Mbụme Oro Mme Andikot Ẹbụpde . . .

Ntak Emi Abasi Ọn̄wọn̄ọde Ndinọ Mme Owo Nsinsi Uwem?

▪ Bible ọdọhọ ke Abasi ọnọ nnyịn ifet ndinyene “nsinsi uwem.” (John 6:40) Edi nso inam enye anam nnyịn inyene utọ idotenyịn emi? Ndi edi ikpîkpu edinam se inende?

Ndinam se inende esịne nditre ndisari mme owo nnyụn̄ nnam se ifọnde. Ndi nnyịn imenen̄ede idot ndidu uwem? Baba. Bible ọdọhọ ete: “Baba eti owo kiet eke anamde eti ndien mîdiọkke, idụhe ke ererimbot.” (Ecclesiastes 7:20) Idiọkn̄kpọ enyene utịp. Abasi ama odụri Adam, akpa owo emi ẹkebotde, utọn̄, ete ke enye ayakpa ke usen emi enye anamde idiọkn̄kpọ. (Genesis 2:17) Nte ini akakade, Abasi ama ọnọ apostle Paul odudu spirit man ewet ete: “N̄kpọ eyenutom idiọkn̄kpọ edi n̄kpa.” (Rome 6:23) Ke ntre, edieke kpukpru nditọ Adam ẹdotde n̄kpa, ntak ndien, emi Abasi ọn̄wọn̄ọde ndinam mmọ ẹdu uwem ke nsinsi?

Abasi ọn̄wọn̄ọ ndinọ nsinsi uwem “ke mfọn.” Emi owụt nte ima Abasi ye mfọnido esie oro owo mîdotke ẹnen̄erede ẹkponi. Bible ọdọhọ ete: “Kpukpru owo ẹma ẹnam idiọkn̄kpọ ẹnyụn̄ ẹtaba ubọn̄ Abasi, ndien, edi ke mfọn ke ẹbat mmọ ke edinen oto ke mfọnido esie oro owo mîdotke ebe ke edisio mmọ ke ufụn ebe ke ufak oro Christ Jesus ekekpede.”—Rome 3:23, 24.

Okposụkedi emi kpukpru nnyịn idotde n̄kpa, Abasi ọn̄wọn̄ọ ndinọ mbon oro ẹmade enye nsinsi uwem. Ndi emi ọfọn? Bible ọdọhọ ete: “Nso ke nnyịn ididọhọ ndien? Nte Abasi akwan̄a ikpe? Idịghe ntre! Koro enye ọdọhọ Moses ete: ‘Owo ekededi eke ndituade mbọm nyatua enye mbọm, nyonyụn̄ n̄wụt mbọm nnọ owo ekededi eke ndiwụtde mbọm.’ . . . Afo edi anie eke akpadade ọbọrọ Abasi ikọ?”—Rome 9:14-20.

Ke ndusụk ebiet, akwa owo ukara m̀mê ebiereikpe ekeme nditre ndimia abiatibet emi odude ke ufọk-n̄kpọkọbi akamba ufen. Edieke abiatibet oro anamde se ebiereikpe oro ọdọhọde onyụn̄ okpụhọrede edu uwem esie, ebiereikpe m̀mê adaibuot ukara ekeme ndisụhọde ufen esie mîdịghe adaha ọnọ enye ofụri ofụri. Ndinam ntem enen̄ede edi mfọnido oro abiatibet emi mîdotke.

Kpasụk ntre, Jehovah ekeme ndibiere ke idịghe kpukpru mme anamidiọk ke imọ idimia ufen oro mmọ ẹdotde ndibọ. Ima ekeme ndinam enye ọnọ mbon oro ẹmade enye ẹnyụn̄ ẹdude uwem ekekem ye mme edumbet esie, nsinsi uwem. Bible ọdọhọ ete: “Abasi inamke asari, edi ke kpukpru idụt enye enyenyịme owo eke abakde enye onyụn̄ anamde edinen ido.”—Utom 10:34, 35.

Akakan ima oro Jehovah amade nnyịn edi emi enye ọkọdọn̄de Eyen esie edibọ ufen onyụn̄ akpa ke ibuot nnyịn. Jesus eketịn̄ aban̄a Ete esie ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”—John 3:16.

Abasi ama kpukpru mbon oro ẹmade enye ẹnyụn̄ ẹnamde uduak esie, inamke n̄kpọ m̀mê mmọ ẹto m̀mọ̀n̄. Mmọdo, idotenyịn nsinsi uwem enen̄ede edi mfọnido Abasi oro owo mîdotke, kpa akakan ima oro Abasi amade nnyịn.

[Se ẹwetde ke ikpọ abisi ke page 29]

Enye enen̄ede edi mfọnido Abasi oro owo mîdotke, kpa akakan ima oro Abasi amade nnyịn