Abasi Ese Didie Mmịn?

ANDIBOT nnyịn, emi enen̄erede oyom n̄kpọ ọfọn ye nnyịn, ikpanke owo ndin̄wọn̄ mmịn ke ufat. * Utu ke oro, enye ọnọ owo “wine [man] enem owo esịt, anam iso esie ayama akan aran, uyo onyụn̄ anam esịt ọsọn̄ọ owo.” (Psalm 104:15) Isan̄ kiet, Jesus Christ ama etiene anam usọrọ ndọ enem ebe ke ndinam mmọn̄ akabade ata “eti wine.”—John 2:3-10.

Andibot enen̄ede ọfiọk se mmịn esinamde owo ke idem ye ke mfre. Ete nnyịn eke heaven ada Bible ‘ekpep nnyịn usụn̄ udori,’ onyụn̄ enen̄ede akpan nnyịn ete ikûn̄wọn̄ mmịn ibe ubọk. (Isaiah 48:17) Kop in̄wan̄-in̄wan̄ ntọt emi:

“Ẹkûkpa mmịn, emi edide etịme etịme ido.” (Ephesus 5:18) “Mme akpammịn . . . ididaha obio ubọn̄ Abasi inyene.” (1 Corinth 6:9-11) Ikọ Abasi akpan “mbun̄wọn̄i, uyom uyom usọrọ, ye mme n̄kpọ eke ẹbietde mmọ emi.”—Galatia 5:19-21.

Idahaemi ẹyak ineme mme mfịna edin̄wọn̄ mmịn mbe ubọk.

Mme Mfịna Edin̄wọn̄ Mmịn Mbe Ubọk

Okposụkedi emi mmịn ekemede ndinyene ufọn, enye enyene n̄kpatan̄a n̄kpọ oro ẹkemede nditịmede nte ekikere ye idemowo ẹsinamde n̄kpọ. Edin̄wọn̄ mmịn mbe ubọk ekeme ndida ekededi ke otu mfịna emi ndi:

Edin̄wọn̄ mmịn mbe ubọk esitịmede ekikere andin̄wọn̄, ke ntem ‘iyakke enye ekere n̄kpọ ọfọn.’ (Mme N̄ke 23:33, Today’s English Version) Allen, ọn̄wọn̄-n̄kpọ-owo, oro iketịn̄de iban̄a ke akpa ibuotikọ, ọdọhọ ete: “Mbumehe mmịn idịghe ata udọn̄ọ kpọt; enye edi nte owo esikerede n̄kpọ ye edu esie. Owo isikereke iban̄a afanikọn̄ oro ẹdade ẹsọk mbon en̄wen.”

Ndin̄wọn̄ mmịn mbe ubọk ekeme ndinam owo anana mfara ke idem. N̄wed Abasi odụri  owo utọn̄ ete: “Wine ye obufa wine ẹda [owo] esịt.” (Hosea 4:11) Asan̄a didie edi ntre? Enyịn mmịn ekeme ndinam owo ọtọn̄ọ ndima ndiọi ekikere ye ndiọi udọn̄ emi enye mîsimaha. Ekeme ndinam nnyịn inyeneke aba iwụk ndinam se inende nte ikenyenede. Mmịn ekeme ndinam nnyịn inyeneke aba mfara ke idem, inyụn̄ iyakke idi aba ufan Abasi.

Ke uwụtn̄kpọ, John ama eneni eneni ye n̄wan esie onyụn̄ ayat esịt ọwọrọ aka itie un̄wọn̄n̄kpọ. Enye ama ọn̄wọn̄wọn̄ ekpeme mmịn ifan̄ ndida nsụk esịt ke ini emi n̄wan kiet ekedide ebịne enye. Ke enye ama akafiak ọn̄wọn̄ ekpeme ifan̄ en̄wen, enye ama asan̄a ye n̄wan oro ekesịn efịbe. Ke enyịn ama akan̄wan̄a enye, enye ama enen̄ede atua n̄kpọfiọk ndinam n̄kpọ emi enye mîkpekereke-kere ndinam edieke mmịn mîkpanamke enye anana mfara ke idem.

Ndin̄wọn̄ mmịn mbe ubọk ekeme ndinam owo etịn̄ ikọ onyụn̄ anam n̄kpọ ntịme ntịme. Bible obụp ete: “Anie esinyene mfịna kpukpru ini? Anie esineni eneni onyụn̄ an̄wana en̄wan? Kpukpru owo emi ẹtiede ẹbịghi, ẹnyụn̄ ẹfiakde ẹn̄wọn̄ ekpeme kiet en̄wen kpọt.” (Mme N̄ke 23:29, 30, Contemporary English Version) Ndin̄wọn̄ mmịn mbe ubọk ekeme ndinam ‘etie nte ke owo ana ke ufọt inyan̄, ye nte ke owo ana ke enyọn̄ ito ubom.’ (Mme N̄ke 23:34) Owo emi ọn̄wọn̄de mmịn ebe ubọk ekeme ndidemede ndikụt “unan ke ofụri idem esie, edi ikam ifiọkke nte akasan̄ade.”—Mme N̄ke 23:35, CEV.

