesiwak ndikot ke N̄wed Abasi Usem Hebrew ke mbon oro Abasi ọkọdiọn̄de ẹma ẹforo. Ke uwụtn̄kpọ, Deuteronomy 8:18 ọdọhọ ete: “Ti Jehovah Abasi fo: koro edi enye ọnọ fi odudu edikọ inyene.” Emi ama anam nditọ Israel ẹfiọk ke edieke mmimọ ikopde uyo Abasi, ke enye ayanam mmimọ iforo.

Edi nso kaban̄a owo kiet kiet oro anamde n̄kpọ Abasi? Job, emi ekedide owo nsọn̄ọnda ama enyene n̄kpọ barasuene, ndien idem ke Satan ama akanam enye akabade ọkpọikpọi ubuene, Jehovah ama afiak ọnọ enye se enye ekenyenede “utịm ikaba.” (Job 1:3; 42:10) Abraham n̄ko ekedi imọ owo. Genesis 13:2 ọdọhọ ke enye ama “odobi ke ufọk esie, ke ufene, ye ke silver, ye ke gold.” Ke ini udịmekọn̄ ndidem inan̄ ẹkemụmde Lot eyen eyeneka esie ẹnyọn̄, Abraham ama “okot irenowo esie emi ẹma ẹkebọ ukpep, ifịn ikie ita ye efịteta emi ẹmanade ke ufọk esie.” (Genesis 14:14, NW) Anaedi ikọtufọk Abraham ẹma ẹnen̄ede ẹwak sia ẹdọhọde ke enye ama enyene “irenowo [318] emi ẹma ẹkebọ ukpep” ekọn̄. Enye ndikekeme ndikama utọ akwa ubon oro owụt ke enye ekedi ata imọ owo, emi ekenyenede ata ediwak ufene.

Ih, ediwak ke otu mme asan̄autom Abasi oro ẹkesọn̄ọde ẹda ke eset—utọ nte Abraham, Isaac, Jacob, David, ye Solomon, ke ndisiak ibat ibat—ẹkedi imọ owo. Edi ndi emi ọwọrọ ke Abasi ayanam kpukpru mbon oro ẹnamde n̄kpọ esie ẹforo? Mîdịghe, ndi owo ndidi ubuene ọwọrọ ke Abasi imaha enye? Ibuotikọ oro etienede ọyọbọrọ mme mbụme emi.