Se Ikpepde Ito Jesus

Iban̄a Uwem Ubon

Ikpese ndọ didie man ubon ẹkop inemesịt?

Abasi esidian mme owo ke ndọ. Ke ini ẹkebụpde Jesus m̀mê enen ẹdian̄ade ndọ, enye ọkọdọhọ ete: “Nte mbufo ikokotke ite ke enye emi okobotde mmọ toto ke editọn̄ọ akanam mmọ eren ye n̄wan onyụn̄ ọdọhọ ete: ‘Ke ntak emi owo ọyọkpọn̄ ete ye eka esie onyụn̄ akadiana ye n̄wan esie, ndien mmọ mbiba ẹyekabade ẹdi obụk kiet’? Ntre mmọ idịghe aba owo iba, edi ẹdi obụk kiet. Ke ntre, se Abasi ama akadian yak baba owo kiet okûdianade. . . . Owo ekededi eke osiode n̄wan esie ndọ, ke mîtoho ke ntak use, onyụn̄ ọdọde efen esịn efịbe.” (Matthew 19:4-6, 9) Ke ini ebe ye n̄wan ẹnamde item Jesus ẹnyụn̄ ẹnamde akpanikọ ẹnọ kiet eken, esịt kpukpru owo ke ubon ayana sụn̄ mmọ ẹnyụn̄ ẹkop inemesịt.

Ntak emi ndima Abasi anamde ubon ẹkop inemesịt?

Jesus ọkọdọhọ ete: “‘Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo.’ Emi edi n̄kponn̄kan ye akpa ewụhọ.” Ewe idi udiana n̄kponn̄kan ewụhọ? Jesus ọkọdọhọ ete: “Afo enyene ndima mbọhọidụn̄ fo [emi esịnede mbon oro ẹkperede fi idem ẹkan—ubon fo] nte idemfo.” (Matthew 22:37-39) Ntre, se ẹyomde man ubon ẹkop inemesịt edi mmọ ndidi ufan Abasi koro ndima Abasi anam nnyịn ima kiet eken.

 Didie ke ebe ye n̄wan ẹkeme ndinam kiet eken okop inemesịt?

Mme ebe ẹsinam iban mmọ ẹkop inemesịt edieke mmọ ẹkpebede Jesus. Enye ama awa idemesie ke ntak ima ọnọ esop emi etiede nte n̄wan esie. (Ephesus 5:25) Jesus ọkọdọhọ ete: “Eyen owo [ikedịghe] man ẹnam n̄kpọ ẹnọ enye, edi man enye anam n̄kpọ ọnọ owo.” (Matthew 20:28) Jesus ikanamke n̄kpọ ukara ukara m̀mê nsọn̄ido nsọn̄ido ye mbon oro enye ekesede enyịn, edi akakam ọnọ mmọ nduọkodudu. (Matthew 11:28) Ke ntre, mme ebe ẹkpenyene ndikama odudu mmọ ke ima ima usụn̄ man kpukpru owo ke ubon mmọ ẹbọ ufọn.

Ibanndọ n̄ko ẹkeme ndikpebe Jesus. Bible ọdọhọ ete: “Abasi . . . edi ibuot ọnọ Christ.” Enye ọdọhọ n̄ko ke “erenowo onyụn̄ edi ibuot ọnọ n̄wan.” (1 Corinth 11:3) Jesus ikekereke ke ndisụk ibuot nnọ Abasi ososụhọde imọ itie. Enye ama enen̄ede okpono Ete esie. Enye ọkọdọhọ ete: “Koro [nnam] n̄kpọ eke enemde enye esịt kpukpru ini.” (John 8:29) N̄wan emi osụkde ibuot ọnọ ebe esie ke ntak ima ye ukpono oro enye enyenede ọnọ Abasi enen̄ede anam ubon esie okop inemesịt.

Nso ke mme ete ye eka ẹkeme ndikpep nto nte Jesus ekesede nditọwọn̄?

Jesus ama esida nditọwọn̄ adian idem onyụn̄ oyom ndidiọn̄ọ se mmọ ẹkerede ye nte etiede mmọ ke idem. Bible ọdọhọ ete: “Jesus okot nseknditọ oro ẹdi onyụn̄ ọdọhọ ete: ‘Ẹyak n̄kpri nditọ ẹtiene mi.’” (Luke 18:15, 16) Isan̄ kiet, mme owo ẹma ẹsua ẹnọ nditọiren oro ẹketịn̄de ikọ ndiwụt ke imọbuọt idem ye Jesus. Edi Jesus ama otoro nditọ oro, onyụn̄ ọdọhọ mbon oro ẹkesuade ẹnọ mmọ ete: “Nte akanam mbufo ikotke emi ite, ‘Afo ada inua nseknditọ ye mmọ eke ẹwapde eba ọnọ itoro’?”—Matthew 21:15, 16.

Nso ke nditọ ẹkeme ndikpep nto Jesus?

Jesus ama enịm eti uwụtn̄kpọ ọnọ nditọwọn̄ ke nte mmọ ẹkemede ndinyene udọn̄ ke n̄kpọ Abasi. Ke ini enye ekedide isua 12, ẹma ẹkụt enye “ke temple, nte etiede ke ufọt mme andikpep akpan̄ utọn̄ ọnọ mmọ onyụn̄ obụp mmọ mbụme.” Nso iketịbe? “Idem [ama] ọdọdiọn̄ akpa kpukpru mmọ emi [ẹkekpan̄de] utọn̄ ẹnọ enye aban̄a ifiọk ye mme ibọrọ esie.” (Luke 2:42, 46, 47) Edi ifiọk Jesus ikanamke enye atan̄ idem. Utu ke oro, akakam ananam enye okpono ete ye eka esie. Bible ọdọhọ ete: “[Enye] aka iso osụk ibuot ọnọ mmọ.”—Luke 2:51.

Edieke oyomde ndifiọk n̄kpọ en̄wen mban̄a emi, se ibuot 14 ke n̄wed oro Nso ke Bible Enen̄ede Ekpep? *

[Ikọ Idakisọn̄]