Kpep Nditọ Fo

Shem Ama Okụt Idiọkido Ererimbot Iba

SHEM eyen Noah ama ọbọhọ nsobo ererimbot kiet ebe odụk ererimbot en̄wen. Ndi ọmọfiọk se ikanamde ẹsobo akpa ererimbot oro Shem okodude uwem, ye nte enye ye mbonubon esie ẹkebọhọde ẹdụk ererimbot en̄wen?— * Yak ineme n̄kpọ emi.

Bible ọdọhọ ke ini Shem ekedide uyen ke “idiọkn̄kpọ owo” ama enen̄ede okpon. Kpukpru se mme owo ẹkekerede ẹkedi “idiọk kpukpru ini.” Ntre ndi ọmọfiọk se Abasi akanamde?— Enye ama anam ukwọ ọtọ osobo idiọk ererimbot oro efep. Apostle Peter ekewet ete: ‘Ẹma ẹsobo ererimbot emi okodude adan̄aoro ke ini ẹkedade ukwọ ẹfụk enye.’—Genesis 6:5; 2 Peter 3:6.

Ndi omokụt ntak emi Abasi okosobode ererimbot oro?— Mme owo oro ẹkedude ini oro ẹma ẹdiọk, mmọ ẹkesinyụn̄ ẹkere ẹban̄a “idiọk kpukpru ini.” Jesus ama etịn̄ aban̄a emi. Enye ọkọdọhọ ke ‘mbemiso ukwọ oro,’ ke mme owo ẹma “ẹdia ẹnyụn̄ ẹn̄wọn̄,” “ẹdọ ndọ ẹnyụn̄ ẹda iban ẹnọ ke ndọ.” Jesus ama adian do ete: “Mmọ inyụn̄ ifiọkke tutu ukwọ edi edikpọri mmọ kpukpru efep.”—Matthew 24:37-39.

Nso ke mme owo oro mîkọfiọkke?— Noah ete Shem ekedi “ọkwọrọ edinen ido,” edi mme owo oro ikakpan̄ke utọn̄ inọ se enye ọkọkwọrọde. Noah ama akpan̄ utọn̄ ọnọ Abasi onyụn̄ ọkọn̄ ubom oro ekemende enye ye ubon esie ebe Ukwọ oro. Noah, n̄wan esie, ye nditọiren mmọ—Shem, Ham, ye Japheth—ye iban mmọ kpọt ẹkefiọk se Abasi aduakde ndinam. Kpukpru mbon eken ẹkenam se mmọ ẹkemade, ntre Ukwọ oro ama ọkpọri mmọ efep.—2 Peter 2:5; 1 Peter 3:20.

Ke n̄kpọ nte isua kiet ama ekebe tọn̄ọ Ukwọ oro ọkọtọn̄ọ, Shem ye ubon esie ẹma ẹwọrọ ke ubom oro ẹdọk nsatisọn̄. Idiọkowo ndomokiet ikodụhe aba, edi ikebịghike. Canaan eyen Ham, eyeneka Shem, ama anam idiọkn̄kpọ, oro ekesịnde Noah ọdọhọ ete: “Osụk ọdiọk ọnọ Canaan.” Nimrod eyeyen Ham ekedi idiọkowo n̄ko. Enye ama ọbiọn̄ọ Jehovah, ata Abasi, onyụn̄ ọdọhọ mme owo ẹbọp edikọn̄ tọwa emi ẹkekotde Babel man ẹnam enyịn̄ ẹnọ idemmọ.  Ndi emekere ke emi ama enem Shem ye ete esie esịt?—Genesis 9:25; 10:6-10; 11:4, 5.

Esịt ikenemke mmọ, ikonyụn̄ inemke Jehovah n̄ko. Ndi ọmọfiọk se Jehovah akanamde?— Enye ama etịmede usem mmọ mbak mmọ ẹdikop se kiet eken etịn̄de. Emi ama anam mmọ ẹtre utom oro ẹnyụn̄ ẹdaha ẹkedụn̄ọ ke nsio nsio ebiet ye mbon oro ẹsemde ukem usem. (Genesis 11:6-9) Edi Abasi iketịmekede usem Shem ye ubon esie. Ntre, mmọ ẹkesụk ẹdụn̄ kiet ẹnyụn̄ ẹn̄wam kiet eken anam n̄kpọ Abasi. Ndi akanam emekere m̀mê Shem akanam n̄kpọ Jehovah isua ifan̄?—

Shem okodu uwem isua 600. Enye okodu uwem isua 98 mbemiso Ukwọ, onyụn̄ odu uwem isua 502 ke Ukwọ ama okokụre. Imenịm ke enye ama etiene Noah ọkọn̄ ubom onyụn̄ etiene odụri mme owo utọn̄ ke Ukwọ ọmọn̄ ọtọ emen isọn̄. Edi afo ekere ke Shem akanam nso ke se ibede isua 500 oro enye okodude uwem ke Ukwọ ama okokụre?— Noah okokot Jehovah “Abasi Shem.” Anaedi Shem ama aka iso anam n̄kpọ Jehovah onyụn̄ an̄wam mbonubon esie ẹtiene ẹnam n̄ko. Nte ini akakade, mbonubon Shem ẹma ẹdisịne Abraham, Sarah, ye Isaac.—Genesis 9:26; 11:10-31; 21:1-3.

Kere nte ererimbot etiede mfịn, emi akade-ka iso ndidiọk toto ke eyo Shem. Nso iditịbe inọ ererimbot emi?— Bible ọdọhọ ke enye “ke ebebe efep.” Edi kere ban̄a un̄wọn̄ọ emi: “Owo eke anamde uduak Abasi ododu ke nsinsi.” Ntre, edieke inamde uduak Abasi, imekeme nditiene ndu ke otu mbon oro ẹdibọhọde idụk obufa ererimbot. Ini oro, Abasi ayanam nnyịn idu uwem ke nsinsi ke isọn̄ inyụn̄ ikop inemesịt!—1 John 2:17; Psalm 37:29; Isaiah 65:17.

[Ikọ Idakisọn̄]

Mme mbụme:

○ Ewe ererimbot ke Shem ekebem iso odu uwem, ndien nso n̄kpọ iba ikanam Abasi osobo ererimbot oro?

○ Shem okodu uwem isua ifan̄, ndien nso orụk owo ke enye ekedi?

○ Nso iditịbe inọ ererimbot emi ke mîbịghike?

○ Nso ke ana inam man ibọhọ utịt ererimbot emi?