Ndin̄wọn̄ mmịn mbe ubọk ekeme ndinọ owo udọn̄ọ. “Ke akpatre ke [mmịn] edidom nte urụkikọt, onyụn̄ atịgha nte ibọm.” (Mme N̄ke 23:32) Ifiọk ibọkusọbọ ọsọn̄ọ ke n̄ke eset emi edi ikọ ọniọn̄. Ndisin̄wọn̄ mmịn awak akaha ekeme ndinọ owo nsio nsio udọn̄ọ kansa, udọn̄ọ edidiana ekpa, esisịt suka ke iyịp mbon oro ẹdọn̄ọde ikịm an̄wan n̄kụhọ, akpauben̄, m̀mê udọn̄ọ esịt—ke ndisiak ibat ibat mfịna. Idem edin̄wọn̄ mmịn mbe ubọk ini kiet kpọt ekeme ndinam owo osụhọ mîdịghe owot owo. Edi idịghe ata ata udọn̄ọ edi akakan mfịna edin̄wọn̄ mmịn mbe ubọk.

Akakan mfịna edin̄wọn̄ mmịn mbe ubọk. Idem edieke owo mîkpaha mmịn, edin̄wọn̄ mmịn n̄kaha ekeme ndibiat ufan owo ye Abasi. Bible etịn̄ in̄wan̄-in̄wan̄ ete: “Ifọnke fọn inọ mmọ eke ẹbakde ẹdaha ke usenubọk  ẹbịne mmịn: ẹbịghi ke okoneyo, wine obụbede mmọ ibuot!” Ntak-a? Isaiah etịn̄ nte edin̄wọn̄ mmịn mbe ubọk abiatde ufan owo ye Abasi, ete: “Mmọ itịn̄ke enyịn ke utom Jehovah, inyụn̄ isehe se ubọk esie ẹnamde.”—Isaiah 5:11, 12.

Ikọ Abasi eteme nnyịn ete ‘ikûda ke otu mme ofobo wine.’ (Mme N̄ke 23:20) Ẹteme n̄kani iban ẹte ‘ẹkûdụk ufụn ẹnọ ediwak mmịn.’ (Titus 2:3) Ntak-a? Mme owo ẹsitọn̄ọ nsịtnsịt ndin̄wọn̄ mmịn n̄wak, ẹnyụn̄ ẹnam ntre ke ubọk ke ubọk, edi ifiọkke. Ke akpatre, owo mmịn emi ekeme “ndina enyịn in̄wan̄ obụp ete, ‘Ini ewe ke eyo edisesiere man n̄kpafiak n̄n̄wọn̄?’” (Mme N̄ke 23:35, CEV) Mme ọn̄wọn̄-n̄kpọ-owo ẹsịm akpatre idiọk idaha ke ini mmọ ẹyomde n̄kpọ oro anamde enyịn atara mmọ, oro edi, ndibak n̄n̄wọn̄ mmịn man enyịn mmịn n̄kpọn̄ atara mmọ.

Bible odụri owo utọn̄ ete ke mbon oro ẹmade “[ndiyụhọ] mmịn, uyom uyom usọrọ, mbuba un̄wọn̄ mmịn . . . ẹyenam ibat ẹnọ enye emi eben̄ede idem ndikpe ikpe nnọ mme odu-uwem ye mme akpan̄kpa.” (1 Peter 4:3, 5) Jesus ama onyụn̄ odụri owo utọn̄ aban̄a akpan ini emi idude uwem ete: “Ẹnọ ntịn̄enyịn ke idem mbufo mbak uyụhọ udia ye ọkpọsọn̄ un̄wọn̄ mmịn ye editịmede esịt uwem emi ẹdinam esịt mbufo ẹkabade ẹdobi, ndien usen [Jehovah] edibuat mbufo nte ekpọ.”—Luke 21:34, 35.

Edi nso ke mbon oro ẹsin̄wọn̄de mmịn ẹbe ubọk ẹkpenam mbak ‘ọkpọsọn̄ un̄wọn̄ mmịn edinam esịt mmọ ẹkabade ẹdobi’?

[Ikọ Idakisọn̄]

[Mme ndise ke page 4, 5]

Edin̄wọn̄ mmịn mbe ubọk ekeme ndida ediwak mfịna ndi