“Adan̄a Didie ke Ndiseme”?

Jayne ama atua ete: “Yak ubiak emi etre mi nan̄a!” Enye ọkọdọn̄ọ kansa, ndien kansa ke akadia enye idem. Ama enen̄ede ọdọn̄ ubon mmọ ye mme ufan esie nte ẹkpesiode enye udọn̄ọ oro ke idem ẹnyụn̄ ẹtre ọkpọsọn̄ ubiak oro. Mmọ ẹma ẹbọn̄ akam ẹben̄e Abasi an̄wam enye. Ndi Abasi ama okop akam mmọ? Ndi enye ama ekere aban̄a?

ABASI ọfiọk se iwọrọde ubonowo. Ikọ esie, kpa Bible, ọdọhọ ete: “Ofụri ubonowo ke omụm mmụm ọtọkiet onyụn̄ odu ke ubiak ọtọkiet.” (Rome 8:22) Abasi ọfiọk ke ata ediwak owo ẹsikop nsio nsio orụk ubiak kpukpru usen nte Jayne. Abasi okụt miliọn owo 800 oro mînyeneke se ẹdiade, ata ediwak owo oro mbonubon mmọ ẹsiduọde obom ye mmọ, ye ediwak ete ye eka oro ẹtịmerede esịt ẹban̄a ini iso ye mfọnọn̄kpọ nditọ mmọ. Ndi akanam emekere m̀mê Abasi ọyọkọk mme mfịna emi? Mmọn̄ọ, sia ọdọn̄de nnyịn ndin̄wam mbon oro imade, ndi ikpọdọn̄ke Abasi ndin̄wam ubonowo oro enye okobotde?

Edieke edide akanam omobụp m̀mê Abasi ọyọkọk mme mfịna emi, ọwọrọ idịghe afo ikpọn̄ obụp. Ke se ikande isua 2,600 emi ẹkebede, eketie anam-akpanikọ eren kiet emi ekekerede Habakkuk nte etiede ediwak owo mfịn, ndien enye ama obụp Abasi ete: “O Jehovah, adan̄a didie ke ndiseme, ndien afo ukopke! Nditua afai nnọ fi, ndien unyan̄ake! Nsinam afo owụtde mi idiọk ido, onyụn̄ esede ukụt? Nsobo ye afia ẹnyụn̄ ẹdu mi ke iso; utọk onyụn̄ odu, en̄wan onyụn̄ emen idem”? (Habakkuk 1:2, 3) Habakkuk, emi ekedide prọfet eyen Hebrew, ama ada enyịn esie okụt enyene-ndịk afai ye en̄wan ke eyo esie. Mme utọ n̄kpọ oro ẹyọyọhọ ererimbot mfịn, ndien ẹsidoro mbon oro ẹnyenede esịtmbọm ndidien.

Ndi Abasi ama ofụmi Habakkuk? Baba. Enye ama akpan̄ utọn̄ okop mbụme oro Habakkuk okobụpde ke ofụri esịt, ọdọn̄ enye esịt, onyụn̄ ọsọn̄ọ enye idem. Jehovah Abasi ama ọsọn̄ọ mbuọtidem Habakkuk ke ndin̄wọn̄ọ nnọ enye ke imọ iyetre ndutụhọ. Ikọ Abasi ekeme ndisọn̄ọ fi idem n̄ko, nte ọkọsọn̄ọde Jayne ye ubon mmọ. Mme ibuotikọ oro ẹtienede ẹyebọrọ mme mbụme emi: Nnyịn ikeme ndisan̄a didie mfiọk ke Abasi enen̄ede ekere aban̄a nnyịn? Nso ke Abasi edinam man etre ndutụhọ, ndien ini ewe ke enye editre?