Omoyom Edisana Spirit ke Uwem Fo

“KÛMEN mi ke iso fo uduọk; kûnyụn̄ ubọ mi edisana spirit fo.” (Psalm 51:11) Edidem David ọkọbọn̄ akam ofụri esịt emi ke enye ama akanam akwa idiọkn̄kpọ.

Edisana spirit ama esinọ David odudu. Ke ini enye ekedide uyen, edisana spirit ama ọnọ enye odudu man owot Goliath, akwa owoekọn̄ emi ekesidịghede mme owo uwem. (1 Samuel 17:45-50) Edisana spirit ama onyụn̄ ọnọ enye odudu ndiwet ndusụk psalm oro ẹnemde ẹkan. David ọkọdọhọ ete: “Spirit Jehovah ada mi etịn̄ ikọ, uyo esie onyụn̄ odu mi ke edeme.”—2 Samuel 23:2.

Jesus Christ ke idemesie ama etịn̄ se edisana spirit akan̄wamde David anam. Ini kiet, Jesus ama ọdọhọ mbon oro enye ọkọkwọrọde ikọ ọnọ ete: “David ke idemesie etịn̄ ke edisana spirit ete, ‘Jehovah ọdọhọ Ọbọn̄ mi ete: “Tie mi ke ubọk nnasia tutu nda mme asua fo nnịm fi ke idak ikpat.”’” (Mark 12:36; Psalm 110:1) Jesus ama ọfiọk ke edisana spirit akada David usụn̄ man ewet psalm. Ndi  edisana spirit oro ekeme ndin̄wam nnyịn n̄ko mfịn?

“Ẹka Iso Ẹben̄e, Ndien Ẹyenọ Mbufo”

Ekeme ndidi tutu amama afo uduwetke psalm. Edi emekeme ndisobo mme mfịna oro ẹbietde Goliath. Da Isabel ke uwụtn̄kpọ. * Ebe esie ama ọkpọn̄ enye ọkọdọ ekpri n̄kaiferi. Enye ama ọkpọn̄ isọn oro mmọ ẹkekamade ọnọ Isabel ekpe, inyụn̄ inọhọ enye okụk ndomokiet ada ese aban̄a n̄kpri nditọiban mmọ mbiba. Isabel ọdọhọ ete: “Eketie mi nte ke ẹbian̄a ẹnyụn̄ ẹda mi nte mbio. Edi tọn̄ọ enye ọkọkpọn̄ mi, edisana spirit Abasi an̄wam mi.”

Ndi Isabel ekekere ke imọ idinyụn̄ itie ntre ibọ edisana spirit? Baba, enye ama esiben̄e Abasi kpukpru usen ete ọnọ imọ edisana spirit esie. Enye ama ọfiọk ke imoyom odudu Abasi man inyene uko ndiyọ se iditịbede ke ini iso, itịm ise iban̄a nditọ imọ, inyụn̄ ikeme ndifiak nnyene uku. Enye ama anam ikọ Jesus emi: “Ẹka iso ẹben̄e, ndien ẹyenọ mbufo; ẹka iso ẹyom, ndien mbufo ẹyekụt; ẹka iso ẹtuak, ndien ẹyeberede ẹnọ mbufo.”—Matthew 7:7.

Roberto n̄ko ama ọfiọk ke imoyom spirit Abasi, edi mfịna esie ekedi isio. Enye ama esin̄wọn̄ sika ye ikọn̄ekpo okoneyo ye uwemeyo. Enye ama odomo nditre n̄kpọ emi ke ofụri isua iba, edi ikekemeke. Roberto ọdọhọ ete: “Esịt esitịmede owo ke ini enye etrede sika ye ikọn̄ekpo. Esinen̄ede ọdọn̄ owo ndin̄wọn̄ kpukpru usen.”

Roberto adian do ete: “Edi mma mbiere ndikpụhọde man nnam n̄kpọ Abasi ke usụn̄ oro enye enyịmede. Mma ndomo ndisikere nti n̄kpọ oro ẹdude ke Bible. Mma nsibọn̄ akam kpukpru usen ke ofụri esịt mben̄e Abasi ọnọ mi ukeme man ndu edisana uwem. Mma mfiọk ke n̄kemeke ndinam emi ke idemmi. Mma nnyụn̄ n̄kụt nte Jehovah ọkọbọrọde akam mi, akpan akpan ke ini idem ememde mi ke ini mfiakde n̄n̄wọn̄ sika m̀mê ikọn̄ekpo. Mmenịm ke edisana spirit Abasi akanam mfiak n̄kop odudu; mîkpedịghe spirit esie, n̄kpekekemeke nditre ikọn̄ekpo ye sika.”—Philippi 4:6-8.

Ndidọk “ke Mba nte Ntrukpom”

Edisana spirit an̄wam ata ediwak Mme Ntiense Jehovah nte akan̄wamde Isabel ye Roberto. Jehovah ekeme ndinọ fi anamutom odudu esie—odudu emi enye akadade obot ekondo—edieke afo oyomde. Enen̄ede ọdọn̄ Abasi ndinọ fi spirit esie edieke eben̄ede enye ke ofụri esịt. Edi man Abasi ọnọ fi spirit esie, afo enyene ndikpep akpanikọ oro aban̄ade enye onyụn̄ enen̄ede anam uduak esie ke ofụri esịt.—Isaiah 55:6; Mme Hebrew 11:6.

