Mbụme Oro Mme Andikot Ẹbụpde

Ndi Mme Ntiense Jehovah Ẹdi Ido Ukpono Protestant?

Mme Ntiense Jehovah idọhọke ke mmimọ idi ido ukpono Protestant. Ntak-a?

Ẹketọn̄ọ Ido Ukpono Protestant ke Europe ke n̄kpọ nte isua 500 emi ẹkebede man ẹnam ukpụhọde ke Ufọkabasi Roman Catholic. Akpa mbon oro ẹkekotde “Protestant” ẹkedi mme anditiene Martin Luther, ke mbono oro ẹkenịmde ke Speyer ke 1529. Ọtọn̄ọde ke ini oro, ẹdikot kpukpru mbon oro ẹnyịmede mme edumbet ye uduak mme anam Ukpụhọde oro, mbon “Protestant.” Ntak edi oro Merriam-Webster’s Collegiate Dictionary, Nsiondi Ọyọhọ 11, ọdọhọde ke Protestant edi “owo emi abuanade ke kiet ke otu ediwak ufọkabasi emi mînyịmeke ke Pope akara ofụri ererimbot, onyụn̄ enyịmede mme edumbet Edinam Ukpụhọde oro ẹdọhọde ke mbuọtidem kpọt anam Abasi enyịme owo, ke kpukpru mme andinịm ke akpanikọ ẹdi oku, ye nte ke Bible kpọt ekpep akpanikọ.”

Okposụkedi emi Mme Ntiense Jehovah mînyịmeke ke pope akara ofụri ererimbot ẹnyụn̄ ẹnen̄erede ẹnịm ke Bible kpọt ekpep akpanikọ, mmọ ẹnen̄ede ẹkpụhọde ye mme ido ukpono Protestant ke ediwak usụn̄. Ke nditịm ntịn̄, The Encyclopedia of Religion ọdọhọ ke Mme Ntiense Jehovah “ẹnen̄ede ẹda san̄asan̄a.” Kere ban̄a usụn̄ ita emi mmọ ẹkpụhọrede.

Akpa, okposụkedi emi ido ukpono Protestant ẹsịnde ndusụk n̄kpọ oro ido ukpono Catholic esinamde, mbon oro ẹketọn̄ọde Edinam Ukpụhọde ikọkpọn̄ke ndusụk ukpepn̄kpọ Catholic, utọ nte ukpepn̄kpọ Abasi-Ita-ke-Kiet, ikan̄ hell, ye ukpọn̄ ikpaha ke nsinsi. Edi Mme Ntiense Jehovah ẹnịm ke Bible ikpepke mme utọ ukpepn̄kpọ oro ye nte ke mme ukpepn̄kpọ oro iyakke owo enen̄ede ọfiọk Abasi.—Se page 4-7 ke magazine emi.

Ọyọhọ iba, Mme Ntiense Jehovah ibiọn̄ọke ido ukpono en̄wen, edi ẹkpep mme owo nti n̄kpọ. Mmọ ẹnen̄ede ẹnam item Bible emi: “Owo Ọbọn̄ inyeneke ndidi owo utọk; enye enyene ndinyene sụn̄-sụn̄ ido ye kpukpru owo; enye enyene ndifiọk nditeme owo, nnyụn̄ mme ime ke ini ẹnamde enye idiọk: enye onyụn̄ enyene ndida ata nsụkesịt nnam mmọ emi ẹbiọn̄ọde ẹnen̄ede ẹsan̄a.” (2 Timothy 2: 24, 25, Edisana Ŋwed Abasi Ibom) Mme Ntiense Jehovah ẹsiwụt mme owo ukpụhọde oro odude ke se Bible ekpepde ye se ediwak ido ukpono ẹkpepde. Edi mmọ isinamke emi man ẹkpụhọde mme ido ukpono eken. Utu ke oro, uduak mmọ edi ndin̄wam mme owo oro ẹnyenede eti esịt ẹnyene nnennen ifiọk ẹban̄a Abasi ẹnyụn̄ ẹfiọk Ikọ esie, kpa Bible. (Colossae 1:9, 10) Mme Ntiense Jehovah isinenike eneni ye mbon ido ukpono en̄wen oro mînyịmeke se mmọ ẹtịn̄de.—2 Timothy 2:23.

Ọyọhọ ita, ido ukpono Protestant amakabade ata ediwak nsio nsio n̄ka, edi Mme Ntiense Jehovah ẹsụk ẹdiana kiet ẹdi otu nditọete kiet ke ofụri ererimbot. Mme Ntiense Jehovah, emi ẹdude ke se ibede idụt 230, ẹkpep ukem n̄kpọ, nte apostle Paul eketemede ete “ẹnyene ikọ inua kiet.” Ubahade idụhe ke otu mmọ. Utu ke oro, mmọ “ẹdiana kiet ke ekikere kiet ye ke usụn̄ ukere n̄kpọ kiet.” (1 Corinth 1:10) Mmọ ẹsịn ukeme ‘ẹmụm edidianakiet eke spirit ẹkama ke mbọbọ emem edidianakiet’ ke otu idemmọ.—Ephesus 4:3.