Eti Mbụk ke Usem 500

KE INI mbon Rwanda ẹkesụk ẹn̄wanade ekọn̄ mbio obio, ekpri otu mme akabade n̄wed ẹma ẹfen̄e ẹkpọn̄ ufọk ye n̄kpoduoho mmọ. Edi mmọ ẹma ẹn̄wana ẹmen ekpri kọmputa mmọ ẹka itienna mbon itọkekọn̄. Ntak-a? Man ẹkpeka iso ẹkabade mme n̄wed ukpepn̄kpọ Bible ẹsịn ke usem Kinyarwanda.

N̄kaiferi kiet ke Usụk N̄kan̄ Usiahautịn Asia esitaip n̄kpọ ke kọmputa esie tutu esịm ufọt okoneyo, kpa ye oro enye esikpade mba, okopde ufiop, ẹsinyụn̄ ẹbọde ikan̄ ke ubọk ubọk. Ntak emi enye esinamde kpukpru emi? Man okpokụre utom oro ke ini oro anade ẹmịn̄.

Mme akabade n̄wed emi ẹsịne ke otu n̄kpọ nte mme akabade n̄wed 2,300 oro ẹnamde utom emi ke imaesịt, ke se ibede ebiet 190 ke ofụri ererimbot. Isua emana mmọ ọtọn̄ọ ke 20 tutu ekpere ndisịm 90, ndien mmọ ẹnen̄ede ẹsịn ifịk ẹnam utom man mme owo ẹkeme ndibọ ndọn̄esịt emi Bible ọnọde ke usem 500.—Ediyarade 7:9.

Ndinọ Mme Owo Eti Mbụk ke Ediwak Usem

Ke mme isua ndondo emi, Mme Ntiense Jehovah ẹkabade n̄wed ẹkan nte akanam ẹkabarede. Ke uwụtn̄kpọ, ke 1985, ẹkesimịn̄ Enyọn̄-Ukpeme ke usem 23 ke ukem ini—emi ekedide ata akwa n̄kpọ ini oro. Edi idahaemi, ẹmịn̄ Enyọn̄-Ukpeme ke usem 176, ndien ẹmịn̄ kpukpru emi ke ukem ini man mbon oro ẹsikotde Enyọn̄-Ukpeme ke ofụri ererimbot ẹkeme ndikpep ukem n̄kpọ ke ukem ini.

N̄kpọ nte usem 50 ẹnyene Enyọn̄-Ukpeme kpọt nte n̄wed oro ẹsimịn̄de kpukpru ini. Ntak-a? Mme emịn̄n̄wed inyeneke akpan n̄kpọ oro esịnde udọn̄ ọnọ mmọ ẹmịn̄ n̄wed ke mme usem obio emana mmọ. Edi Mme Ntiense Jehovah ke ofụri ererimbot ẹsitịp okụk ke imaesịt man ẹda ẹmịn̄ Bible ye mme n̄wed oro ẹsidade ẹkpep Bible ke usem ekededi oro oyomde ẹmịn̄.—2 Corinth 8:14.

Mme owo ẹsinen̄ede ẹma ndikop etop Bible ke usem emana mmọ. Ke uwụtn̄kpọ, ke ndondo emi, ẹsio mme n̄wed oro ẹsidade ẹkpep Bible ke usem Miskito, emi n̄kpọ nte owo 200,000 ẹsemde ke Nicaragua. Mma kiet ama ọdọhọ ẹnọ imọ N̄wed Mi eke Mme Mbụk Bible * ke usem Miskito, ndien pastọ obio oro ama odu ke ini ẹkenọde mma oro n̄wed emi. Ke ini pastọ oro okokụtde ediye n̄wed emi, enye ama ọdọhọ mma oro ọnọ imọ n̄wed oro. Edi mma oro ikamaha ndinọ enye, idem ke ini pastọ oro ọkọdọhọ ke imọn̄ inọ enye kọfi ke n̄kpọ nte tian karasịn kiet!

 Ke ufan̄ isua duop emi ẹbede, ẹmekabade mme n̄wed oro ẹsidade ẹkpep Bible ẹsịn ke se ibede usem 12 ke otu usem oro ẹsemde ke Mexico, ndien emi esịne Maya, Nahuatl, ye Tzotzil. Esop Mme Ntiense Jehovah ke usem obio emana ye ke usem idiọn̄ọ ke Mexico emi ẹkedide 72 ẹma ẹwak ẹbe 1,200 ke se isụhọrede ikan isua duop. Mme Ntiense Jehovah ẹsitọ etop Bible ke esịt mme owo, edi ẹyak ẹnọ Abasi anam akpanikọ oro etịbe.—1 Corinth 3:5-7.

Edikabade Bible Eyomfịn Odu ke Usem 80

Ke mme isua ndondo emi, Mme Ntiense Jehovah ẹmesịn ifịk ẹnam utom tutu ẹsio ofụri m̀mê ubak New World Translation of the Holy Scriptures ke usem 80. Nso ufọn ke emi enyene? Ntiense kiet emi otode South Africa eketịn̄ ntem aban̄a Bible emi ke usem Tswana: “Nso eti n̄kpọutom ke emi edi ntem! Enye ayanam Ikọ Abasi enen̄ede an̄wan̄a mi nnyụn̄ nnen̄ede mma enye. Ẹwet enye ke usem emi ọsọpde an̄wan̄a owo, onyụn̄ enem ndikot.” Owo en̄wen emi otode Mozambique ekewet ntem aban̄a Bible emi ke usem Tsonga: “Kpa ye ofụri n̄wed ukpep Bible oro ikenyenede, sia nnyịn mîkenyeneke Bible, eketie nte obuma ye emịnen̄mịnen̄ ndisiaha edi edịm idepke! Edi edịm ama edep ndien ke ini ẹkesiode New World Translation ke usem Tsonga.”

Mbon oro ẹkabarede ẹnyụn̄ ẹsuande eti mbụk emi odude ke Bible ẹsu ntịn̄nnịm ikọ oro ẹketịn̄de ke eset ke ata n̄wọrọnda usụn̄. Jesus Christ ke idem esiemmọ ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt eyedi.”—Matthew 24:14.

[Ikọ Idakisọn̄]

[Ndise ke page 25]

(Ama oyom ndikụt nte enye enen̄erede etie, se n̄wed)

NEW WORLD MME N̄WED EKEN

TRANSLATION IBAT USEM

Ẹkabade ofụri

m̀mê ubak

80 2010 500 2010

36 2000

13 1990 200 1990

190 1980

7 1970 165 1970

125 1960

1 1950 88 1950

NUMBER OF LANGUAGES

[Mme ndise ke page 25]

N̄kpọ nte mme anamutom unyịmesịt 2,300 ẹkabade mme n̄wed oro ẹsidade ẹkpep Bible ẹsịn ke usem 500

BENIN

SLOVENIA

ETHIOPIA

BRITAIN