Edisana spirit Abasi ekeme ndinọ fi odudu man anam n̄kpọ Abasi edifọn edifọn onyụn̄ ọyọ mfịna ekededi oro enyenede. Bible ọdọhọ nnyịn ete: “[Jehovah] ọnọ mbon mba odudu; onyụn̄ anam ukeme awak ọnọ mmọ eke mînyeneke nsọn̄idem. . . . Mmọ eke ẹberede ye Jehovah ẹyekop obufa nsọn̄idem; ẹyedọk ke mba nte ntrukpom; ẹyefen̄e, ndien idikpọtke; ẹyesan̄a, edi idikpaha mba.”—Isaiah 40:28-31.

[Ikọ Idakisọn̄]

[Se ẹwetde ke ikpọ abisi ke page 8]

‘Mma nsibọn̄ akam kpukpru usen ke ofụri esịt mben̄e Abasi ọnọ mi ukeme. Mma mfiọk ke n̄kemeke ndinam emi ke idemmi. Mma nnyụn̄ n̄kụt nte enye ọkọbọrọde akam mi’

 [Ekebe/Mme ndise ke page 7]

SE EDISANA SPIRIT ANAMDE

Abasi akada edisana spirit obot isọn̄ ye ofụri ekondo. Andiwet psalm akatan̄a ete: “O Jehovah, n̄kpọ emi afo anamde ẹwak didie! Afo amanam mmọ kpukpru ke ifiọk; inyene fo ọyọhọ ke ererimbot. Afo ọdọn̄ spirit fo ọwọrọ, mmọ ẹboro.”—Psalm 104:24, 30; Genesis 1:2; Job 33:4.

Edisana spirit ọkọnọ mme owo oro ẹbakde Abasi odudu ẹda ẹwet Bible. Apostle Paul ekewet ete: “Abasi ọkọnọ odudu ẹda ẹwet ofụri N̄wed Abasi ndien enye ọfọn.” (2 Timothy 3:16) Edieke ẹkabarede ikọ Greek oro “Abasi ọkọnọ odudu” ke ata ata usụn̄, enye ọwọrọ “Abasi ọkọduọk ibifịk esịn.” Ibifịk, m̀mê spirit, Jehovah eketeme mme andiwet Bible se ẹdiwetde man ẹwet “ikọ Abasi.” —1 Thessalonica 2:13.

Edisana spirit ọkọnọ ikọt Abasi odudu ẹtịn̄ ata nnennen se iditịbede ke ini iso. Apostle Peter ọkọdọhọ ete: “Ntịn̄nnịm ikọ N̄wed Abasi ndomokiet idịghe se owo ekemede ndisiak ke usụn̄ idemesie. Koro akananam ntịn̄nnịm ikọ itoho ke uduak owo, edi mme owo ẹketịn̄ ikọ ẹto Abasi nte edisana spirit akadade mmọ usụn̄.”—2 Peter 1:20, 21; Joel 2:28.

Edisana spirit akanam Jesus ye mbon en̄wen oro ẹkenyenede mbuọtidem ẹkwọrọ eti mbụk Obio Ubọn̄ Abasi ẹnyụn̄ ẹnam mme utịben̄kpọ. Jesus ọkọdọhọ ete: “Spirit Jehovah odoro mi ke idem, koro enye ama eyet mi aran enịm ete ntan̄a eti mbụk nnọ mme ubuene, enye ama osio mi ọdọn̄ ete n̄kwọrọ ubọhọ-ufụn nnọ mbuotekọn̄ nnyụn̄ n̄kwọrọ edifiak n̄kụt usụn̄ nnọ mme nnan.”—Luke 4:18; Matthew 12:28.

 [Ekebe/Mme ndise ke page 9]

MME USỤN̄ EMI EDISANA SPIRIT EKEMEDE NDIN̄WAM NNYỊN

Edisana spirit ekeme ndinọ fi odudu man akan idomo ye ndiọi edu. Apostle Paul ọkọdọhọ ete: “Abasi edi akpanikọ, idinyụn̄ iyakke ẹdomo mbufo ẹbe se mbufo ẹkemede ndiyọ, edi enye oyosio usụn̄ ubọhọ ke ufọt idomo man mbufo ẹkeme ndiyọ enye.”—1 Corinth 10:13.

Edisana spirit ekeme ndin̄wam fi enyene mme edu owo Abasi. “Mbun̄wụm spirit edi ima, idatesịt, emem, anyanime, mfọnido, eti ido, mbuọtidem, ifụre ifụre ido, mfara ke idem.”—Galatia 5:22, 23.

Edisana spirit ekeme ndinọ fi odudu man ọyọ mme idomo. “Ke kpukpru n̄kpọ mmenyene ukeme ebe ke enye emi ọnọde mi odudu.”—Philippi 4:13.