Enye Emi Esisude Un̄wọn̄ọ Esie
San̄a Kpere Abasi
Enye Emi Esisude Un̄wọn̄ọ Esie
NDI esisọn̄ fi ndibuọt idem ye owo? Nnyịn idu uwem ke ererimbot emi mme owo ẹwakde ndinam mme n̄kpọ oro mîyakke ẹbuọt idem ye owo. Edieke owo emi afo ọkọbuọtde idem akanamde se iyatde fi—edide okosu nsu m̀mê etre ndinam se ọkọn̄wọn̄ọde—anaedi emi ama anam ọsọn̄ fi ndibuọt idem ye owo. Edi odu owo emi mîdibian̄ake fi tutu amama edieke ọbuọtde idem ye enye. Mme N̄ke 3:5 eteme nnyịn ete: “Buọt idem fo ye Jehovah ke ofụri esịt fo.” Ntak emi odotde ibuọt idem ntre ye Jehovah? Man ibọrọ mbụme oro, ẹyak idụn̄ọde ikọ Joshua—owo emi ọkọbuọtde idem ye Jehovah ke ofụri esịt—emi ẹwetde ke Joshua 23:14.
Kere ban̄a se ikanamde enye etịn̄ ikọ oro. Joshua emi adade itie Moses nte adausụn̄ Israel, ekpere ndisịm isua 110. Ke ofụri anyan ini emi enye okodude uwem, enye ama ada enyịn esie okụt ofụri ikpọ n̄kpọ oro Jehovah akanamde ọnọ nditọ Israel, esịnede enye emi Enye akanamde mmọ ẹsan̄a Ididuot Inyan̄ ẹbe ke utịbe utịbe usụn̄ ke n̄kpọ nte isua 60 ke edem. Idahaemi, Joshua etie ekere kpukpru n̄kpọ emi onyụn̄ okot “mbiowo [Israel], ye mme ikpọ owo mmọ, ye mme ekpe-ikpe mmọ, ye mme andidaha mmọ, ẹdi.” (Joshua 23:2) Ikọ oro enye etịn̄de idahaemi ọnọ mmọ edi ikọ ọniọn̄ akwa owo ye ke ntak emi enye etiede ekere ikọ Abasi onyụn̄ enyenede mbuọtidem.
Joshua ọdọhọ ete: “Mfịn emi ami mmọn̄ n̄ka usụn̄ ofụri ererimbot.” Ikọ oro, “usụn̄ ofụri ererimbot” edi ebetọ ikọ emi ọwọrọde n̄kpa. Ke nditịm ntịn̄, ikọ Joshua ọwọrọ ntem, “Usen uwem mi iwakke aba.” Sia Joshua ọfiọkde ke imọ imọn̄ ikpa, anaedi enye enen̄ede etie ekere aban̄a uwem esie. Nso ke enye editịn̄ inọ nditọete esie ke emi enye oyomde ndikpa mi?
Joshua aka iso ọdọhọ ete: “Baba eti ikọ kiet eke Jehovah Abasi mbufo ọkọdọhọde aban̄a mbufo, ikpụhu: kpukpru ẹma ẹsu ẹnọ mbufo, baba ikọ kiet ikpụhu ke esịt.” Ikọ emi owụt ke enye enen̄ede ọbuọt idem ye Abasi. Ntak emi enye ọkọbuọtde idem ntre ye Abasi? Ke ini enye etiede ekere kpukpru se enye okokụtde, enye edi edifiọk ke Jehovah esisu mme un̄wọn̄ọ Esie kpukpru ini. * Se inamde Joshua etịn̄ ikọ emi edi emi: Enye oyom nditọ Israel ẹnyene ọyọhọ mbuọtidem ke kpukpru se Jehovah ọn̄wọn̄ọde ọnọ mmọ ẹyesu n̄ko.
N̄wed ndụn̄ọde Bible kiet etịn̄ ntem aban̄a Joshua 23:14, ete: “Kot kpukpru un̄wọn̄ọ Bible; ekem dụn̄ọde mme mbụk ererimbot; nyụn̄ dụn̄ọde kpukpru edibotn̄kpọ, man ese m̀mê oyokụt ini ekededi emi Abasi abiatde m̀mê efrede un̄wọn̄ọ esie ekededi.” Edieke ikpekemede ndinam utọ ndụn̄ọde oro, nnyịn n̄ko ikpetịn̄ se Joshua eketịn̄de—ke akananam mme un̄wọn̄ọ Jehovah itreke ndisu.—1 Ndidem 8:56; Isaiah 55:10, 11.
Bible etịn̄ mme un̄wọn̄ọ Abasi oro ẹsude, esịnede mbon oro nnyịn ikụtde ẹsude. Enye onyụn̄ etịn̄ n̄ko aban̄a nti n̄kpọ oro Jehovah ọn̄wọn̄ọde ndinam nnọ nnyịn ke ini iso. * Ntak emi mûkotke mme un̄wọn̄ọ emi ke idemfo? Edieke afo ekpepde Bible, emi ayanam enịm ke odot ọbuọt idem ye Enye emi esisude mme un̄wọn̄ọ esie.
[Mme Ikọ Idakisọn̄]
^ ikp. 7 Ibat ibat un̄wọn̄ọ oro Joshua okokụtde nte ẹsude ẹdi emi. Jehovah ama ọn̄wọn̄ọ ndinọ Israel isọn̄ mmọ. (Men Genesis 12:7 domo ye Joshua 11:23.) Jehovah ama ọn̄wọn̄ọ ndinyan̄a Israel nsio ke Egypt. (Men Exodus 3:8 domo ye Exodus 12:29-32.) Jehovah ama ọn̄wọn̄ọ ke iyese iban̄a ikọt imọ.—Men Exodus 16:4, 13-15 domo ye Deuteronomy 8:3, 4.
^ ikp. 9 Edieke oyomde ndifiọk n̄kpọ en̄wen mban̄a se Abasi ọn̄wọn̄ọde ndinam nnọ nnyịn ke ini iso, se ibuot 3, 7, ye 8 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.