“Ekpeme Kiet En̄wen Kpọt”

ALLEN ọkọtọn̄ọ ndin̄wọn̄ mmịn mbe ubọk ke ini ekedide isua 11. * Enye ye mme ufan esie ẹma ẹsibre mbre ke akai, ẹnam se mmọ ẹsikụtde nte mbon ndise senima ẹnamde. Mbon ndise senima oro ẹkenanam nte ke mmimọ ke in̄wọn̄ mmịn, edi Allen ye mme ufan esie ẹken̄wọn̄ ata edin̄wọn̄wọn̄.

Tony ekedi isua 40 ke ini enye ọkọtọn̄ọde ndisin̄wọn̄ ekpeme mmịn ition m̀mê itiokiet kpukpru mbubreyo utu ke ekpeme kiet m̀mê iba emi enye ekesin̄wọn̄de. Ke akpatre, enye ikesifiọkke aba ibat ekpeme emi enye ekesin̄wọn̄de ke usen.

Allen ama oyom ẹn̄wam imọ itre mmịn. Tony ikoyomke un̄wam oro ndima mbonubon ye mme ufan esie ẹkenọde enye. Allen odu uwem ada inua esie obụk n̄kpọ emi; Tony ama akpa ke unọmọ ubomisọn̄ ke ama ọkọn̄wọn̄ mmịn ebe ubọk.

Idem edieke owo etiede ikpọn̄ ọn̄wọn̄ mmịn ebe ubọk, mme mfịna esie iditreke ndisịm mbon en̄wen, ndien ediwak ini, esidiọk etieti. Edin̄wọn̄ mmịn mbe ubọk esiwak ndinam ẹtọk owo, ẹyịbi owo, ẹn̄wana ye owo, ẹwot owo ke unọmọ ubomisọn̄, ẹnyụn̄ ẹda unan ke itieutom, ọkọrọ ye akpakịp mfịna eken. Edin̄wọn̄ mmịn mbe ubọk esinam ubonowo ẹbiat ata ediwak okụk kpukpru isua, owo itịn̄ke-tịn̄ ọkpọkpọ afanikọn̄ oro enye adade ọsọk enyene-idem, mbonubon, ye nditọ.

Kpa ye oro, Itieutom Unam Ndụn̄ọde Nsọn̄idem Eke United States ọdọhọ ete: “Idịghe kpukpru mbon oro ẹsin̄wọn̄de mmịn kpukpru ini ẹnyene mfịna mmịn, inyụn̄ idịghe kpukpru mbon oro ẹnyenede mfịna mmịn ẹsin̄wọn̄ mmịn kpukpru ini.” Ediwak owo oro mîdịghe mbon mmịn ẹsin̄wọn̄ mmịn ẹbe ubọk, edi ifiọkke. Ndusụk owo oro ẹsin̄wọn̄de mmịn ntomo ntomo ẹsin̄wọn̄ ẹbe ekpeme ition ke ebe kiet.

Edieke afo emekde ndin̄wọn̄ mmịn, ekpeme ifan̄ awak akaha? Edisan̄a didie ọfiọk ini emi mûkpafiakke un̄wọn̄ “ekpeme kiet en̄wen kpọt”? (Mme N̄ke 23:29, 30, Contemporary English Version) Mme ibuotikọ oro ẹtienede ẹyeneme mme n̄kpọ oro ẹkemede ndin̄wam owo ke n̄kpọ emi.

[Ikọ Idakisọn̄]